بعد أن تم ترشيحي لتولي بعض المهام الخاصة ب "الوزارة" خارج الكويت، وبالتحديد في مدينة زيورخ السويسرية
وبعد أن عانيت الأمرين للحصول على التواقيع المطلوبة "لإتمام" المهمة، تمت الحجوزات على خير
وتقرر السفر أخيراً!!
في اليوم المحدد، توجهنا إلى مطار الكويت الدولي "المتواضع" واللي يكسر الخاطر قليلاً ووافنا هناك مندوب الشركة
المرافق لنا في هذه الرحلة، ليتم التعارف السريع بين أعضاء وزارتنا والشركة المضيفة على خير مايرام!
؛؛
؛
كانت رحلتنا في الفجر فقد كنت منهكة ومتعبة وكدت أن أنام خلال انتظاري في "اللاونج" حتى أعلن أخيراً عن موعد الاقلاع
وحث المسافرين للتوجه إلى بوابة المغادرة استعداداً للرحيل!
؛؛
؛
في الحقيقة لا أتذكر شيئاً بعد أن أغلق باب الطائرة وتحركت الطائرة على أرض المطار استعداداً للتحليق!
؛
فقد غطيت في سبات عميق فور ربطي لحزام المقعد! ولم أشعر بشيء حتى قام زوجي مشكوراً بايقاظي
معلناً وصولنا إلى مطار دبي الدولي !
؛؛
؛
كنت "متعسرة" كثيراً وأشعر بالنعاس الشديد !
؛
؛
(( ما مداني أغفي!!))
؛؛
؛
بمجرد نزولي على أرض مطار دبي تبخر كل أثر للتعب أو النعاس!!
؛؛
؛
هالني ما رأيت بالفعل!!
؛؛
؛
أهذه دبي حقاً؟؟ أو بالأحرى أهذا مطار دبي؟!!
؛؛
؛
في الحقيقة لا تلوموني لدهشتي واستغرابي،،
؛؛
((خبري في دبي من سنة 1999 !!))
؛؛
؛
غياب دام أكثر من عشر سنوات فلابد لي إذاً أن أدهش وأن "تطقني البوهه"!!
؛؛
؛
ياحلو دبي والله وياحلو مطارها!
؛؛
توجهنا إلى "اللاونج" الخاص بالاماراتية وجلسنا ننتظر حتى يحين موعد اقلاع طائرتنا المتوجهه إلى زيورخ
؛؛
؛
كان "اللاونج" كبيراً جداً!! وكأنه مبنى قائم بذاته!
؛؛
؛
غرف للاستحمام - غرف للراحة (للمسافرين الذين لديهم ترانزيت طويل) - صالات ومقاعد مريحة
و... و...و.... الكثير!!
؛؛
؛؛
تحسرت على حال مطارنا "المجكنم" وقلت "تفاءلي خيراً"!!
؛؛
طارت النومة واختفى التعب! ورحت أتجول في محلات السوق الحرة في مطار دبي مستمتعة برؤية الناس من
مختلف أنحاء العالم (ما عدا الامارات!)
؛؛
نعم لم أشاهد اماراتي واحد؟؟ أين هم؟!
؛؛
أخبرني زوجي بأنه سيعطيني مبلغ 1000 فرنك سويسري إن وجدت له اماراتي واحد في المكان!!
وطبعاً خسرت!!
:(
؛؛
كان المطار يعج بالمسافرين الأجانب والعرب وغيرهم ولكن لا وجود لشخص اماراتي بينهم!
؛؛
أعلن عن موعد اقلاعنا مجدداً ،، فتوجهنا إلى بوابة المغادرة التي قادتنا بدورها إلى باص يأخذنا إلى الطائرة
؛؛
وكنت طوال رحلة توجهنا للطائرة أردد هذه الكلمات دون وعي أو ادراك مني
"ماشاءالله عليهم"
" الله يحفظ ديرتهم"
!!
فقد أعجبت كثيراً بتصميم مبنى المطار الرائع ..
وطلبت من ربي ودعيته كثيراً أن يصبح لدينا نصف مطارهم!!
؛؛
(( الله يهنيهم ولا تخافون عيني مو حارة))
؛؛
؛
صعدنا إلى الطائرة مجدداً .. وفجأة عاد إليّ النعاس والتعب ثانيةً!
فعانقت مخدتي ،، وغرقت في عالم الأحلام!!
يـــــتـــــبـــــع ...
هناك 45 تعليقًا:
لوول بما إن توهم شالعيني من فراشي
فحسيت بكلمة متعسرررره عدددل
الدول كل مالها وتتقدم
واحنا نرجع لي ورا
بإنتظار التكمله :*
شفتي ولا إماراتي واحد (الله كريم)
تسلمين والله حياج الله بالاماراات ^^
حافية القدمين ولباسي المطر
الله كريم .. تفاءلي عزيزتي تفاءلي
يمكن في يوم نتقدم! :)
Om Hrooby
الظاهر الاماراتيين منخشين :)
الله يحييج عزيزتي واحنا من أول على طول بالامارات بس ظروف دراستي برا خلتني انقطع عن زيارتها لسنوات طويلة .. بس عقب اللي شفته؟؟ ابي اروح لها مره ثانية! :)
كل الود
ما شاءالله وتبارك الرحمن
عيني عليج ابرد من بحيرة زيورخ
لو اشرب نايكويل وبنادول نايت هم ما انام بالطيارة
ترا طلبة امريكا كلهم تخصص نوم بالطيارة!
ليتني دارسة معاكم
:p
وعليهم بالعافية اهل الامارات
المطار آخر همي... لو تحطينلي الشمس بايد والقمر بايد يظل اسمه مطـــــار.... اكرهه ما اواطنه نفسيتي تتأزم من شي اسمه مطار!... احتاج ميديتيشن!
chandal/danchal!!!
لوووووووووووول
شوفي أنا قبل لا اروح ادرس برا بأمريكا مستحيل .. و نو واي .. ولو تقطعيني ما أنام بالطيارة!!
بس من خذت ريلي على المطارات والروحة والردة صارت نومة الطيارة
is a MUST
ههه وعادي لو أنام 8-9 ساعات بالطيارة ماعندي مشكلة كلش!!
وعلى المطارات .. عاد أنا بالمرة مو نفسج!!
اذا غلقت والا ضاق خلقي وصكت فيني الدنيا اروح اشم هوا بالمطار :)))
أكتئب وتتعب نفسيتي اذا طولت فوق ال5-6 اشهر من غير ما اشوف المطار!
الظاهر انا اللي يبيلي ميديكيشن!
منورة دوم بسوالفج الجلوة جندولة :)
ضحكني تعليق جندل
عاد تدرين انا الطياره طقوس..لازم انام بالإقلاع وبالهبوووط...
وربعي يسموني تخصص نوم :)
اسم الله علي وين ما قط راسي أنام...بس طبعاً ذاك أول:)
المهم
مسّاج الله بالخير
الموضوع حده عجيب...
حسيت فيج بمطار دبي...
واللاونج بيني وبينج مايقارن باللي عندنه...
اصلا انا مرات اتوهق ..ومالقى مكان أقعد فيه!! أخذ كرواسونتي واقعد بره!!!!! شسوي يعني!!!
ودبي أراهنج لو تروحين لها مرتين بالسنة لازم تلقين شي يديد..برج والا مجمع..والا معلم....
واحنا ...من 1992 لي اليوم ..هذا احنا...والظليمة شينا..صار عندنا
الافنيوز..وشرق والمرينا...
الحمدالله على كل حال...
ترى مادري ليش الناس تكره يتبع!!!
انا اعشقها..لأني أدري ان البوست ماخلص..بذمتج مايضيق خلقج لما يخلص البوست الحلو؟؟؟
حبي:*
مرحبا
جميل سرد الرحلة
بانتظار البقية
بسرعة كملي عن سويسرا الجميلة :)
ولكم باك اي مس يوو
دمتي بصحه و عافيه ماي دير فرند
ما شالله عليج نمتي في الرحله المتجهه لدبي ..نمتي هالساعتين ..قلت
ما شاء الله :))..هذا الي ما نجحت فيه طول حياتي
لووووول .. عيل لو تطلعين برّه المطار شتقولين !!
دبي وايد حلوة بس مثل ما ذكرتي ما تشوفين امارتيين بالاسواق .. عجبتني ابوظبي اكثر .. كانت هادية وحلوة بعد !
مافي طيارة دايركت من الكويت لزيورخ ؟
اتوقع فيه بس انتو مو حاجزين .. لأني انا اسوي نفس الشي .. اطير من لندن لي قطر على القطرية بعدين اروح من قطر الكويت .. كل هذا عشان ما اخذ الكويتية !!!
أكره نومت الطياره .. حدها ارهاق وخصوصا اذا كنت سهران .. صج ما تحس بطول مدة الطيران ..بس اليوم اللي بعده ظهرك يكون متكسر !!
منتظرين البقية
اي والله.. الله يهنيهم والسوق الحره مالهم تضيعين فيه يعني قبل السفر لازم تحسبين حساب ساعتين او اكثر عشان التسوق
ياااا كره هالاستعسار
حاسه في شعورج ان تبين تنامين بس مو حاصلج :<
بس لما شفتي المطار صحصحتي هههههه احس عيونج صاروا مدورين :))
يالله نبي ال (2) :>
:), ماشاء الله عليهم دبي قفزوا قفزه مرتفعة جداً! اذهلوا العالم .. حتى صار الكل من دول الغرب يزورنهم
بانتظار يومياتك القادمة
ابي اسااااااافر ..
خخ..
ماعمرج جربت انام بالطياره ماحب انام بالاماكن المكشوفه اقصد فيها ناس غرب ماارتاح كلش..
ونوم العوافي :)
سرد جميل مشوق كما عودتينا
بانتظار اليتبع
:*
اي و الله نفس اللي صار يوم رحنا الامارات كل ما بندور اماراتيين ما نلقا
المكان الوحيد الي لقينا فيه اماريتيين بالجمعيه لوول
سواالفج تووووونس و متابعينج ^^
نوم الطياره متعبببببببب
اذا الطياره فاضيه اخذ 4 كراسي واتمقط فيهم
ناطرين :)
ناطرين الرحلة الصجية
دام الترانزيت هذي أحداثه
الياي شلون بيكون :)
ئي ما شاء الله عليهم .. يستاهلون كل خير :)
ناطرين باجي اخبار الرحلة ..
صباحك أغاني فرح ومسرات دائمة
ما شاء الله ,, ان شاء الله كانت رحلة خفيفة و أستمتعتي فيها : )
تحياتي ..
وَ ننتظر المزيد يا سيدتي
لوووووووووول، سايره إدوريين إماراتييين في المطااااااار هههههههههه .. قولي حق ريلج لقيتي إماراتييين في البلوووق ويالله خل يعطيج البيزات خخخخخخخ .. بس أكيد ما بتلقين إماراتيين وايد في المطار بس ماشفتي اللي يشتغلوون ؟ غريبه أغلبيتهم إماراتيين لول .. !!
ويييه إنتي من زمان مااايتييي .. لو يتي دبي بتظييعييين هاتي وياج حد داير دبي هههههههههه ..
بس مادري وحده قريتها كتبت الإماراتيين مالقتهم إلا في الجمعية.. و صدقها ، سيري الجميعة بتلقينا ..
و لاتنسين الإمارات نسبة الوافدين فيها أكثر من المواطنين .. نحنا 12% بس بس اعتقد من بعد الأزمة زادت نسبتنا وااايدين طلعوا و فكوونا ..
و تدرين عن الرقاد في الطيارة، أنا ودي أرقد لكن مافي فايدة، أذكر مرة كنا رادين من العمرة فليل و تعرفين مطارات السعودية شوي مب على الوقت و متعبه واااااايد .. قلت خلني أصرطلي حبتين بنادول نايت و أول مره أخذ بنادول نايت في حياتي و دوم أنصح ربعي إنهم ماياخذووونها بس كنت مجبوورة و أذكر كان عندي دوام اليوم الثاني و ما أبا أسير الجامعة مواصلة و تعبانة .. تخيلي خذت حبتين و أنا أتريا في الطيارة أبا أرقد هههههههه لكن ما في فايدة و مقهوووره عموه رقدت و أنا واعيه، و الله خلاااني مصحصحه لين ما رديت البيت و أحاول أرقد و مب يايني رقــاد .. !!
إنشاء الله في يوم من الأيام أرقد شراتج في الطيارة ... !!!
سوري وايد رمست ..
نوم العافيه ... ومطار دبي
يسر العين ..الله يبلغنا اليوم ونشوف مطارنا مثله..
ما أدري ليش حاسه مهندستنا تمهد
الاحداث قويه في الطريج : )
روميه
هذي زيارتي الاولى .. ولكن بالفعل اعجبني المكان بهدوئ الموسيقى الراقية
والكتابة الجميلة
رايحه سويسرا .. الله يهنيج ودييي اسافر :(
ضاق خلقي والسبه اسلووبج بالكتابة والموسيقى .. والله حسيت مع كل حرف اني طلعت من الكويت .. وركبت معاج الطيراة ونزلت دبي وعجبت مثل ماعجبتي
خخخ اسرتنا بالاحرف الجميلة
وحركتي الحنين ,, فانا احب السفر ولكن في هذه الضروف محكوور ..
ولا عادتي اذا ما اسافر 4 او 5 دول بالنسة اعتبر نفسي مو طبيعي
حتى لو كانت البحرين ولا العمرة
المهم اسافر :)
تحياتي وان شاء الله ماراح اقطع الزيارة لهذه المدونة الجميلة
وسنتابع اخبار سفرتج الجميلة
سلة ميوّة
لا بعد نسيتي تضيفين الكوت- المنشر- المركز العلمي والبيرق " ترى أنجزنا"!! :) خليها على الله
وعلى سالفة النوم اممممممم ما اقدر اعلق واقول شي غير ان النوم سلطان! :)
ويتبع؟؟
بيني وبينج أنا أحياناً كثيرة اتنرفز منها وتسبب لي توتر هههه
كل الود ..
7osen
ان شاءالله أكمل بسرعه ولا يهمك :)
خلك متابعني ..
كل الود
pure-silk
تسلمين والله ..
مع خالص حبي وتقديري
دمتي بخير
Sami
شفيكم انت وجندل علي؟؟ :)
اييييي نمت هالساعتين بالطيارة لي دبي لسبب بسيط جداً ..
الاقلاع كان الفجر !
اممم والله خايفة لا يكون البوست القادم "صدمة بالنسبة لك" ههه
دمت بخير
لولا الأمل
لا مافي طياره دايركت لزيورخ من الكويت لأن الكويتية تودي لجنيف ما تودي لزيورخ ..
وبالنسبة للحجوزات احنا ما تدخلنا فيها الا بالنسبة للفندق وتمت كلها عن طريق الشركة المستضيفة ..
وعلى نومة الطيارة ، يمكن لو كانوا حاجزين لنا على الايكونومي جان ما نمت ! بس البيزنيز "غير" :)
دمت بود
Made n Q8
ايي والله ، أذكر في ال2006 نزلت مطار دبي ترانزيت بس ماكان مطارهم الحالي اعتقد كان القديم وهم انبهرت منه وبغيت اخلص كل فلوسي بسوقهم وانا توني ما وصلت الديرة اللي ابيها!
وماشاءالله الله يهنيهم يارب وتصير ديرتهم من أعلى لي أعلى دوم ويرزقنا ما عطاهم :)
كل الود
Fishah
ههههه اي أهم شي ان عيوني صاروا مدورين :))
ان شاءالله بأكمل قريباً جداً .. خلج متابعة
دمتي بألف خير
Mai
الله يتمم عليهم يارب .. وديرتهم تهبل بصراحة وتستاهل وان شاءالله لي روحه لها بالمستقبل اذا الله أراد :)
كل الود
رورو الشخبوطة
انا قبل نفسج مستحيل أنام بمكان عام مثل الطيارة .. بس عادي تعودت ههه اغطي عيوني والا اقط الشيله على ويهي وباي باي اعيش بعالم الأحلام! :)))
دمتي بخير
الزين
منورتني دوم زيونه ..
مشكوره
Being One*
تسلمين عزيزتي والبقية قادمة قريباً بإذن الله
ترقبي:)
كل الود
شاي الضحى
ههه ايي كلنا نسوي جذي اذا الطياره فاضية نحجز المكان اللي يمه كراسي فاضيه وناخذ راحتنا :)
دمتي بود
BookMark
على قولتج الاحداث الدسمة توها ما انقالت هذي بس مجرد مقبلات :)
تسلمين عزيزتي
كل الود
أحمد الحيدر
تسلم غعلامينا المتميز على التواجد رغم الانشغالات الكثيرة :)
كل التقدير
Butterfly
تسلمين عزيزتي
وان شاءالله اليوم أنزل بوست جديد ..
دمتي متابعتني بود :)
AM.SA.CHANNEL
يا هلا بالامارات وأهلها ..
شحالج حبيبتي؟؟ :)
ولا تحاتين رمسي مثل ما تبين بيتج ومكانج ومنورتني دوم :)
وفعلاً دبي بالذات نسبة الاجانب فيها كبيرة فنادر تصيدين لج اماراتي .. بس نشوفهم برا دبي مثل ام القوين وعجمان وراس الخيمة أكثر
دمتي بخير وعافية يارب
رومية فهد
هههه ايي ان شاءالله أحط الاحداث "المهمة" قريباً جداً للحين السفرة بأولها تو الناس :)
دمتي بخير عزيزتي
الفنان
تسعدني زيارتك لمدونتي أخي الكريم وان شاءالله دوم تشرفني بمرورك على مواضيعي "اللي على قدي" :) وما تكون زيارتك الأخيرة ان شاءالله ..
دمتي بخير
الفنان
سوري .. "دمت بخير" :)
واي بالنسبة للمشاركة الثانية في البداية نشرتها بعدين استوعبت انها تحتوي معلومات شخصية فرديت حذفتها لأني مادري اذا كان عادي يظهر ايملك للكل والا فاعذرني:)
والموسيقى اهي للموسسيقار "عمر خيرت" ما ادري شنو اسمها بصراحة بس ممكن تبحث عنها في موقع YOUTUBE وان شاءالله تلاقيها ..
ومشكور مره ثانية على الكلام الطيب ..
اسعدني تواجدك
كل الود
كتبتي الكلام اللي بخاطري
عن مطارنا وعن طياراتنا وماالومج اذا انبهرتي بدبي حتى لو كنتي ترانزيت
انا يوم واحد والحين احن ابي ارجع مرة ثانيه ماشالله ديرة ونيسه وتنحب
الله يهنيهم ويرزقهم ويرزقنا معاهم
وبالنسبه للنومه بالطيارة انا اذا فيني نوم عادي انام طيارو او قطار او بالسيارة
ويابختج بزيوريخ عليج بالعافيه .. عسى طيبتي خاطرج في البانهوف شتراسه لوووول
رحت زيوريخ مرتين وافكر بالثالثه قريبا
مدينه راقيه وهاديه ونظييييفه
إرسال تعليق