تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







السبت، 17 أبريل 2010

وبـــعـــديــــــن ويــــاكــــم؟؟!!


شنو الحل مع هالمسؤولين؟؟
وبعدين وياهم؟؟
كل واحد من يمسك له كرسي بالوزارة يظن انه صار رئيس دولة!!
وحتى رؤساء الدول الفاهمة ما يسوون سواته!
تكبر على العالم ..
تسلط ماله مثيل!!
يعتقدون ان الكل تحت أمرهم ..
وكلامهم هو الجميل!!
تطلب تشوفه لأمر هام ..
جوابه لك
"بعدين بعدين"!!
انزين ..
مانبي نشوف طلته البهية ..
نبي ناخذ منه توقيع نخلص فيه شغلنا ..
ونمشي أمورنا ..
يقول
"تعالوا باجر"!!
ما عندنا شغلة إلا ان نروح ونرد؟؟
وما ورانا الا النطرة والقعدة جدام باب مكتب سيادته
ويا يتكرم ويقابلنا ويخلص شغلنا
والا مزاجه ما يسمح ويقول تعالوا باجر؟؟!!
بذمتكم هالشي صحيح؟؟
متى ينصلح الحال؟؟
متى يتكرمون هالمسؤولين
ويتنازلون عن تكبرهم
وينزلون شوي من برجهم العاجي ..
ويصحى ضميرهم
ويطالعون مصالح الناس وأشغالهم قبل مصالحهم الشخصية اللامنتهية!!
متى؟؟!
تهقون في أمل؟؟
والا الحالة ميؤوس منها؟؟
شنو الحل برايكم؟؟ شلون أخلص شغلي معاهم؟؟! :(
دعواتكم لي بالتوفيق يوم الأحد القادم وينتهي اليوم على خير
وأبشركم بشوفتي لطلة المسؤول البهية!!

هناك 50 تعليقًا:

BookMark يقول...

الحل .. امممم .. ماظنتي في حل عاجل

كل الحلول تركن إلى أجل غير مسمى !!


الله يسهل أمورج .. وتبشرينا بإنجاز المعاملة .. ولا طلته ماتبينها صح ;)

..pen seldom يقول...

أي والله ماالهم حــل ..

شغلهم أنهم - يبطون جبد - الناس اللي توقف خلف أبوابهم لا أكثر ..

ولا حياة ياعزيزتي لمن ينادي ..

الله يوفقك يارب .. وتخلصين أشغالك قريب

:)


صبــآح الورد ؛)

Made n Q8 يقول...

اي هذي سواتهم يعلون قلب الواحد على مايخلصون شغلنا

ولا اذا تكرم و وقعلج الورقه تعالي شوفي النفسية واف واف جنه ضب !! شدعوه عليك طاح حظك

وموفقه ان شاء الله :)

chandal/danchal!! يقول...

موفقة مهندستنا

المشكلة بسكرتارية المسؤول بعد

الله يعينك على التعامل معاهم

Sami يقول...

الله يضع سره في اضعف خلقه ...ما لج غير الفراش البنغالي

نمووول يقول...

الله يعينج ويسهل امورج
مادري نلاقيها من منو ولا من منو ..

(يمهل ولا لهمل)

بـــــقــشة يقول...

الحل اتعرفين احد يمون عليهم وتعالي ساعتها شوفي النفسية شلون تتغير مابين حياج الله وهاذي الساعه لمباركة احنا و\نا نخدم عيالنا :))!!

Om Hrooby يقول...

والله مع العقلية السطحية اللي عندهم ..يحسبون انه هالمنصب يعطيهم القوة انهم يستعبدون الناس ويمشونهم على هواهم
الله يهديهم ويصلح حالهم ..

وكلي امرج لله ..وقولي لا إله ألا أنت سبحانك إني كنت من الظالمين
والله المستعان ..وان شالله تخلصين شغلج معاهم

كوني بخير ~

juvebizkit يقول...

والله الحال من بعضه
و هذا الشي متكون من

الافتقار لخدمة الناس + داء العظمه

ان الانسان بهالديرة إذا وصل ما يشوف اللي تحته ،،، الكلام ينطبق على البعض طبعا

لكن الحمدالله رب العالمين المتوكلين عليه قبل غيره

توكلي على الله و انشالله بتوصلين لمبتغاج

شاي الضحى يقول...

كل واحد يصير مسئول لازم يذل الموظفين

الله كريم


والله يوفقج :)

روميـه فهد يقول...

تعطيل أمور المراجعين .. مضايقة الموظفين .. "تسلّط" له اول ماله آخر..
تعطيل العمل بـ قرارات تنافسية.. بيروقراطية مو طبيعية ! .

يعينج الله ياوخيتي يعينج الله ..

دمتِ لمن تحبي...

Dreama | R يقول...

كلّن بهمه شقا الليلة
:)

صمت البوح يقول...

مااظن شي حل


وجان حصلتي حل خبرينا !!

Q8 TeaCHeR يقول...

شنســـوي ؟
لما الناس تحس بالمسؤولية الحقيقية وان احنـــا راح نتحاســـــــب على هالوقت وعلى هالمعــــاش راح نعامل النـــاس عدل وراح نجابل وظايفنا عدل :)
اتوقع هذا اللي ناقصهــــم محاسبـــه داخليه وضمير حـــــــي

Engineer A يقول...

BookMark

الله يسلمج وفعلاً مافي حل عاجل لهالحالة المتفشية عندنا!

الله المستعان

الحمدلله ان اموري اخلصت ومشت مثل ما ابي والله يسهل البقية :)

Engineer A يقول...

pen seldom

والله بالأيام اللي طافت شفت "عجب العجاب" !!

شاكرة لج مرورج الرقيق :)

Engineer A يقول...

Made n Q8

صج اني نطرت لين الساعة 4 ونص العصر على ما توقعت ورقتي بس شاسوي؟ اذا ما سويت جذي ما اخلص!!

تسلمين على التواجد :)

Engineer A يقول...

chandal/danchal!!!


السكرتاريه سوالف!!

بس لا تخافين قعدت وبسطت عندهم لي العصر على ما وقع لي المسؤول الورقة! :)

مشكلة المسؤولين انهم ما يداومون خلال ساعات الدوام.. لا يداومون بعد ساعات العمل الرسمية ووظيفتنا نصيدهم! :)

Engineer A يقول...

Sami

ماكو الا جذي الظاهر!

شاكرة لك مرورك :)

Engineer A يقول...

نمووول


الله يسلمك والحمدلله تسهلت الأمور بفضل رب العالمين .. صج بعد كفاح دام شهر!! بس الحمدلله خلصنا :)

Engineer A يقول...

بقشه


والله صاجه جدامي صارت أوراقي داخل تنتظر التوقيع ويدخل واحد "معروف" من غير استئذان ويطلع واوراقه خالصه بظرف 5 دقايق !!


الله كريم :)

Engineer A يقول...

Om Harooby

الله يجزاج خير والحمدلله اني موكله أمري لله واهو اللي بيسهل لي أموري وايسرها..

تسلمين على التواجد الطيب :)

Engineer A يقول...

juvebizkit

الحمدلله على كل حال وهذا حال البلد من زمان الناس وصلت القمر .. الاستنساخ .. الانترنت وعالم متقدمه .. وربعنا للحين "للخلف در" !

انا تعاملت مع شركات خاصة بالكويت اجنبية فرق فرق فرق بينها وبين دوائرنا الحكومية! << لا تعليق بصراحة

والله كريم:)

Engineer A يقول...

شاي الضحى

الظاهر ربعنا فاهمين معنى "مسؤول" بالغلط! :)

الله كريم

Engineer A يقول...

رومية فهد

كلامج عدل ،، وشنسوي محد يبي يعطي من عمره شوي ويغير من نفسه للأفضل!

الله المستعان

ومشكورة على التواجد والدعوات الطيبة :)

Engineer A يقول...

Dreama | R


اي والله كلن بقلبه شقى الليله :)

تسلمين على التواجد عزيزتي

Engineer A يقول...

صمت البوح


والله في حل بس محد يبي يطبقه!

من تواضع لله رفعه

والتكبر والنفس الشينه والتسلط مو فخر ولا برستيج حلو!


بيدهم يرتبون امورهم ويساعدون العالم بكل طيبه من غير نرجسيه..

ابسط من هالحل شنو؟؟

معاملات الناس "القانونية" ليش ما تمشي بسرعه؟؟

ليش يمشونها لهم بعد ما يطلعونها من جبدهم؟؟

خليها على الله :)

Engineer A يقول...

Q8 Teacher

ان شاءالله يكون صوتج وصل ونلقى من يسمع! :)

أشكر لج تواجدج الطيب

دمتي بخير :)

q8-lawyer يقول...

حسبالهم نطرةونأجيل أشغال الأوادم
تزيد من هيبتهم:(


((لو دامت لغيرك مااتصلت إليك))

المحامي يقول...

قيل لعبدالله بن بسام ان فلانا غيرته الإمارة،فقال:إذا ولي الرجل ولاية فرآها أكثر منه تغير ، وإذا ولي ولاية يري أنه أكثر منها لم يتغير

المشكلة أن الدولة تعطي مناصب لأشخاص لا يصلحون رعاة غنم ..

الحمد لله هالنوعيات أجيد التعامل معها ، وقد وجدت أن الأسلوب "الحاد الجاف" هو الأسلوب الأمثل معهم ، لكن يحتاج تمرس وفترة تدريبية :)

مـي يقول...

زيارة أولى لمدونتك!!

:)

بعيدا عن المسؤولين وحالتهم الميؤوس منها !!
وحتى ما أكدر صباحي :) وصباحك..

،،
عجبتني كلماتك في ( من أنا )

ms.sms يقول...

صاجه بكل كلمه ..
اهو يوم كان موظف كان يحب يتبهدل هالبهدله ..
جنه فيهم نقص ....
لاحول ولا قوة الا بالله .. ان شاء الله تشوفينه وتخلصين ..
دمتي بانجاز

Fishah يقول...

صباح الخير

مااالهم حل .. انا اكثر وحده يمكن عانيت من المسئولين اللي من هالنوعيه المتشيحطه واللي مستغلين مكانهم وما منهم فايده :<

الله يعين :)

ba6alah يقول...

yala shetsaween hathy dertech ba3ad

اجتماعي يقول...

من صجج تنطرين حل؟
صدقيني بتتعبين من النطرة ..

إذا شرطي بو خيوط ..
يحسب نفسه رئيس دولة ..

عيل المدير شنو تتوقعين يكون !!

بشري شصار وياج ؟

نبضُ الأدب يقول...

ايييييه .. اللي عمره ما تبخر .. تبخر واحترق =/

الله يصلح الحال !

موفقة مهندستنا .. عسى الله يسهل لج أمورج ويفتح عليج =)

حَافِـيَةُ الَقَدمَيّـنْ ولِبَاسِي المَطـرْ يقول...

اختفيتي مره وحده =|

حتى امس امي تقولي تعالي
إنجنيرا اختفت لا ترد عليج ولا تنزل شي

إنشالله تكونين بخير ومجرد مشاغل :*

أحمد الحيدر يقول...

انشالله .. يا رب .. تتحرر فلسطين :)

Engineer A يقول...

q8-lawyer

صحيح ، كل واحد فيهم من يصير مسؤول يعتقد انه أصبح الكل في الكل والبقية من حوله "لاشيء"!

طبعاً "البعض" وليس الكل!

ودي وتقديري :)

Engineer A يقول...

المحامي

بالنسبة لي لقيت أن أنسب حل للتعامل مع هالفئة هو بكثرة "الزن" والحنه! لين أعل جبدهم وأفقع مرارتهم من حنتي ويعطوني بالأخير اللي أبيه :)

كل التقدير

Engineer A يقول...

مي

نورتي المدونة ويسعدني مرورج الكريم وتشريفج لصفحاتي المتواضعة،
وان شاءالله يارب ما تكون آخر زيارة لج :)

كل التقدير

Engineer A يقول...

ms. sms

كيف حالج عزيزتي؟ طمنيني على صحتج الحين ان شاءالله أفضل؟

بالنسبة لموضوعي الحمدلله تم لي ما أردت وكل شي كان على خير ما يرام :)

كل الود

Engineer A يقول...

Fishah

أحسن شي ان الواحد يظل يطالب بحقه ومايتنازل عنه بسهوله لين يوصل للي يبيه:)

كل التوفيق

Engineer A يقول...

ba6alah

والله بودي وبخاطري إني أتأمل خير من هالديرة بس مع الأسف اللي قاعدة أشوفه فيها بعيد كل البعد عن الأمل والتفاؤل!

الله المستعان

كل التقدير

Engineer A يقول...

اجتماعي

مو نوعي اللي استسلم بسهوله:)

الحمدلله تم لي ما أردت والتفاصيل في البوست القادم بإذن الله

كل التقدير

Engineer A يقول...

نبض الأدب

الله يسلمج وكل التوفيق لج يارب انتي بعد ..

ودي واحترامي

Engineer A يقول...

حافية القدمين ولباسي المطر

تسلمين عزيزتي وكل التقدير والمحبة للوالدة الفاضلة والله يخليها لج يارب ..

مشكورين على السؤال والله وتفاصيل اختفائي في البوست القادم بإذن الله :)

سلامي لج وللوالدة

كل التقدير

Engineer A يقول...

أحمد الحيدر

ان شاءالله يارب تتحرر ..

وبالنسبة لي مشكلتي مع قوات التحالف والكونغرس انحلت ولله الحمد! :)

كل الود

thegameq8 يقول...

شنو الحل مع هالمسؤولين؟؟
وبعدين وياهم؟؟
كل واحد من يمسك له كرسي بالوزارة يظن انه صار رئيس دولة!!
وحتى رؤساء الدول الفاهمة ما يسوون سواته!
وكل واحد عنده مدونه وكتب له مقالين يظن انه صار أحسن كاتب بالشرق الأوسط

صراحه اجمل مافي المدونه التعريف الخاص من أنا

تحيه ولي عوده

Engineer A يقول...

thegameq8

شكراً على التواجد الرائع وبانتظار عودتكم عن قريب :)

كل الود