تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







الخميس، 3 ديسمبر 2009

الصحة وسياسة " حفرة سليمة" !!!







تعرضت في الآونة الأخيرة لوعكة صحية أبقتني في المنزل لأيام طويلة "اشدعوة عاد أنا صحبة مع الطلعة" ! المهم كنت أعاني من الأعراض التالية:



- ارتفاع شديد بدرجة الحرارة



- رشح وملحقات الإنفلونزا



- كحة واللذي منه!






طبعاً توجهت إلى أقرب "مركز طبي"، وشرحت للدكتور حالتي ..


أول ماشاف درجة حرارتي مرتفعة .. قالي :"معاكي حرارة!" << أعلم تماماً بأن درجة حرارتي مرتفعة وهي السبب الرئيسي لمجيئي إلى "المستوصف" لأني أكره رائحة المستشفيات والأدوية!!


الدكتور: "عندك صعوبه بالتنفس؟"


أنا: " لا دكتور!"


الدكتور: " ماشي.."


وأخذ يطقطق بجهاز الكومبيوتر الذي أمامه وهو يتحدث مع مكتب الخدم بخصوص خادمته الهاربة و "مخليني ملطوعة وأفح من الحرارة"!!



وضع سماعة الهاتف المحمول أخيراً .. التفت ناحيتي وقال: " أنا كتبت ليكي داوا كوحه .. وباندول تاخديه 4 مرات عند اللزوم .. وكمان حديكي "تاميفلو"!"


أنا: نـــــــــــــــــــــــــــــــــــــــعــــم؟؟؟!!!!!!! تاميفلو؟؟ ليـــــــــــــــــــــش؟!!


الدكتور: ما تخفيش ده مضاد عادي!!


أنا: أدري دكتور انه مضاد ، بس على أي أساس تصرفه لي وأنا مافيني H1N1 ؟ شلون تعطيني إياه من غير ما أسوي تحليل؟!


الدكتور: ما الوزارة خلاص منعت التحليل!


أنا: يعني شنو منعت التحليل؟ شلون الواحد يعرف إذا كان مصاب وإلا لا؟!


الدكتور: ما هوما ألولنا ..لو شاكك .. إدي !


أنا: شنو لو شاكك إدي؟؟ لنفرض إنك شكيت إن المريض مصاب و عطيته التاميفلو وطلع سليم مافيه المرض؟؟

الدكتور: عادي ده مضاد .. مش حيضره!

أنا: آسفه دكتور .. أنا ماراح آخذ المضاد .. أنا أعرف نفسي شوية برد وبيروحون! << حدي تصرقعت!

الدكتور: براحتك!


خرجت من المركز الطبي وأنا "حدي مغلقه" * .. توجهت لأقرب مختبر تحاليل .. وقمت بعمل التحاليل اللازمة للكشف عن المرض ولله الحمد "طلعت براءه"!!


ومرت الأيام بسلام إلى أن قرأت خبر في جريدة الرأي الكويتية .. عن طفل كويتي قد تورم وجهه وانتفخ بشكل ملحوظ عند تناوله للتاميفلو الموصوف من قبل الدكتور المعالج في إحدى المراكز الطبية!


تضمن الخبر أن الطفل قد أصيب بالرشح والانفلونزا و الطبيب المعالج قد طبق مبدأ " لو شاكك .. إدي"! وقد صرف الدواء للطفل المسكين على الرغم من عدم إصابته بفايروس الh1n1 وكان نتيجة ذلك ما حدث لوجهه من انتفاخات وتورمات!!


حمدت الله كثيراً لأني لم أسمع كلام الدكتور ولم آخذ الدواء بحجة بأنه "لن يضر" !!

إلى متى تستمر وزارة الصحة بهذا التخبط و استخدام سياسة "حفرة سليمة" في اتخاذها لقراراتها؟؟!

بالمناسبة ..

"لعبة حفرة سليمة" مشهورة جداً في برنامج المسابقات القديم "الحصن" والذي لن يذكره سوى الديناصورات أمثالي!

فكرة البرنامج هي أن مجموعة من المتسابقين يخوضون مغامرات صعبة وتعترضهم عوائق كثيرة وهم في طريقهم لاحتلال "الحصن" ومنها لعبة "حفرة سليمة" وهي عبارة عن مجموعة حفر إثنان منها ملغومتان بوحوش أو محاربين متربصين فيها ينتظرون"من هو حظه سيء" ليقع في حفرهم ويخسروا اللعبة أما البقية الذين يجتازون هذه الحفر الملغومة فهم الناجين والرابحين في المعركة!



وهذا ما يحدث بالضبط مع وزارة الصحة! " لو شاكك .. إدي!" .. فهي كتجربة لديهم إذا كان مصاب وأخذ الدواء فسيشفى .. وانا لم يكن مصاب "فلن يضره شيء" !!



ولا تعليق بعد هذه "القرقه" !!
---------------------------------------------
* مغلقه: (لغير الناطقين بالكويتية) مكتأبه - مزعوجه - صاكه فيني الدنيا!!

هناك 27 تعليقًا:

نمووول يقول...

حمدلله على السلامة

انا مادري متى بتتعدل الرعاية الصحية
ووزارة الصحة بالكويت ..

الحمدلله انج ما خذيتي الدوا لانج واعية
لووو انا جان خذيته وبقول يعني بعرف اكثر من الدكتور بس بعد اليوم اي بعرف اكثر منه زين نبهتينا

الله كريم
يمهل ولا يهمل

ضحكت على الحاشية شرح (مغلقة)
لغير الناطقين بالكويتة

تحياتي

Engineer A يقول...

أعتقد انك أوعى من إنك تاخذ الدوا:)

وللحين عندي أمل ولو ضئيل انه ينصلح حال هالبلد في يومٍ ما!

أسعدني مرورك

dr.tota يقول...

حمدالله ع السلامه..
انتي قاعد تحطين ايدج ع الجرح "جرح الكويت"
الله يحفظها..
العيب مو من الدكتور من الي فوقه.. والا هو شعليه غير ينفذ الاوامر..وياخذ المعاش..
الله يفهمهم.. ويوعيهم..\
وانا اقول ليش تناقص عدد المصابين بالانفلونزا الخنازير..
أثاري مو قاعد يحللون..
والله عجييييبه..

رورو الشخبوطه يقول...

السلام..

سلامات ..

امبيه الدكاتره عندنا ابداع فني :\

و الله يعينه الياهل والحمدالله اللي ماخذيتيه..

ومرسوو..

شحرورة يقول...

انا متفائلة ..


بس افضل مراحعة الطبيب الخاص فهو يخاف على وظيفته أكثر من الحكومي

ساره النومس يقول...

ماتشوفين شر يارب :)

Engineer A يقول...

dr tota


الله يسلمج يارب وأنا ما أقول إلا "يالله يارب لا تقطنا تحت إيدينهم"!

حياج الله :)

Engineer A يقول...

رورو الشخبوطه



والله الإبداع مو في الدكتور إلا في اللي أكبر منه!


معلومة عرفتها توني إن التاميفلو مو مضاد كثر ما اهو مخفف .. وعلى كلام دكتورة إن الطفل الظاهر عنده حساسية علشان جذي صار له جذي .. وأنا أقول حتى لو كان أهو عن حساسية المفروض الطبيب المعالج يعرف هالأمور قبل لا يصرف الدوا وإذا كان سليم أصلاً ليش ياخذ الدوا؟

حياج :)

Engineer A يقول...

شحروره ..

والله أنا أقول بلا طبيب خاص ولا عام ..

والله يعطينا وياكم الصحة والعافية ..

سعيدة بمرورج :)

Engineer A يقول...

طموحة مملوحة


الشر ما اييج يارب ..

تسلمين :)

شاي الضحى يقول...

ما تشوفين شر

وملينه واحنا نتكلم عن الصحه ويلاويها

الله كريم

Catism القطويّة يقول...

"الصحة" تحتاج من يداويها!
سلامات، ومدونة جميلة، سأحرص على متابعتها إن شاء الله. :)

SHOOSH يقول...

أهم شي الإندكس إلي حاطته تحت

:)

Engineer A يقول...

شاي الضحى

الله يسلمج

واي والله ملينا من بلاوي الصحة!

الله كريم :)

Engineer A يقول...

القطوية

اي والله هذا اللي يقولج باب النجار مخلع!!

اتمنى يعجبج ما اكتب من خربشات !

وحياج الله في مدونتي المتواضعه :)

Engineer A يقول...

SHOOSH


أهم شي اعجبج الاندكس P:

كاريكاتير يقول...

اخطر شي لما يصيب الاهمال الوزارات التالية

الداخلية - الصحة - الاشغال - التربية

وما تشوفين شر

jonoon 3aqel يقول...

سلامتك و ما تشوفين شر

اجر و عافية ان شاء الله

===

الصحة و التعليم اهم شيئين في مجتمع ما..

مع ذلك..يبدو و أن بعض الأمور تنحدر للأسوء !!

الله المستعان

الله الله بالشوربة و السوائل..زينة للي حرارتهم مرتفعة..
و لو أخذتيهم " مش هتضر"
يعني حفرة سليمة 100% :)

تحياتي

Engineer A يقول...

كاريكاتيير

الله خير الحافظ .. والله يهدي المسؤولين!

الشر ما اييك :)

Engineer A يقول...

jonoon 3aqel


مايحتاج أجرب أشياء "مش حتضر" .. الحمدلله تعافينا وغدا الشر..

وبلا هالحفر "المو" سليمه:)

أسعدني مرورك ..

7osen يقول...

اولا سلامتج وماتشوفين شر إن شاءالله

ثانياً والله ضحكت على لو شاكك إدي هههههههه

هالأيام الطب عندنا الله يستر منه نادراً ماتلقى طبيب بالمعنى الحقيقي

Engineer A يقول...

7osen


والله المواطن ضاع .. مايدري البلاوي "بتتحدف" عليه من الأطباء والا السسترات والا موظفين الاستعلامات في المستشفيات والا من قلب الصحة؟!

خلها على الله .. شاكرة مرورك :)

chandal/danchal!! يقول...

سلامات وما تشوفين شر

ان شاءالله تكونين احسن الحين؟
.
.
.

الله يهداج برنامج الحصن سويتيه مال ديناصورات؟... عيل ما سمعتي بتيلي ماتش؟

:)
.
.
.

بخصوص وزارة الصحة فتصرفهم سليم وبكل البلدان يصرفون تامفلو بدون ما ينطرون نتيجة التحليل... اذا كانوا شاكين بالانفلوينزا

اختي يحسس الياهل ويتورم احسن من لا يصير مضاعفات لا تحمد عقباها... وياما اخذنا ادوية تحسسنا منها وتشافينا... الجرايد ما وراها الا اخبار ماخوذ خيرها


من واقع تجربة مرت فيها قريبتي مع عيالها... اللي اخذ تامفلو من اول شي مرت عليه خفيفة بس العسر اللي ما تقبل الدوا وايد تعب وطول على ما تشافا

Engineer A يقول...

chandal/ danchal!!

لا ما سمعت عنه :)


وشوفي بالنسبة للصحة مهما كان نوع الدوا لازم الطبيب يسأل المريض قبل لا يصرف أي نوع من الأدوية إذا كان عنده حساسية من دوا معين او اذا كان عنده ربو او أمراض ثانية أو اذا كانت المرأة حامل او ترضع .. وغيرها من هالأمور لأنه يتعامل مع انسان قبل كل شي و مايصير نقول عادي "شوية حساسية" ماراح تضر لأنه الواحد ما يدري شنو تترتب عليه وشخص عن شخص تختلف مناعته و مدى تقبله للدوا ..

وأنا أقول لا تصيرين وزيرة للصحة لأنه شكلج والله أعلم "استجواب" :)

أسعدني مرورج

Unknown يقول...

الســــــــــــــ عليكم ــــــــلام

اول شي ما اتشفيييين شر يا الغاليه، انا بس ودي اقولج شي عن مبدأ (اديلووو ادددي) هذا مو شي جدييييد، تكفين دام اننج من مواليد الدينصورات :) طبعا اكييييييييد لحقتي على الدكاتره اللي (الله يرحمهم) كانوا يفحصون الصدر بالسماعه... و كانوا ياخذون الضغط... و يسدحون المريض على السرير و يطقطقون على المعدة و ملحقاتها و ابرة الحساسيه قبل ابرة البنسلين....الخ على قولة (الست)...(ده كان زمان) و بعدين اغلب الدكاتره الي من هل البلد الشقيق (ثور الله في برسيمه).. و هو لو في خير جان انثبر في بلده...فا لا تلومينه يامعوده زيــــــــن منه صار الحين على قولتهم (up to date) اول بس كان يعر بناموووووووول و اموكساليييين الحييييين اكشخخخخخخخ. خخخخخخ

hurricane

Engineer A يقول...

ههههههههه ضحكتني "اديلووو ادي" ..

الله كريم ..


الشر ما اييك .. تسلم :)

Betty Bob يقول...

أنـا شخصياً و عيالي ما نروح مستوصفات خلاص فقدنـا الأمـل فيهم !!!

آخـر مرة رحت مستوصفنا الأخ الدكتور كويتي و ولد عايلـة طيبة يبي يتغشمر معاي !! من صجه ! قطيعة !! انصدمت و الله بعدها اذا بروح المستوصف حق شغله بسيطةلليهال مثل كحة بس أسأل الكاونتر اذا اهو الي حولوني عليه أو لا .. اذا طلع اهو اخليهم يغيرون الدكتور

هذا غير الدكاترة إلي ما يعرفون شي بالدنيـا غيـر ال ( البندوووول )

حرارة بندول
إسهال بندول
ترجيع بندول
منعفتـه ريولج بندول
واحد يموت بندول

عفيه دوا لوووول

الحمدالله ما خذيتي الدوا ... الله حفظـج


شخبـاري برنامج الحصن .... أذكره و أنـا صغيرة أشـوفه لوووول .. كنت أموت من الضحك على الناس الي يطبون بالحفرة و إلا على حظهم الردي لووول الريال العملاق فيها و تسمعين صرخة الفقير الي طب فيها لووول