تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







الثلاثاء، 16 فبراير 2010

ظواهر غريبة .. موضة جديدة .. نحاسة زائدة .. أم ماذا؟!


لاحظت في الآونة الأخيرة بعض الظواهر الغريبة و"الهبات" العجيبة في مجتمعنا الكويتي المسالم!! وقد أثارت تلك الظواهر دهشتي وجعلتني أتساءل، هل ما يحدث من أمور في مجتمعاتنا صحيح وnormal أم بأني أنا وتفكيري غلط؟!
من الأمور العامة التي لاحظتها ، انتشار كلمة " فديتك/ فديتج" بين أبناء هذا الجيل، لا أعني بكلامي بأن الكلمة بها شيئاً خاطيء أو غريبة على مسامعنا، بل العكس لطالما تميز بها بعض أخواننا في الخليج العربي وخاصة في الإمارات وقطر الشقيقتين لدرجة أنه بمجرد سماعنا لتلك الكلمة يمكننا تمييز جنسية قائلها في الحال.
أما ما يحدث الآن، فهو استخدام الكلمة من قبل شبابنا بمناسبة وغير مناسبة! أصبحت تقال من الكل ولكل من هب ودب!!
وأيضاً لاحظت استخدام كلمات معينة من قبل بعض الأشخاص لاستخدامها أثناء حديثهم مع المحيطين بهم، وتصبح هذه الكلمة "لزمة" تستخدم لفترة معينة وبين كلمة وأخرى لسبب او بدون سبب!! حتى يمل منها قائلها ، أو لأن غيره قد قام باستخدامها كثيراً ولشهرة شبابنا بحبهم للتغييروالتميز ، يقوم بالبحث عن كلمة أخرى جديدة وغريبة و "فلة" لتصبح لزمته القادمة لفترة لا يعلمها إلى الله!
وسؤالي لهؤلاء: لماذا لا يتم استخدام كلمات كويتية قديمة وجميلة كانت تميزنا في زمنٍ ما! لماذا، مادمنا محبين لكل شي جديد وفريد، لا نتميز بهويتنا الكويتية الأصيلة؟ وكلمات أجدادنا الجميلة؟
فلنجرب باختيار احدى الكلمات القديمة (وليجعلوها لزمة ان ارادوا!) ونعيد احيائها وتداولها ليعرفها أبناءنا وأحفادنا وحتى لا تضيع هويتنا الكويتية أكثر في ظل هذه الظروف الراهنة!!
**********************************************
سيدتي، آنستي، طفلتي العزيزة ..
تحية طيبة وبعد ،،،
بعد موضة سكارفات الشماغات الملونة، وأساور العقل المعقدة، والجينزات ذات القصة الرجالية والألوان الصبيانية،
وبعد موضة الشعر القصير جداً
والمشية المسترجلة
ماذا تبقى؟!
أفكر باحضار بضاعة جديدة عبارة عن "قحافي" ملونه، شرايكم؟ تهقون تمشي واربح؟
**********************
في غرفة الاجتماعات
الكل يتحدث بنفس الوقت ،،
هذا يبدي رأيه بصرامة ..
وذاك يصرخ ويتمادى بصراخه من أجل ابداء رأيه متخذاً مبدأ "خذوهم بالصوت"!!
وتلك تتكلم بانكسار .. بصوت مبحوح لا يكاد يسمع.. تهمس لنفسها باقتراحها لحل المشكلة!
وذلك الموظف الهندي يتحدث بانجليزية ذات لكنة هندية مبدياً اقتراحاً مناسباً وحلاً صائباً
ليسكته زميلة العربي ويطلب منه عدم التحدث وابداء المعلومات!!
بحجة "بأن تلك مشكلتهم، وهم من عليهم حلها، وليس نحن!!"
وأنا أراقب الوضع بصمت واندهاش!!
لماذا تعاملنا مع بعضنا البعض يتم بالصراخ؟
أليس هناك أسلوب أكثر حضارة وأرقى في التعامل؟
أين احترام آراء الغير التي ندعيها؟! لماذا لا نعطي الآخرين فرصة لنسمع منهم؟
ولماذا نشاهد "هذه النحاسة" بين الأقسام المختلفة في بعض الوزارات؟
لماذا لا نضع مصلحة العمل ومصلحة الكويت بالدرجة الأولى؟!
اجتماع اصابني بالاحباط والحزن
هل تعرفون طبيب نفسي شاطر تنصحوني به؟!
؛؛؛؛؛
؛؛؛؛
؛؛
؛
كنتم مع بعض من دردشتي ، هذرتي، وسوالفي مع نفسي أمام المرآة!!

هناك 68 تعليقًا:

7osen يقول...

بوست حلوو

شنو ما احب هذي الكلمة "فديتك" أحسها تبط الجبد هههه

وأعتقدإن الناس إللي تتكلم مع بعض في وقت واحد مايكون عندها القدرة على التطوير والابتكار لأن من أهم خطوات البناء والعمل الاستماع والنقاش الهادي المتبادل

تصدقين عاد أنا مو مؤمن بالطبيب النفسي
أحس مافي طبيب نفسي ممكن يمنح الشفاء ههه مادري ليش

رورو الشخبوطه يقول...

السلام..

ماحب الكلمات الدخيله ع لهجتنا سواء من لهجات خليجيه او لغات 2..

وسالفة الموضه الرجوليه منزلين جاكيت سبورت جنه بشت خخخ..

ومرسي..

شاي الضحى يقول...

كل فتره يهبون بكلمه مو هذا المهم

الي ابي اعرفه شلون تنتشر الكلمه بلمح البصر بين الشباب الشابات او بالاصح بالمجتمع الكويتي كله

ورمضان الي وراه على طول تشوفون المسلسلات بعد يقولون نفس الكلمات !!

بعد قبل ماكو بلاك بيري لوول

واذا الكل قال الكلمه ملوا منها وغيروها وهذي حالتهم

جاكيت البشت ورتني اياه رورو لا يطوفج بييبلج واحد هههههههههه

شكرا :)

المحامي يقول...

أغلب الظواهر التي تفضلتي بذكرها تؤكد حقيقة تفشي الأمراض النفسية في المجتمع .. فالشخص الذي يصطنع ألفاظ أو البنات الي يلبسون شماغ يعانون من خواء داخلي وعقدة نقص فيعوضون النقص بكلمات مصطنعة أو شماغ ، والشخص الي يصارخ قد يعاني من البارانويا أو الانفصام ، وأنا شخصيا تعاملت مع هذه الأصناف وشخصت حالات كثيرة واطلعت على أعراض هذه الأمراض فوجدت الكثير يعاني منها ، وقد قمت بدور الطبيب النفسي وعالجت الكثير بأساليبي الخاصة :)


*بالنسة لمشروع القحافي بادخل بشراكه معاج ولي النصف ولا تدرين للذكر مثل حظ الانثيين :)

*عاد اختي ماستر علم نفس إذا تبين استشارات قولي لي :) ، بس الاستشارات النفسية بفلوس مو مثل الاستشارات القانونية المجانية ... ولا تدرين كلهم ببلاش :)

Seldompen يقول...

.. مساء الخير

=)

بصـراحه مو بس عندكم في الكويت , حتى عندنا في السعوديه ,, كلمه والثانيه قالو " يو فديتج "
ويـا مكثر اللزمـات اللي يمسكونها مثل ما قلتي , فتره وتنتهي ..

تبين الصج , أنا أحيـانا أتكلم كويتي ؛) .. مو جنب الناس , بس بيني وبين نفسي ..

...

أي تربحــين .. وإذا ماربحتي في الكويت , تعالي السعوديه وفي مجمع العثيم خصوصا وأضمن لك أنا الربح :|

...


بإختصـار .. العـرب لايملكون أسلوب " حقيقي " في الحوار ..

البعض وليس الكل , ولكن الأغلبيه تطقى على البقية ..

...

وأنـا أختك , إذا لقيتي واحد ينصحون فيه , دليني عليه ..

والله يشافينا ويشافيك يارب ..

تـرى جد , تتسائلين ,, أهم صح ؟!

وإلا أنـا ؟!

إذا جا هذا السؤال في بالي من بعض التصرفات .. تجيني حاله :/

بس شنقول ..

" صبَــر اللهم قلبي " وقلبكِ وقلوب كل من يفكر نفس تفكيرنا ..


أرق التحـايا لكِ ..

chandal/danchal!! يقول...

مدونتك احسن طبيب نفسي

انسدحي على الشيزلونق وحطي الlap tray o fog-ha el laptop واطلقي العنان لتحلطمج

:)))


مع احترامي لكل من يقول فديتج بس صج ما اشتهي الكلمة




ابي قحفيتين حق بناتي

:p

BookMark يقول...

جميل اقتراحك لإحياء لهجتنا التي شارفت على الاندثار !
يالله ابدي انتي عطينا كلمة واحنا نسويها لزمة ^_^
**
ييبي راح تمشي بضاعتج بدون أدنى شك! @@
**
لاتقلبين المواجع .. الحال هذا لازم ينصلح ويتغير بس متى ماادري .. الله كريم
***

بوست لطيف وظريف ^_^ يعطيج العافية

قارئه فـ حسب,, يقول...

على سالفة الكلمة اي وايد و بعد كلمة مو صج و امبييييي لووول..

و سالفة البويات عادي استقبلي ان لم تستح فافعل ما شئت

و اخر سالفة الله يهدي الجميع..~

^_^

Sami يقول...

خفي علينا شوي ..كل موضوع اهم من الثاني ..اتفق معاج ٢٠٠٪ ...و لا سالفة فديتج ..وايد اسمعها بالاذاعه و بالتلفزيون ..وايد تنرفزني .
حلاته يستنسخون الزين ..و يوزعونها على القنوات الحكوميه و الخاصه ..تكون رقابه على لهجتنا من تلوثها باللهجات الدخيله .

سمو الأميرهـ ..ツ يقول...

امممممم ..

صح ... انا أحيانا إذا أبي أقول" ماشي" .. أقول" ماكو" .. ويعلقون علي ..اممم أحيانا الكلمة تعلق ع لسانا لا إراديا


---------

من ناحية بتربحين ..بتربحين .. بس ما أوصييج عطيني نسبة من الأربااح :d لوووول

أنا ما أحب مثل هالموضة .. أحس الكل يلبس ويحط مثل هالأشيا وجنه يونيفورم
:\

------------------


بووست رااائع عزيزتي إنجنيير

:)


سلمت يمنااج

تحيااتي

ساره النومس يقول...

لوووول عادي انا وايد اقولها لوووول


فديت خشمج والله

Antonio يقول...

والله يابش مهندشا كلامج صحيح 100%

أنا عن نفسي ملاحظ تداول هذه الكلمات الجديدة بشكل غريب ايضا
"فديتك" "فله" " شنو نظامك" "سكبو" يعني سكب (قول بولابس) ، "مرحب الساع" امراتية طبعا .

كلمات كثيرة يحب الشباب استخدامها فقط للتميز .. والله يهديهم ويهدينا معاهم ، الي ماله أول ماله تالي يبا.

أما الموضوع الثاني فالله يستر علينا وعلى بناتنا وبنات المسلمين ويهديهم ويحفظهم .

والموضوع الثالث أكيد راح تتضايقين منه لأن باختصار " اجتمعوا ليختلفوا فتفقوا الا يجتمعوا".

وهذه المصيبة عدم معرفة المشكلة وكيفية وضع حل لها لتحقق الهدف المطلوب . ابسط انواع الادراة والاجتماع الناجح .

يا زينج يابش مهندسا ويازين سوالفج والله مو بس انتي تعانين من هالشغلات حالنا من حالج ما نقول الله كريم والله يوفقنا لما يحبه ويرضاه .

دمتي وبانتظارج دائما :)
احترامي

Princess Sarah يقول...

آآه يا مهندسة !
يا ريتك أطلتي هذه الفضفضة
و استرسلتِ في تسطير المعاناة ..

شكثر تغيروا الناس ؟!
مادري .. تغيروا واايد وايد
نسوا البساطة و القناعة

و الكل صار يبي يلبس قنـاع الغرور
و "الفشخرة " الكذابة ..
الكل يبي يمد ريوله امتاار و امياال ، اطول من لحافه بكثير !

:

آآه < للمرة الثانية !
بس السيدات و الآنسات حاشتهم عدوى؟
حتى الشباب و الصبيان .. تغيروا و تلونوا ..

صارت طبايعهم غريبة .. و لزماتهم اغرب !!
و ياريتها بس على كلمة فديتك \ فديتج !!
حتى يا قلبي و يا حياتي و يا عمري و يا جبدي و يا نخاعي !!! :\

شنو هذا ؟!
اي احد من الناس يصير قلبي و حياتي و عمري .. ماكو وزن او قيمة لأي كلمة
و لأي معنى ؟!

عيل لا نستغرب اذا كل شي فقد وزنه و قيمته

الحديث يطووول و المعاناة لا تنتهي
بس احنا لازم نظل على اصرارنا .. و اتمنى اتمنى .. إن هذي مجرد ازمة و بـ تعدي :( :\

و ابطل اشوف مسلسلات قديمة و اوبريتات اقدم باليوتيوب .. و انا في حالة حنيــن عميق :(

مهندستنا .. شكراً من القلب
ايدج على الجرح تماماً .. يخليج ربي

كل الود

:

صمت البوح يقول...

هيه والله صدقتي

بس كلمة فديتج من زمااان اقولها..طبعا مب حق من هب ودب لالا بس اللي لهم غلا

....
اما سالفة البنات واللي يلبسنه
اووف مبدعات عندنا البويات

حدث ولا حرج ..اما ع طاري القحافي..اممم قصدج نعول الرياييل صح؟؟!
اذا كان صح فقولج ..عندنا يلبسونهن بس مب ملونات لووول
جان يبتيها البضاعه امره بيمشي سوقها

..

اما عطاري الصريخ ..تعودنا ماتمشي الكلمه الا بصريخ ماشي واحد ثنين لووول

ويسلموو ع البوست الغاوي

aL-NooR . يقول...

يا حلو فضفضة المرآة
والله حتى انا ما احب كلمة فديتج/ك
مادري ليش بس تبط الجبد يمكن
تهقين ليش ؟

و على الهبات المشكلة بمجتمعنا كل شي وارد ..يعني تلاقين الوحدة /الواحد
تهب بشي لايق مو لايق مو هامها اهم شي انها لبسته ولا صار عندها و تشوفين بنات الكويت نموذج واحد مع فرق الملامح
الا ان الحين صارت عممليات التجميل بهدف و بدون هدف

:)
صبحج الله بالخير و التحلطم
عذريني قرقت وايد
p;

*************************

الزين يقول...

صباح الخير

موضوعج هذا مؤرقني من زمان
وهذا اللي خلاني اكتب قصه من التراث
واطعمها بمفرداتنا الجميله والتي تحمل عبق كويت الماضي
احاول احيي ما اندثر ونسي
واجملها على اسماء وفي عيون القراء

مدري شفيهم عيالنا عندهم ازمة هوية
مو عاجبهم اللي عندهم فصاروا يستوردون مفردات من الخليج
او الكلمات الإنجليزية
او حتى الشامية
اشكالهم تشوفينا تقولين طالعين من مجلة فاشن فلبينية من القصات اللوعه
مافيها حلاة
بس شعر منتف
واشكال مايعه

الولد مو عاجبه ان ولد يبي يصير بنت
والبنت مو عاجبها انها بنت تبي تصير ولد

ازمة هوية وتحتاج دراسه
لما اقعد في قهوة ويكون يمي شلة بنات
كلامهم بالإنجليزي اكثر من العربي
واذا تكلموا بلغتهم الأم الكلام عوي
حليمة وربعها طاغين عليهم

المشكله حتى مذيعاتنا اللي يمثلون الكويت كدولة عبر الإعلام
كلامهم مقلب
ما تعرفين من وين يايه

ياحلو مذيعات اول
امل عبدالله
ومنى طالب
طبيعيات واخذي منهم الكلام اللي يحمل ريحة الكويت

الحين الوجيه متفخه والحواجب مشنقله وكل شي زايدينا
الرموش
الشعر
ال .....

وضع محزن
وضع مخزي
وضع يعور القلب


اذا القحافي على علم الكويت ابي 6 درازن
حق العيد الوطني بوزعهم صدقه
:))

الاوركيده يقول...

يا صباح الخير

اي والله صدقتي ما أحب الكلمة ولما يقولونها اتنرفز اقولهم تكلمو كويتي حتى اللغة تبون تنسونها
:)

انشاء الله ماتزورين الطبيب النفسي

:*

jonoon 3aqel يقول...

مممم

الغلط مو ف الكلمة نفس ما قلتي... الغلط في مدى انتشارها و في أنها تنقال لكل من هب و دب..
في بيتنا.. نستعمل فديتك..و حبيبي و حبيبتي خاصة مع ليهال وايد (و أنا بحكم اني ادرس برا..مدلعيني يعني)..
لكن ما تطلع من هذا المحيط لأن ببساطة..تفقد الكلمة معناها و مغزاها..
==

ليش مفاهيم بسيطة..و مبادئ يتفق عليها الكل...لا يتم التعامل بها!!!!!


رفيجي يقول دايما " احنا شعب ما تحضرنا الا حديثا ( يدوب من 40-50 سنه) ف للحين ما هذبتنا الحضارة)
اتفق معاه..
و يمكن هذا هو جواب بعض تساؤلاتك..


====
هههههه
ضحكتني "سيداتي انساتي و ابنتي العزيزه"

الله يصلح حالها و يبلغك فيها كل خير


تحياتي

Engineer A يقول...

7osen

انا اعتراي مو على كلمة فديتك لا والله حشى! اعتراضي على اللي قاعدين يقولونها، يعني هالكلمة مو كويتية ليش الكل هب فيها فجأة؟ اهل الامارات او قطر لما يقولونها فمن حقهم لأنها كلمتهم الكويتي ليش هب فيها؟ :)


وفعلاً كلامك بخصوص عدم قدرة البعض على التطوير والابتكار وافتقارهم للاستماع لغيرهم وتبادل معاهم حوار راقي..

والله شكله مافي حتى أطبة نفسيين سنعين الواحد يقدر يعتمد عليهم :)

مشكور على التواجد أخي الكريم

Engineer A يقول...

رورو الشخبوطة

هم جاكيت بشت؟! ما وصلتني الموضة للحين!!


الله يلطف فينا :)

Engineer A يقول...

شاي الضحى

مو بلانا بهالمسلسلات وهالممثلين اللي مع احترامي اغلبهم مو كويتيين ولا يمتون لمجتمعنا بصلة!!
جاكيت بشت حقي؟! عساني ما لبسته خليه لأهله :))

Engineer A يقول...

المحامي

ماعندي مانع تشاركني بمشروع القحافي بس اول شيء بتأكد ربحي حلال والا؟ :)

وتستاهل الضعف اهم شي الربح :))

ومشكور على الاستشارات المجانية، اذا احتجت لاستشارات هندسية لا يردك الا لسانك ،،

مشكور على التواجد الحلو :)

Engineer A يقول...

pen seldom

ارد واقول يا اختي انا اعتراضي مو على الكلمة اذا كانت كويتية او خليجية كلنا واحد يا اختي وانا احيانا استخدم بعض الكلمات العربية والخليجية للتعبير في بعض المواقف ،،

المشكلة اللي صايرة "الهبة" شبابنا وبناتنا الله يحفظهم كل ي عندهم صار على الموضة و"اي شي" " وزوغة" و" امبيه" !!

انا مع تطور العصر بس بالفكر والتطور والرقي بالتعامل مو بشماغ ملون وسلاسل بالرقبة ومشية متكسرة و "وااي امبيه شنو هذا" !!


الله يهديهم يارب :)


وعلى التجارة خلاص "تم" من باجر اسوي طلبية للقحافي الجديدة وانزلها اول شي عندكم بالسعودية والربح بالنصيفة لي ولج :)

Engineer A يقول...

chandal/danchal!!

شنو الوان القحافي اللي تبينهم لجارميش واختها؟ :)))

Engineer A يقول...

BookMark


الكلمات الكويتية الأصيلة حلوة ونسمعها من يداتنا وامهاتنا واقري قصة الزين ماشاءالله تحتوي على كلمات كويتية جميلة معطرة برائحة الماضي الجميل :)

Engineer A يقول...

sarona


مشكورة حبيبتي على مشاركتج ودوم منورتني يارب :)

Engineer A يقول...

Sami

شوف ما يمنع ان لهجتنا الكويتية تأثرت وايد بغيرها من اللجات واللغات مثل الفارسية والهندية والانجليزية قديماً

بس عاد لحد اهني و خلاص المفروض نحافظ على لهجتنا وكلامنا ونستخدم الكلمات القديمة لما نحاجي ربعنا واهلنا واعيالنا ونعتز بلهجتنا اسوة بأشقائنا في دول الخليج اللي يعتزون بلهجاتهم ويتكلمون فيها ..

ويا حلو الزين والله وياحلو كلامها :)

Engineer A يقول...

سمو الأميرهـ

الكل يبي نسبة من الأرباح شكلي باصفى على "ولاشي" :)

حياج الله عزيزتي منورة دوم

Engineer A يقول...

طموحة مملوحة


ههههه حياج الله :)

Engineer A يقول...

Antonio


فعلاً انتشرت الكلمات الدخيلة على مجتمعنا سواء كانت من الخليج او من بلاد الشام او انجليزية او فرنسية بكثرة!!

ليش اشفيها لهجتنا الكويتية؟ شفيه كلام امهاتنا وابهاتنا؟ الله يهديهم يارب

مشكور على التواجد المستمر وناطرين بعد نقرا لك شي يديد عن قريب

دمت بخير :)

Engineer A يقول...

Super Sara

عزيزتي سارة، وايد اسمع كلمات مثل

"زمن اغبر"

"الوقت تغير"

"الزمن الحالي مو مثل الأولي"


والحقيقة ان الزمن اهو الزمن والوقت اهو الوقت ما تغير !!

اللي تغيروا اهم الناس .. النفوس .. الكل يبي نفسه وتهمه نفسه ..

صاروا الناس يعيشون على طاري الفلوس والمادة!! جنه مافي شي بهالدنيا هذي كلها يسوى الا البيزات!!

عيالنا ما يبون يتعبون همهم الموضة .. قصة شعر جديدة .. سيارة فخمة .. ما يهمه بجم وشلون وليش؟ ما يهمه يحافظ عليها، همه بس انه يكشخ فيها جدام ربعة و يغري فيها بنية بشارع الحب!!

ما يهمه اهله اللي اتعبوا وشقوا علشان يسددون قيمة هالسيارة والا قيمة الملابس اللي يلبسها والا اي شي ثاني .. جيل هالوقت

يبي

ويبي


ويبي


مو مهم شلون يحصل اللي يبيه، المهم يحصله وبس!!

وما يبي يتعب علشان يوصل لشي يبيه!

آه << مني هالمرة !

موضوع طويل وأعيز وانا اتحجى فيها ولا راح اقدر اوفيه قدره!

حياج الله دوم عزيزتي ودمتي بخير يارب

Engineer A يقول...

صمت البوح

عزيزتي انتي لما تستخدمين كلمة "فديتك/ فديتج" هذي لهجتج هويتج الشخصية ويحق لج تتكلمين فيها ،، المشكلة عندنا بالكويت ان الشباب همه الوحيد الحين انه يصير مميز بسوالف "تافهه" نوعاً ما ما همه يتميز بعلم او معرفة بس همه يتميز ب"لزمة" وكشخة وسكبة! الله يهديهم يارب

وعلى القحافي لوول لا مو نعل :) القحفية اللي يلبسها الريال تحت الغترة علشان تثبتها وما تزلق :))

حياج الله

Engineer A يقول...

aL-Noor

ياحلو سوالفج والله ولا هي قرقة ولا شي .. يسعدني دايماً تواجدج وتعليقج

دمتي بود :)

Engineer A يقول...

الزين

ههههههه ياحلو سوالفج والله

وعلى القحافي على الوان علم الكويت اعتقد في منها الحين في سوق الحريم :))

حياج الله عزيزتي :)

Engineer A يقول...

دمعة المقهور

على الطبيب النفسي الله يبعد عنا امراض العصر يارب ويكافينا شر الجنون :)))

دمتي بالف خير

Engineer A يقول...

jnoon 3aqel

كلمة فديتك/ فديتج لكم ومن لهجتكم فعادي لو تقولونها انا كنت اتكلم عن هبة الكلمات في مجتمعنا الكويتي :)

ويحق لهم يدلعونك مدامك بعيد ومتغرب :)


وعلى سيدتي آنستي ابنتي << المقصود فيها النساء من اجيال مختلفة وبنتي للحين صغيرونه ما وعت على الموضة بعدها :))

دمت بخير

حَافِـيَةُ الَقَدمَيّـنْ ولِبَاسِي المَطـرْ يقول...

زين شرايج تنزلين لنا كل اسبوع
مفردات كويتيه ,

بما إن احنا جيل يعني مو ذاك الزود
مع الكويتي القديم

معني والله اول امس كنت اسوي سيرج عن بعض الكلمات , احب اتعلم

وجان زين تفيدينا , وأجرج على الله p;

وعلى سالفة الطبيب النفسي
روحي حق " بو البطه السوده " إن جان تعرفينه p;

مشكوووره حبيبتي عالبوست

ba6alah يقول...

1st about el lazma ana gerait ketab 3an el kalemat lekuwaiteya el qadema most of it from India or Iran and about el ga7afy good Idea!! lool tha7akteny ., o 3an e7teram el ray wel neqash bedon soraakh lel'asaf elnas gamaw yeqtan3on ena lesrakh ohwa sabeel el eqnaa3 o a3teqed majles el oma akbar methal! thanks for the post

إيلاف يقول...

قبل عدة أيام كان عمي يشكو لنا من التغير الكبير الذي اعترى اللهجة الكويتية والمفردات الغريبة التي باتت تستخدم بكثرة خصوصا من الجيل الجديد

وكان يتكلم بألم , ويعزّي أسباب ذلك , لكثرة الوافدين ومشاهدة المسلسلات وللخلطة الغريبة المُجنّسة !


أما بخصوص - القحافي الملوّنة- فيالها من فكرة ابداعية ^_^

مركبنا يقول...

فديتج حرقتي على جم بوست ((=

بصراحة اكره كلمة تقال لى لسان كويتية

كلش ما تلوق !

ما ترهم لا يمين ولا يسار !

وفجاة تطلع كلمة وما تصير جمله الا اذا تكملت بهل كلمة .. ما ادرى شلون كانوا يتكلمون قبل الهبه ..

اي حوار بين كويتين
عاطيج نماذج ..


اي شئ .. فجاة .. مو صج ... فديتها
وكملى الفراغ

اي شئ لابسه جذية فجاة موصج الالوان فديت الهلاقة
او
اي شئ شاريه كارتير فجاة موصج حلوة فديت الكارتير ..

----

اما الموضه عن جد احاول افهمها بالكويت اليوم الاحمر حلو باجر الاخضر والى تلبس احمر تصير ام الهلاقة ..
قبل ويع السكنى الحين يازينة ..

----

والهندي من صجة بتكلم مع كويتين الكويتي بكل شئ يعرف واحسن من كل خبير ..


طولت بس بوست يابها على الجرح
تسلمين حبيبتي

بدوي - الفحيحيل يقول...

بالنسبة لكلمة ( فديتك ) اللي طايحين فيها ..

أنا بالذات كل ما يقولها لي واحد أضحك و داخل قلبي اقول ( بكيتك )

لسبب بسيط ..

عندنا نحن البدو كلمة ( فديتك ) مستخدمة و بكثرة لكن من قبل النساء فقط لا غير

يعني كلمة نسائية بحتة .. دايم المرأة تستخدمها عند الحديث مع أحد أولادها أو أخوانها

لهذا السبب ( لأنها كلمة نسائية عند البدو ) شباب البدو لو دققتي ما يستخدمونها ومافيه أمل تكون دارجة عندهم هالكلمة ... و اللي طايحين فيها هالأيام هم شباب الحضر فقط لا غير ..

فكل ما واحد في هالأغبياء يقول لي فديتك .. أتذكر .. أمي و نساءنا البدويات بشكل عام :) .. ودي أرد عليه و أقول له .. ليش مو لابس برقع ؟ لووول

Om Hrooby يقول...

حلات الشي ندرة وجوده ...وهذي الكلمات حلوه لكن لما نكثر منها بليا داعي تصير بلا معنى ومانحس فيها

 كل شي ممكن يصير موضة ...انتي خلي وحده تلبس باجر بتشوفين العالم كلها لابسه شراته

متى ماعلا الصوت ضاع المنطق

المشكله هاااي حالة العرب في كل مكان ..يتبعون توافه الامور وينسون المهم ...

Made n Q8 يقول...

فديت صاحبه الموضوع

لوول لا اتغشمر معاج

عادي تعوددنا يتهم فتره على كلمه اي شي و واي انتي والحين مو سج وفديتج والله يستر من الياي!

Engineer A يقول...

حافية القدمين ولباسي المطر


منو الدكتور بو بطة سوده بعد؟ ههه لا ما اعرفه والله :))

Engineer A يقول...

ba6alah

اي انا ادري ان لهجتنا تأثرت بلغات ثانية مثل الفارسية والهندية والانجليزية .. بس القصد "هبة الشباب" بكلمة معينة لها معنى او مالها المهم تصير "لزمة" لهم والسلام!

وعلى الصراخ .. الله المستعان :)

مشكور على التواجد وحياك الله

Engineer A يقول...

ايلاف

صحيح ما ذكرته من الاحساس بالألم والتسلخ من الهوية عندما نسمع كلماتنا الجميلة تنسى وتستبدل بكلمات أخرى وتضيع معانيها وقد تذهب بغير رجعه!

مشكورة على التواجد الأول وان شاءالله تدوم هالزيارات الحلوة :)

Engineer A يقول...

مركبنا

سعيدة بتواجدج الأول وتعليقج الحلو ..

واحنا شعب الله يعينه على نفسه :)

ان شاءالله يدوم التواصل الجميل منج دايماً يارب :)

دمتي بخير

Engineer A يقول...

بدوي- الفحيحيل


بغض النظر عن ان يكون قائل هالكلمة بدوي او لا.. "وما كنت اعنيها اهي بالضرورة" وكان قصدي كلمات اخرى بعد،، وانت الله يهداك دخلتنا بدهاليز كبيرة مابي اخوضها لأني ضد التفرقة بأنواعها " حضري - بدوي- سني- شيعي- طويل- قصير- اسمر- احمر- اخضر-" كلنا كويتيين وهذا الأهم..


وماكان له داعي تنعي الغير بالغباء لمجرد قولهم لهالكلمة لأنها مقتصرة مثل ما تفضلت عل النساء البدويات؟ لأن هالكلمة تقال في دول الخليج أيضاً ومن قبل رجال وأول مرة أدري ان في كلمة تقتصر على نساء او رجال؟!

عموما مشكور على المشاركة

ودمت بخير

Engineer A يقول...

om Harooby

شكراً على التواجد والتعليق

اسعدني مرورج

دمتي بخير

Engineer A يقول...

Made n Q8

والله ما يندرى باجر شراح يصير .. والله يلطف فيني يارب

منوره :)

pure-silk يقول...

دائما بوست حلو ككاتبته

دمتي بصحه وعافيه

فاطمــه يقول...

حاسه فيج
انا وحده ماحب الحجي الماصخ الزايد عن حده

يعطيج العافيه وما قصرتي

هناء محمود يقول...

إنتوا كمان بتعانوا من نفس الحاجات إللى بنعانى منها

الموضات الغريبة والكلمات الدخيلة مفيش أكتر منهم

نبضُ الأدب يقول...

هبة اللزمات .. اذبحونا فيها .. كل يومين طالعين لنا بكلمة غريبة عجيبة مادري من أي مجتمع يايـبينها @@

---

الله يصلح حالهم هالبنات .. لا تشوفين أشكالهم بالمدرسة .. اشمئزاز فظيع ><
عسى الله يثبتنا .. و يهديهم

---

الله يعين .. الحين كل شي ما ياخذونه إلا بالصيحة =/

بوست جميل .. كما أنتِ :)

Engineer A يقول...

pure-silk


ودائماً أسعد يتواجدج وتعليقاتج :)

تسلمين

Engineer A يقول...

Fina S aL-Sharekh

الله يعافيج ومشكورة على التعليق والتواجد ..

دمتي بخير

Engineer A يقول...

أم .. بوبه


المشكلة في كل زمان ومكان "عند العرب فقط" الله كريم

منورين يا أهل مصر :)

Engineer A يقول...

نبض الأدب


الله يهديهم يارب و يصلحهم ..

تسلمين على التواجد الرائع وان شاءالله يدوم التواصل

أرق التحية

OpTiMiStiC Ra'3m El'6rooF يقول...

اي لازم في تغيير بالكلماات

اي مجتمع مو بس الكويتي لازم يطرأ عليه التغيير بالكلماات يدخلوون كلماات جديده ويضيفوون ويمكن ايشييلوون

شوفي مصر الحيين الجيل الجديد أو الشباب
عندهم كلماات أكثر بوااااااااااايد من الشباب الكويتي حتى تلاقين الكبار عندهم يستغربون ومايعرفون معنى الكلماات اللي يقولون الجييل الشااب ,, مراات عندهم كلمات اهما مخترعيينهاا سواء بنات او صبياان

وحلوو التغيير انا وحده امل من التكرار بالكلمااات وبكل شي



وقريت بردودج تقولين اول مره ادري انه في كلمه تقتصر على النساء دون الرجال ,, اي اختي في تخيلي رياال يقوول وااااااي اشحلاتج خخخخخ

وايد كلمات الرياييل مايقولونها مخصوصه للحرييم بس موحاضرني الا هالكلمه

وحلوو البووست

اقصوصه يقول...

اممم

للاسف

امور كثيره ومواقف عديده

تؤدي لاصابتنا بالخيبه

التي لا مفر منها في هذا الزمن!

david santos يقول...

Fantastic picture! Congrats. Have a nice day.

Betty Bob يقول...

السـلام عليكم

كـلامج صحيح 100% و سليم
دووم أقول لنفسي ليش يستخدمون هالكلامات ملاقة ؟! و على قولتج دورو لنا من هالكلامـات الكويتية الحلوة و خلونا نستخدمها و يقولونها عيالنا بعدنا

الزبدة الكويت ما عادت الكويت الأولية و الكويتين كلمالا و يندثرون
الله يستر من آخرتهـا

NOIR يقول...

ماشاء الله ما شاء الله ما عرفتج!
NEW LOOK
;P
**
اي و الله صاجه انا اكره هاللزمه اليديده "فديـــتك"
EWWWWWWWWWWWWWW
و هابين اب " انشالله "! بس اكو ناس لي قالوها اتحبينها و الله من محبتج لهم
**
صدقيني الهبه اليديه الكلمات العتيجه ( يعني نياده احنا!)
**
شفت هلقحافي الملونه ابفرنسا و الله
LOOOOOOOOOOOOOL
**
و على البيرقراطيه في الوزاره
عــــــادي " يا ما في السجن مضاليم"

****
SMILE O BE POSITIVE
لا دكاتره و لا شي اسم الله عليج

Engineer A يقول...

Optimistic r'3m el'6roof

شاكرة لج تواجدج واهتمامج ومرورج الحلو

تسلمين وان شاءالله دوم منورتني ..

دمتي بخير

Engineer A يقول...

اقصوصه

الله يبعد عنا الخيبات والعثرات اللهم آمين

شكراً لتواجدج عزيزتي دوم منوره

Engineer A يقول...

david santos

thanks for being here!

:)

Engineer A يقول...

Simply


مشكورة على كل تعليقاتج بمواضيعي الثانية بس بارد عليج اهني فقط نظراً لقدم المواضيع :)

ومعاج حق المفروض الواحد يتمسك بتراثه من أجل مستقبله!

وللحين الكويت بخير طول مافيها ناس واعين ومثقفين ..

تسلمين على التواجد والتعليق عزيزتي :)

Engineer A يقول...

NIOR


الحمدلله على سلامتج .. شلون الشانز؟؟ :)

وعلى القحافي الملونه جان يبتي منهم بضاعه والربح النص بالنص :)

منورة دوم عزيزتي وتسلمين ماقصرتي على هالمشاركة الحلوة :)