تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







الجمعة، 12 مارس 2010

الـــكـــــويـــــت تـــــصــــرخ ... هـــل مــن مــجــــيــــــب ؟؟!!




اليوم كنت خارجة برفقة الأهل لنقضي يوماً جميلاً في الخارج، كنوع من كسر الروتين والتغيير خصوصاً بأن اليوم يصادف عطلة نهاية الإسبوع. وأثناء تجوالنا شاهدنا علماً عملاقاً يرفرف بالسماء في المارينا كريسنت بجانب مارينا مول. أدركنا بأنه العلم الضخم الذي صنع لتسجيل رقماً قياسياً في موسوعة "غينيس" العالمية. بدون تفكير، ولأننا كنا في مزاج رائع ورائق، عرجنا على مواقف السيارات القريبة من المارينا كريسنت للتوقف والتنزه على الواجهة والتقاط بعض الصور للعلم والحدث العالمي "المفترض أن يكون عالمي" !! في البداية لاحظت ازدحام شديد، وتجمهر كبير، لم أندهش فهذا الشيء متوقع بعطل نهايات الإسبوع فمابالكم إذاً بوجود مثل ذلك العلم العملاق؟!

التقطت الصور للعلم ولبعض اليخوت والأمواج، كان الجو رائعاً جداً، تتخلله أنسام الربيع الجميلة المحملة بالفراشات ورائحة النوير. لن أخفي عليكم وجود رائحة مجاري طفيفة عكرت الأجواء قليلاً، ولكن ذلك لم يهم!

أكملنا طريقنا سيراً على الأقدام، كنت سعيدة بالحركة والحياة التي أشاهدها، أطفال يلعبون هنا، آخرون يركبون الدراجات، هناك من يقوم برياضته المفضلة كالعدو والمشي، وهناك من يمارس هوايته بالتصوير، وآخرون بدأوا بممارسة الأنشطة البحرية وركوب القوارب السريعة، ومنهم من أحضر كلابه وحيواناته الأليفة للتنزة كان المنظر ببساطة يعبر عن "الحياة" !!

شعرت في تلك اللحظة بأننا نحن الكويتيون قد ظلمنا أنفسنا وأطفالنا بذهابنا الدائم إلى المجمعات التجارية، والسينيمات، والأماكن الترفيهية المغلقة، في حين يوجد في بلادنا أماكن رائعة للعب الأطفال، والتنزة في الهواء الطلق والتمتع بالأجواء الربيعية، في حين نجد الوافدين هم من يستمتعون بشواطئنا، وواجهاتنا، وحدائقنا. لم أكد انتهي من أفكاري تلك حتى أصدم بالمشاهد اللاحقة!! مناظر أراها للمرة الأولى! مشاهد بشعة، بعيدة كل البعد عن معنى "حضارية" !! لقد قام رواد تلك الشواطيء الجميلة بنشر الفوضى والقاذورات على واجهات البلد الرئيسية. ومازاد الأمر سوءاً هو جلوسهم بأماكن غير مخصصة للجلوس! وقيامهم بالشواء والأكل بغير الأماكن المخصصة!! لا أقول لهم لا تخرجوا ولا تستمتعوا بنزهات الشواء ، ولكن يوجد هناك حدائق عامة يمكنهم القيام بتلك الأنشطة فيها وليس الجلوس على واجهة رئيسية تطل على الشارع، يسيؤون للدولة ويشوهون منظر المكان!

سأصمت .. وأجعل الصور تتكلم وتشرح أكثر ما عجزت أنا وقلمي عن التعبير عنه!












لوحة ارشادية ضاعت ملامحها من جراء شن هجوم شنيع عليها!



أماكن الجلوس وقد تحولت إلى لوحات "غير فنية"




ممنوع السباحة بقالب جديد !!







أدخنة شواء.. إلى أين؟!





لحظة إطلاق العلم بأجواء بعيدة عن الحضارة ، أين غينيس من هذا؟






مواقع استراتيجية للجلوس!!







نارجيلة .. وبساطات .. وقاذورات على العشب!







عدة الشواء وبعض المخلفات










هل هذا منظر حضاري؟!









مخلفاة الحيوانات أو "طعامهم" لا أدري حقاً ملقاة على أرض الواجهة ..يعترض طريق المشاة!
والكثير الكثير من المناظر المؤسفة، والتي تجلب الحزن إلى قلب كل محب لهذا البلد لم أريد أن أضعها لكي لا أؤذيكم وأؤذي نفسي أكثر!!
من المسؤول؟!
البلدية؟
الداخلية؟؟
أين القوانين؟ من يطبقها؟
من يحمي البلد؟
كان هناك ضابطان في الشرطة حاولوا أن يصلحوا من الوضع بصورة غير رسمية لعدم وجود صلاحيات لديهم، ولكن من سيمنعون؟! لا يمكن لشخصين السيطرة على آلاف المتجمعين والمخالفين!!
ما الحل.. أفيدوني؟!!
لمحة غير بريئة: أنصح المسؤولين والمهتمين بإدخال دولة الكويت إلى موسوعة "غينيس" في عدم تطبيق القوانين، وعدم المحافظة على البيئة، وتشويه كل ماهو حضاري وراقي!!









هناك 57 تعليقًا:

7osen يقول...

ولكم باك

الصراحة صحيح الجو وااايد حلو وأحلى شي التنزه على البحر .. لكن مثل ماشفتي هالاشياء موجودة بكل مكان الناس ماعادت تهتم لا بقانون ولا بأداب عامة لأن مافي أحد يطبق القانون الجميع فوقه ...

خليها على الله وتمتعي بالجو قبل لا يشرف الغيض بكل حرارته التي لا تطاق :)

chandal/danchal!! يقول...

عودا حميدا... ولهنا على سواليفك

:)


ما تتصورين شكثر هالموضوع مأزمني... المشكلة يا اختي انها ثقافات شعوب واحنا قاعدين ناخذها من غير ما نحس!... لو مافي عمال نظافة جان علوم!

يعني لافتة كبر اليهد محطوطة يمنع الشوي... والناس مبسطة وحادة الشارع العام حد وطايحينله تشوي!

pure-silk يقول...

الحمدلله على السلامه ...اشتقت لج
كلامج كله عدل والمنظر هذا كريه و خصوصا يوم الجمعه بالذات هالمكان ماقمت اروح له والسبب المناظر المؤذيه الله يعيننا على هالي نشوفه
كالعاده بالكويت ماكو اهتمام ولا التزام
دمتي بصحه وعافيه

الاوركيده يقول...

الصور تعور القلب وصاجة يتعكر يومج كله ، الاسبوع اللي طاف جذي كنت مارة على الدائر السادس صوب ارض المعاض ونفس المنظر قاعدين عند السور ويشوون واليهال يلعبون انا خبري في هالمنظر قبل الغزو لي هالدرجة ما كو أماكن شكثر الحدايق عندنا

:)

المشكله الضعف في القانون وتطبيقة

شاي الضحى يقول...

ولكم باااااك

هالمنظر مر علي وايد كل مره امشي بهالمكان حفظت المناظر بس بالويك اند

اصلا ما تقدرين تمشين من ريحة دخان الشوي

قمت امشي بس بالــ weekdays والعطل ما افكر اروح من هالزحمه والريحه والازعاج

ماكو احد يردعهم

حَافِـيَةُ الَقَدمَيّـنْ ولِبَاسِي المَطـرْ يقول...

شوفي احنل مل نعارض اللي يقعدون عالبحر ويشوون , لأن ايضا هذي حرية
وما اعتقد فيها اتلاف للممتلكات العامه
لكن مثل ما تدرين كل شي له حدود
اذا خرجوا عن نطاق هذا الحد المرسوم
اهني نبدي نعاقبهم

وهذي الكويت , اترك لج البقيه

صمت البوح يقول...

ياهلا والله بالهندسه

غبتي غيبه طويله يالغلا

اشقنا لمواضيعج

وااايد تصير ..الخير عندنا وعندكم

اي مكان حلو ..ننصدم بان اللي اييه يدمره

كانه مكانه الخاص يخربه ولا يحسب حساب حق اللي بيي عقبه


الله يهديهم بس

اول صوره تجنن ^_^
ويسلموو

BookMark يقول...

تصدقين دايما أفكر واقول ليش اهمه _الوافدين_ يستمتعون بهالأماكن واحنا نحرم نفسنا منها ونحصرها بالمجمعات والأماكن المغلقة !
طبعا حياهم الله ويسعدني انهم يرفهون عن نفسهم بأي مكان يبونه .. بس يا غريب كن أديب !!

غياب العقوبات سهل لهم الأمر
ومن أمن العقوبة أساء الأدب

والصور معبرة (جدًا وايد)

ولكم باك :)

غير معرف يقول...

حيالله هالعودة

ولهنا عليج...


وراجعة بقوة ربي بارك...


وصراحة عورتي قلبي بالصور....




ولاتعليق ياباش مهندس..لاتعليق..

Antonio يقول...

يا هلا ومرحبا

عودة سعيدة ان شاء الله :)

آه على نظافة الكويت موضوع في الصميم ، باختصار الواحد على تربيته.

لكن عند انعدام التربية لازم الحكومة تفرض رسوم على كل متجاوز لا يحمل مخلفاته بعد الانتهاء من عملية الشواء.

موضوع جميل نابع من حبك لبيتك الكبير الكويت ولا يسعنا ان نقول الله يحفظها لنا من كل شر صغير او كبير.

موضوع رائع وعودتك اروع :)

يا بش مهندسااااا

Engineer A يقول...

7osen

المشكلة أخوي انه هالمناظر "تسد نفس الواحد" وتخلي الوناسة تطلع من جبده! :)


تسلم على المرور

Engineer A يقول...

chandal/danchal!!


توله عليج العافية وانا ولهت بعد عليكم :)

اتصدقين وأنا أصورهم أشوفهم يطالعوني ويتبوسمون!! يعني قلت يمكن يحسون شوي على دمهم ويدرون ان الله قاعدين يسوونه غلط بس الشغلة كأنها عن عمد!!

الله كريم ..

وشاكرة لج مرورج :)

Engineer A يقول...

pure-silk

تشتاق لج العافية تسلمين :)

واتصدقين انا مو متعودة اطلع واروح اتمشى اهناك لا بالويك اندز ولا غيره، بس مادري شكل العلم شدني وهقيت بأشوف شي يسر لكن طلعت غلطانه :S

خليها على الله :)

Engineer A يقول...

دمعة المقهور

القانون موجود .. المشكلة بالتطبيق والمراقبة!!

تسلمين على المرور

دمتي بخير :)

Engineer A يقول...

شاي الضحى

ذكرتيني قبل لما كنت أمشي على البحر في أيام الاسبوع فعلاً ما كنت أشوف هالمناظر وبالويك اند كنت أشوفهم وأنا بالسيارة يعني من بعيد لي بعيد بس لما تمشيت بينهم انصدمت بصراحة!! ماهقيت باشوف أرجيلة وادخنة شواي وبسطات وقعدات وخيام رحلات ودراجات اليهال وعرباناتهم يعني شي منفر بصراحة!! :(

ومنا للمسؤولين عل وعسى يوصل صوتنا!

Engineer A يقول...

حافية القدمين ولباسي المطر

اختي على الواجهات الرئيسية مموع الشواء والجلوس عل العشب .. حابين يشوون ممكن على شواطيء البحر أو في الحدائق العامة مو على الكورنيش!

في قوانين تمنع هالشي واحنا ما نقولهم لا تستانسون بس في أماكن مخصصة لوناستهم، مو معقولة أمشي على شارع الخليج وأشوف على جوانب الطريج مناظر مقززة!!


في قوانين بس نطالب بالتطبيق، والمهملات والقاذورات للأسف دليل على الإهمال من جميع النواحي ..

شاكرو لج تواجدج وتعليقج اختي الكريمة

دمتي بخير

Engineer A يقول...

صمت البوح


ياهلا فيج يالغلا وتشتاق لج العافية ..

وحاز بخاطري حيل أرجع أكتب بالمدونة بموضوع مثل هذا لكن ماقدرت أسكت والمنظر استفزني :(


الله المستعان

نورتيني :)

Engineer A يقول...

BookMark


ياغريب كن أديب .. وهذي انتي قلتيها من أمن العقوبة أساء الأدب ..

خليها على الله .. وان شاءالله في يوم ما .. ترجع ديرتنا لسابق عهدها!

تسلمين على التواجد عزيزتي

كل الود :)

Engineer A يقول...

سلة ميوه


ياهلا فيج عزيزتي ..

وصج مثل ما قلتي "لا تعليق" ! الواحد يحتار شيقول وشيخلي!

منورة دوم بوجودج

ودي وتقديري :)

Engineer A يقول...

Antonio

اهي ما وقفت بس على التربية لأنه مثل ما تفضلت وقلت ، القوانين تربي بس المشكلة القوانين وينها؟ ومنو يطبقها؟


احنا نحاول نبتدي بنفسنا وبعيالنا ونعلمهم الصح، بس هالوافدين منو يوقفهم عن حدهم؟ ما أعمم بس الغالبية ما يحترمون القوانين ولا عندهم خوف أو رادع << السبب؟!


انعدام الرقابة وعدم تطبيق القوانين بصرامة وكل واحد فيهم واسطته تسبقه!

الله كريم ..

نورت المدونة وسعيدة بتواجدك وتعليقك

كل الود

Sami يقول...

شلونج مع العطله ..عسى بس غسلتي جبدج..:)

اسف على الكلمه ..الشعب العربي وصخ بالاماكن العامه ...لا تقولين لا تعمم ..الاغلبيه جذي

نمووول يقول...

والله صاجة بس الصور تعلل سبب ابتعاد الناس عنها وتركها اغلبه وصخة ومكسرة ومنظرها بشع يغم الواحد ..

اعتقد ان المشكلة مو بالتربية بس المشكلة بالقانون احنا عندنا قانون قوي بس ماعنده ضروووس ما يعض !!

بس شوقتيني ودي اروح البحر :)

قواج الله

رورو الشخبوطه يقول...

ع الاقل لي قعدوا واستانسوا لي خلصوا اقل شي يسونه ينظفو مكانهم :\

ومشكوره ..

اول موضوع مصور اشوفه لج بس جد حلو ماشاءالله ويلامس واقع..

هناء محمود يقول...

متضايقيش أوى كدة تعالى بس عندنا فى مصر وهتعرفوا إنكم مطبقين القانون على الآخر

وإحنا إللى هنكسب فى موسوعة جينيس معلش بقى إحنا الأولى

أخبارك إيه وحشتينى

juvebizkit يقول...

اي والله الصور تعبر ،، من زمان و احنا نشوف و ماكو فايده،، جربوا تمرون يوم الأحد الصبح البحر و تشوفون الزباله عزكم الله اللي ظلت...

الحيوانات عزكم الله بالفطرة ينظفون وراهم،، شلون الانسان اللي الله عطاه العقل يسوي جذي.

مرة في لندن عند محطة الباص،، بمجرد ان اخوي الصغير طار قرطاس كاكاوه برو الدرام يكرم السامع ،، كل اللي واقفين بالمحطه قاموا يخزخزون لي من شاله و قطه بالدرام.

شعب مو طبيعي،، و المشكله ان الاجانب تعلموا منا هالسالفه و هم يخلون شغلهم وراهم. لأن الاجنبي بالعاده يحترم نفسه بالغربه. و احنا بس لي سافرنا برى نركب باصات و نلتزم بالقوانين حتى اتفهها و نخاف،، بس هني انوصخ و نطوف اشارات و نغلط عالشرطة و ما نحترم اللي يمشي بالشارع و ما نحترم الاجنبي.

و آخرتها شوارع كلها قواطي رغوه و زباله حشاكم بعد المسيرات هذاك اليوم. غير اللي صار بعد بالشاب اللي عطاكم عمره الله يرحمه،، و محد يتوب.

شكرا على الموضوع الحلوه

Antonio يقول...

اي والله يا بش مهندسا ..

لو بذلنا الجهد في تربية ابنائنا على احترام الاماكن ونظافتها سوف يصدمون بمن يختلف عنهم تربية بكسر القوانين .

لكن سؤالك المهم هو هل اللوحات عندنا تكفي لاحترام القوانين ؟

عندما نزور الدول الاخرى نحترم هذه اللوحات باعتبارها رجل امن يعطينا التحذير ..


فالمشكلة تتمحور الآن في ضعف تطبيق القوانين التي يجب أن تكون صارمة من خلال فرض الغرامات على من يكسرها على شواطئنا الجميلة ..

واتمنى أن يكون هناك فريق مشترك من حماية البيئة ووزارة الداخلية .

بأن يقوم فريق حماية البيئة بتقديم الرشد والتعليمات لرواد الشواطئ بالاستخدام السليم لها ، ومن يرفض الانصياع يقوم فريق الداخلية بتقديم مخالفة له .

الداخلية كثر ما قصروا الله يكون بعونهم ، لكن فريق حماية البيئة بس شاطرين يرجعون سلحفاة البحر أو يوم واحد بالسنة يشيلون اجياس ونظفون جم مكان !؟ ما اشوف لهم انشطة كلش ؟

المعنى ايد وحده ما تصفق نتمنى التعاون من الجميع واحنا بدورنا نحاول كثر ما نقدر نوضح المنهج الصحيح لكي ينتشر.

والله ولي التوفيق

مشكورة يا بش مهندسا محتاجين هالمواضيع جدا .. وانا مستعد اقدم حلول مو بس اعلق على المشكلة ..

يعطيج العافية

تقبلي

احترامي الكبير

Made n Q8 يقول...

عاد يوم اليمعه وانا طالعه من الصالون مريت عالبحر ولا الناس قاعدين ويشوون والوصخ والحاله حاله انزين شنو يضر لي خلصتوا شلتوا الوصخ!

ماادري يمكن يخافون ينقص شي من عمرهم

سعد المحطب يقول...

انتي كاسرة خاطري ..
كنتي تدرسين بأمريكا ..

بغض النظر عن الاخلاق المنحلة ..

بس يحافظون على الترتيب ..
النظام .. النظافة

وفجأة جك بوم رجعتي الكويت ..
وشفتي هالاشياء ..

ما سمعتي المثل اللي يقول :
"من أمن العقوبة أساء الأدب" ؟؟

يعني ماكو قانون يمنع هالشي ..
ولو في قانون .. فهو غير مفعل

فـ ليش ما يسوون اللي يبونه !!

نبضُ الأدب يقول...

الله المستعان =/



أشكر لج غـيـرتج :*

Step Top يقول...

الصراحه انا من وجهة نظري إن هذي نظافة شخصية

فاللي نشوف بعد مكانه قذز هذا تعكس شخصيته وحاله ببيته

ما يحتاج اهني قانون بس اهو شي تربوي لو كل واحد ربى وتربى ع هالشي جان ماصار اللي صار


اشكــرك من صميم قلبي ع مواضيعك المتميزة =)

Engineer A يقول...

Sami


وين عطلة ياحسرة؟! :(

كنت مشغولة بدورة تدريبية يعني تقدر تقول استراحتي "خلت من الراحة" :)

شاكرة لك مرورك

Engineer A يقول...

نمووووووول

ياحلو البحر والله :) بس مو اللي ينصب فيه "مجاؤي" :s

امم اوافق على جزء من كلامك، في قانون بس مافي تطبيق!! وهالشي بحد ذاته مشكلة كبيرة!

ومع احترامي مو كل الناس متربيين او يعرفون النظافة لأنه لو في تربية جان ما شفنا هالمناظر!

الله المستعان

احترامي وتقديري :)

Engineer A يقول...

رورو الشخبوطة

على قولتج بس شتسوين اذا التربية معدومة؟! اهني لازم تطبق القوانين..


وعلى موضوع الصور .. اممم ترى عندي هواية التصوير بعد وعندي صور وايد اذا تحبين تشوفينهم قوليلي p:

Engineer A يقول...

أم .. بوبه


دي مصر أم الدنيا :)

أنا كويسه الحمدلله إنتي أخبارك ايه؟ وبوبه ازياها؟ :)

Engineer A يقول...

juvebizkit

:)

والله توني أدري انك كويتي وتتكلم "عربي" :) النك نيم مو واضح ولما دخلت المدونة كانت all in english, so I thought u cann't talk in Arabic

ما علينا :)


مشكلة النظافة مو الوحيدة اللي أطرحها بالموضوع .. المشكلة الأكبر عدم احترم القوانين وعدم تطبيقها..

مثل ما ذكرت بالغرب يحترمون القانون ويطبقونه واللي ما يطبقه تتخذ بحقه اجراءات صارمة، فمن جذي نشوفهم شعب يهتم بالنظافة وتطبيق القوانين

وبلندن برأس السنه الشوارع تحولت بليل الساعة 12 الى كارثة!! وصخ تكرم وقراطيس ولويه .. الساعة 6 الصبح بعد أبر شوي مافي ولا قرطاس بالشارع!!

احنا ما نقول لهم لا يستانسون ، بس على الأقل يحترمون الديرة اللي أهم قاعدين فيها ويتركون محلهم نظيف وراهم! وأساساً "ليش القعدة على واجهة رئيسية في حين توجد حدائق عامة وأماكن مخصصه لمثل هالتجمعات؟!

الله كريم ..

تسلم على التواجد وإثراء الموضوع

Engineer A يقول...

Antonio

تسلم على هالرد الحلو وكلامك كله عدل ..

وايد عوامل مسببه لهالمشكله
1. انعدام التربية
2. عدم احترام القوانين وتطبيق اللوائح
3. عدم وجود جهة مسؤولة متابعة
4. انعدام الرقابة وعدم اقرار عقوبات ومخالفات لمرتكبين مثل هالمخالفات

الحل

ان نلقى حل لكل ماذكر! :)

الله المستعان

وألف شكر لك مرة ثانية

Engineer A يقول...

Made'n Q8

الله كريم اختي وياريت لو كل واحد يبدي بنفسه ويسعى بتطبيق القوانين من ذاته وأعتقد الا النظافة مافيها صعوبه ودينا الحنيف حث عليها!

شاكرة لج تواجدج الحلو

نورتي :)

Engineer A يقول...

اجتماعي


صدمتني!!:)

الموضوع ماله علاقة بدراستي برا وعيشي لفترة مع ناس تحترم وتطبق القوانين، ترى على فكرة الأمريكان مو أنظف منا، بس قوانينهم مخليتهم يحافظون على نظافة المكان اللي اهم فيه هذا بالنسبة للنظافة، وتطبيقهم للقانون مو حباً فيه! لا بس لأنهم يدرون انهم اذا ما طبقوه راح يتخالفون ويتغرمون ومافي واسطات تحل لهم مشكلتهم..

اذا انت شايف ان مالنا شغل فيهم ونخليهم يسون اللي يبونه هذي وجهة نظر شخصيةاحترمها بالتأكيد بس ما أوافقك عليها!

بعد لا نوقف اذا الاشارة صارت حمرا وخل نطوف لأن القوانين ما تطبق والواسطات بتشيل عنا أي مخالفة وأرواح الناس تروح!

اذا انت تقدر تمشي وسط هالمناظر وتشوف هالمعاناة فأنا ما أقدر وأنقهر بصراحة على اللي قاعد يصير بالديرة!

واذا قلنا خل كل واحد يسوي اللي يبيه، ما عادت الكويت وعلى الديرة السلام!

حياك الله

Engineer A يقول...

نبض الأدب

اييي الله كريم :)

شاكرة لج مرورج

Engineer A يقول...

Step Top

صح اه الشغلة شخصية وكل انسان وتربيته، بس نبي قانون صارم يطبق بحق هؤلاء معدومين التربية! يعني اسمحولي اذا مافي تربية شنو الحل؟ تصير الديرة من سيء الى أسوأ؟! والا نوجد قوانين لازم تطبق للحد من هالمشكلة؟

وشكراً على التواجد واثراء الموضوع :)

-_- يقول...

و هنا يأتي دور الدولة ..

نور سلطان العيسى يقول...

بجد عور قلبي الموضوع

الله المستعان

بنت سيف

aL-NooR . يقول...

ولكممممممممممم
باااااااااك
توما نور بيتج :**

بس البوست ..يعور القلب
بعني الجو حلو ..و البحر
بس ساعات اصحاب القنون يخافون


بس اهم شي ...رديتي :*

*****************

Om Hrooby يقول...

يا هلا والله بالمهندسة مطوله الغيبة
علومج عساج طيبه ^^

البحر بصراحه مكان حق الهدوء والراحه ولكن الصور للاسف تثبت العكس ..من حقج تزعلين لان اللي يصير بصراحه شي يحز بالنفس ..لكل شي حدود ..الله يكون بعونكم ويحفظ الكويت لاهلها ..ولكن لا تخلين هالاشيا تنسيج شلون تستانسين ^^ ترى الناس لو حصلت عشب على البحر بعد بتشوي فوقه (الحياة حلوه عندهم )

والقانون ماعادت له هالفعالية في ردع الناس لان اللي لازم يطبقون القانون هم اللي يكسرونه يعني (حاميها حراميها)وهذا الشي ما ينطبق على الكويت بس هالموضوع بعد عندنا ..في خلل واضح في النظام ولكن الكل يتغاضى عنه ..

والله المعين

السموحه على الاطاله
دمت بخير ~

ba6alah يقول...

lekuwaitien malhom khelg shay , o jaw leq8 dayman eghbaar o 7ar wayed fa elnas nesat hal amaken

reemas يقول...

مهندستنا العزيزه

المشاغل حرمتنا منج و مكانج مبين
و انا و مدونة ريماس مفتقدين زائرتهم الدائمه و مكانج مبين
شاخبارج ان شالله انتي و العايله الكريمه بخير ؟

حبيت ارحب بعودتج
و بالنسبة للبوست.. الله يعين .. الواحد لو بيكتب عن كل شي غلط يشوفه لما يطلع
يبيلنا مدونات كامله

تحياتي مهندستنا

Engineer A يقول...

Sharm

شكراً على التواجد والتواصل :)

Engineer A يقول...

عزيزة نفس


اتصدقين بعد ما حطيت البوست تحسفت!!

ما كنت أحبكم تشوفون هالجانب بس ماعرفت اسكت قلت لازم اتكلم وصوتي يوصل!

عموماً حياج الله ومشكورة على التواصل

Engineer A يقول...

aL-Noor

تسلمين على التواصل :)

ومشكورة على التواجد نورتي الموضوع :)

Engineer A يقول...

Om Harooby

يا هلا فيج أنا بخير عساج بخير؟ :)
مشكورة على السؤال والتواصل

ومثل ما قلتي عندنا وعندكم خير والله المستعان :)

حياج الله

Engineer A يقول...

ba6alah


مو المهم المكان بقدر ماهو مهم انه يكون نظيف!!

تسلم على التواجد :)

Engineer A يقول...

reemas


دكتورنا القدير


السموحة منك، صج أنا مقصر بحق بعض المدونات وبحق مدونتي بعد! بس الدنيا تلاهي يا دكتور والحياة اشغلتنا بأمورها.. فاعذرني ..

ان شاءالله ارجع اتواصل معاكم وعلى الأخص مدونتك الرقيقة الرومانسية الحالمة:)

كل الود

احترامي وتقديري

Crazy Girl in aGood Way يقول...

صور لمناظر تحز بالنفس والخاطر

شكرا على الصور وان شالله احد يحس ويتصرف :(

ترانســـجندر وأفتخــــــر ،، يقول...

صباح الخير
شيء مؤلم مؤسف بنفس الوقت
والله شي يعور القلب..وبكل صراحة بقول الي بقوله الحين..
نعم الكويـــت بلد الخير وفاتح بابها للكل..
ولكن في ناس ماتسوى..وفس ناس بس تبي تمص دك هالديرة الطيبة وتاخذ من خيراتها وتاكل الخضر واليابس وتمشي..
شوفي اختي انا ما أقول انه الحين كل الخراب بالأماكن العامة هو من قبل المقيمين ولكن أقول 99 بالمية او 90 بالمية نعم من المقيمين!!
لانه الكويتي ترا مهما بخرب قلبه بعوره مو لهدرجة يعني..
اما المقيمين بشكل موطبيعي..
ومو بس بتخريب الأماكن العامة..لا حتى بالشقق والمطاعم وغيره شوفيهم بالماي والكهرباء ولايهمهم..
كم وكـــــــم كافيه ومطعم دخلت الحمام فيه أعزكم الله ورأيت ا"السيفون" مخترب والمـــــــاي حيـــــيل رايــــــح !!
وإنصدمت..وبكذا مرة كنت اكلم وابلغ الموظف او المدير ..ويقول اوكي وكله حجي فاضيي..مرة اعتقد دخلت مطعم وبعد شهر رديت دخلته ونفس الخلل بالحمام اعزكم الله والماااااااي رايح !!
جم ساعة وجم يوم!! والله بغيت اذبح المدير يومها قلت له انت من صجكم من متى جذيي!! وين الجهات الحكومية المسؤولة وين البلدية الي ماتجيك على هالمطاعم وغيره ..!!

والله أختي شوفة عينج انتي وشوفة عينا لما نروح الأماكن العامة والحدايق منو فيها ؟؟اكثرها مقيميــن ..
ومزبليييين لج المكان..انا انسان اقول الحق لو على نفسي..
نعم فيه كويتين وايد نفس يسون الغلط بهالاماكن ولكن قليل,,
لانه خنكون واقعين الكويتي بالله بياخذ عيال ويروح يقعد على الواجهة الي تطل على الشارع فوق الزرع وجدام الرايح والرد بقعد اهله ويقعد يشويي !!
لووووووول اكيــــد لا..
بيستحي اكيد يسويها وبيقعد داخل بالصده وبمكان سنع ويا اهله ويسويها..
وانتوا تعرفون شلون طبع الكويتين
بعدين اغلبهم شاليهات وغيره ..
والله صج نااادر جدا ماشوف عايلة كويتية رايحه تشويي على البحر ..
وانا ما افتي ..
كل واحد على سبيل المثال يروح اي واجهة على البحر فيها حديقة يوم الجمعة ويشوف بعينه ..
والصور عندج فووووووق بعد خير دليل هههه

وفي ناس مقيمين لا حرام محترمين والنعم فيها لكن قليل..كما ذكرت لانه الغالبية مو هامهم شي لانه مو ديرتهم..


تدرون ليش؟
لانه من أمن العقوبة أساء الأدب..
وااااااايد ناس من دول عربية ومابي اذكر من وين تشوفونهم قاعد يهاجرون الى دول اوربية لكن اتحداكم يسون ربع الي يسونه يالكويت من تخريب!!
ليش لانهم عارفين شنو بكون مصيرهم اذا خربوا شي هناك !!
اما هنيي طايحين بربيع وطايحين له تخريب بتخريــــب غالبيــتهم في الأماكن العامة وفي الاسراف في الماء والكهرباء ناهيـــكم عن القيادة العجيبة بالشارع وجنا عباله ديرة ابوه ..!!

وماراح يفجووووون من ديرتنا الا لما ينشفوووونها على الاخر ..
لكن ما اقول الا الله يحفظ ديرتنا ويبعد عنها كل حاسد وحاقد يارب ويبعد عنها كل من يريد بها سوء.اللهم احفظ الكويت بلد امنا اللهم احفظ الكويت وشعبها.


حسبي الــله ونعم الوكيل
وأعتذر للإطالــــة لكن بالقلــــب حرة وموضوع يا عالوتر الحساس وصح سوالفهم لا الله ولا رسوله يرضى فيها.

تحياتي لج اخوج ،،
سالم

ترانســـجندر وأفتخــــــر ،، يقول...

صباح الخير
شيء مؤلم مؤسف بنفس الوقت
والله شي يعور القلب..وبكل صراحة بقول الي بقوله الحين..
نعم الكويـــت بلد الخير وفاتح بابها للكل..
ولكن في ناس ماتسوى..وفس ناس بس تبي تمص دك هالديرة الطيبة وتاخذ من خيراتها وتاكل الخضر واليابس وتمشي..
شوفي اختي انا ما أقول انه الحين كل الخراب بالأماكن العامة هو من قبل المقيمين ولكن أقول 99 بالمية او 90 بالمية نعم من المقيمين!!
لانه الكويتي ترا مهما بخرب قلبه بعوره مو لهدرجة يعني..
اما المقيمين بشكل موطبيعي..
ومو بس بتخريب الأماكن العامة..لا حتى بالشقق والمطاعم وغيره شوفيهم بالماي والكهرباء ولايهمهم..
كم وكـــــــم كافيه ومطعم دخلت الحمام فيه أعزكم الله ورأيت ا"السيفون" مخترب والمـــــــاي حيـــــيل رايــــــح !!
وإنصدمت..وبكذا مرة كنت اكلم وابلغ الموظف او المدير ..ويقول اوكي وكله حجي فاضيي..مرة اعتقد دخلت مطعم وبعد شهر رديت دخلته ونفس الخلل بالحمام اعزكم الله والماااااااي رايح !!
جم ساعة وجم يوم!! والله بغيت اذبح المدير يومها قلت له انت من صجكم من متى جذيي!! وين الجهات الحكومية المسؤولة وين البلدية الي ماتجيك على هالمطاعم وغيره ..!!

والله أختي شوفة عينج انتي وشوفة عينا لما نروح الأماكن العامة والحدايق منو فيها ؟؟اكثرها مقيميــن ..
ومزبليييين لج المكان..انا انسان اقول الحق لو على نفسي..
نعم فيه كويتين وايد نفس يسون الغلط بهالاماكن ولكن قليل,,
لانه خنكون واقعين الكويتي بالله بياخذ عيال ويروح يقعد على الواجهة الي تطل على الشارع فوق الزرع وجدام الرايح والرد بقعد اهله ويقعد يشويي !!
لووووووول اكيــــد لا..
بيستحي اكيد يسويها وبيقعد داخل بالصده وبمكان سنع ويا اهله ويسويها..
وانتوا تعرفون شلون طبع الكويتين
بعدين اغلبهم شاليهات وغيره ..
والله صج نااادر جدا ماشوف عايلة كويتية رايحه تشويي على البحر ..
وانا ما افتي ..
كل واحد على سبيل المثال يروح اي واجهة على البحر فيها حديقة يوم الجمعة ويشوف بعينه ..
والصور عندج فووووووق بعد خير دليل هههه

وفي ناس مقيمين لا حرام محترمين والنعم فيها لكن قليل..كما ذكرت لانه الغالبية مو هامهم شي لانه مو ديرتهم..


تدرون ليش؟
لانه من أمن العقوبة أساء الأدب..
وااااااايد ناس من دول عربية ومابي اذكر من وين تشوفونهم قاعد يهاجرون الى دول اوربية لكن اتحداكم يسون ربع الي يسونه يالكويت من تخريب!!
ليش لانهم عارفين شنو بكون مصيرهم اذا خربوا شي هناك !!
اما هنيي طايحين بربيع وطايحين له تخريب بتخريــــب غالبيــتهم في الأماكن العامة وفي الاسراف في الماء والكهرباء ناهيـــكم عن القيادة العجيبة بالشارع وجنا عباله ديرة ابوه ..!!

وماراح يفجووووون من ديرتنا الا لما ينشفوووونها على الاخر ..
لكن ما اقول الا الله يحفظ ديرتنا ويبعد عنها كل حاسد وحاقد يارب ويبعد عنها كل من يريد بها سوء.اللهم احفظ الكويت بلد امنا اللهم احفظ الكويت وشعبها.


حسبي الــله ونعم الوكيل
وأعتذر للإطالــــة لكن بالقلــــب حرة وموضوع يا عالوتر الحساس وصح سوالفهم لا الله ولا رسوله يرضى فيها.

تحياتي لج اخوج ،،
سالم

Engineer A يقول...

اخوي العزيز سالم

أولاً أشكرك وايد على اهتمامك وتعليقك واتفق معاك بأغلب النقاط اللي ذكرتها ..

احنا ما نقول شي للناس اللي لا يطلعون ولا يستانسون ولا يشوون .. بالعكس احنا أكيد نبي لهم الوناسة والعيشة الكريمة والسعيدة ويستانسون بديرتهم الثانية أكيد

بس عاد ياغريب كن أديب!!
ماله داعي هالوضخ وهاللوية وهالعفسة والدمار البصري والمادي لممتلكات الدولة ..

يعني طلعوا واستانسوا بس خلوا مكانكم نظيف من بعدكم .. وحافظوا على نظافة المكان اللي انتوا فيه ..

وتبي الصج؟؟

وين يلتزمون ويحافظون على النظافة واهو مافي قوانين أصلاً ولا في رقابة او متابعة أو حتى عقاب!

مافي رادع شلون بيلتزمون؟؟

والله كريم ويحفظ ديرتنا وشعبها من كل مكروه

دمت بألف خير والله يكثر من أمثالك اللي يحبون الكويت فعل مو قول

غير معرف يقول...

يالغالية انا نشرت موضوعك عندي بالفيس بوك ونسبته اكيد لج واتمنى انج تتفضلين وتشوفين


http://www.facebook.com/profile.php?id=100002725304783&sk=wall