تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







الجمعة، 4 ديسمبر 2009

فــــــضــــيـــحــة .. في الــــروضــــــة !!


جمعة مباركة في البداية ، وأتمنى إن يكون الجميع بخير و قضى أوقات ممتعة في عطلة نهاية الأسبوع ..
*******************************
التقيت اليوم بصديقة عزيزة علي لم أرها منذ مدة طويلة ، وبعد تبادل عبارات المجاملة والسلام والسؤال عن الأهل وآخر الأخبار ، أخبرتني صديقتي "بسالفة" صغيرة حدثت لها عندما ذهبت لتسجيل ابنتها في رياض الأطفال في بداية العام الحالي ..
وبصراحة "سالفتها" جعلتني أتعجب مما يحدث في ديرتنا الحبيبة - ولو إن من المفروض إني ما أتعجب من اللي قاعد يصير ويكون عندي مناعه! - واستوقفني الموقف كثيراً .. وبما إني لن أرتاح حتى أبوح عما في خاطري وإلا (صكتني الحرة)!!
تقـــول صـــديــــقتـي ( على لسانها):
ذهبت إلى رياض الأطفال التابعة لمنطقتنا لتسجيل إبنتي فيها، كنت قد أحضرت جميع الأوراق اللازمة للتسجيل ..
توجهت إلى مكتب "السكرتارية" المكان الذي تتم فيه عملية تسجيل الطلبة / الطالبات الجدد..
حتى فاجأتني الموظفة: اختي ما أقدر أسجل البنت لازم حضور "ولي أمرها"
صديقتني: أنا أمها!
الموظفة: أدري بس لازم حضور والد الطفلة لتسجيلها ، مايصير إنتي تسجلينها!
صديقتي: وشنو الفرق؟ أمها وإلا أبوها .. كلهم أولياء أمرها!
الموظفة: أنا فاهمه عليج .. بس والله مايصير .. القوانين جذي!
صديقتي: بس أبوها في الدوام وما يقدر يهد شغله.. واليوم آخر يوم للتسجيل؟!
الموظفة: والله مادري .. لحظة شوي (وتسأل الموظفة اللي معاها): يصير اهي تسجل بنتها؟
الموظفة 2 واهي اطالع الام من فوق لي تحت: لا لازم أبوها!
الموظفة: والله مو بيدي والا ساعدتج!
نظرت إلى ساعة يدي ، لازال هناك متسع من الوقت!
اتصلت بزوجي وأخبرته عن الوضع وضرورة حضوره في الحال، فقبل على مضض وقرر الحضور في النهاية "مجبر أخاك لا بطل!" .. وجلست أنتظر قدومه في مكتب السكرتارية إلى أن يحضر!
وفي أثناء انتظاري كنت استمع إلى أحاديث الموظفات المختلفة و كن ثلاث:
الموظفة 1: شوفي .... شرايج فيهم؟
وهي تناول صديقتها حقيبة صغيرة من طراز حقائب اليد "سمسونايت"
الموظفة 2: الله! يهبلوووووووووون ... على جم تبيعهم؟
الموظفة 1: مادري .. سألي ....
الموظفة 3: الوحدة ب 25 دينار واذا خذيتي 3 تحسب لج الوحدة ب 20!
طبعاً أنا جالسة أنتظر "كالأطرش بالزفة"!! حتى التفت علي احداهن ..
الموظفة: تبين ساعات؟؟!!
أنا انصدمت! تكلمني؟!
صديقتي: لا شكراً!!
الموظفة: ترى ماركة تقليد درجة أولى! توهم أمس واصلين من الصين!
أجبتها و عيوني شوي وتطلع من الصدمة!
صديقتي: عليكم بالعافية .. مشكورة!
أكملن أحاديثهن وضحكاتهن "المليقة" حتى دخل أحد أولياء الأمور "الرجال" لتسجيل ابنه ..قام بالتوقيع سريعاً على الأوراق والهرب من الغرفة المليئة بالنساء بسرعة كبيرة !!
وما أن خرج حتى دار هذا الحوار..
الموظفة1: شفتيه؟؟
الموظفة2: امبيه زوغه! اينن!
لم أستطع تمالك نفسي! ماهذه الوقاحة! رحت أهز رجلي بعصبية تنم عن عدم رضاي على الأحاديث الدائرة بينهن وقد انتبهت لوجودي إحداهن فراحت تلطف الجو "بالهذرة" مع صديقاتها مبينه لي بأنهن يمزحن!
وصل زوجي وذهبت برفقته لتوقيع أوراق التسجيل واقفه بجانبه مستعدة للانفجار بوجه أي موظفة ترفع نظرها إليه "بروحي منقهرة منهم" وربما قد أدركن غضبي فلم يجرئن على النظر إلينا!
وقع زوجي الأوراق وغادر إلى مقر عمله مجدداً بينما أكملت أنا بقية الإجراءات!
***********************
كانت هذه هي حكاية صديقتي مع ادارة إحدى رياض الأطفال في الكويت.. ألهذا المستوى وصلنا ؟؟
"بياعه" في المدارس؟؟ وياريتها وقفت على المدرسات او الموظفات بينهم وبين بعض، وصلت فيهم الجرأة لعرضها على أولياء الأمور؟؟ أشكره! عيني عينك! وشسالفة "شفتيه؟ " زوغه؟!! كل هذا مو مشكلة .. نقول it happens
بس عاد جدام ولية الأمر؟؟ شلون هالموظفات ما احترموا "حرمة" المدرسة - المفروض انها صرح تعليمي وتعلم عيالنا- ؟! شلون وصلوا إلى هالدرجة من الجرأة والوقاحة؟؟
هالشي صار جدام ولية أمر، عيل من وراها شيسوون؟؟!!
وين الناظرة؟ وين الوكيلة؟؟ وين المشرفة؟؟ وينهم عن هالفئة ؟ وين النظام؟!
وبعدين شسالفة "ولي الأمر" ؟؟ ليش الأم مالها صلاحية تسجل أبنائها؟ ليش لازم الأب أهو اللي يقوم بتوقيع أوراق التسجيل؟؟
أنا بصراحة متعجبة!! وما أدري من الملام؟!
شرايكم؟ بذمتكم مو شي "يحر" ؟!!

هناك 30 تعليقًا:

رورو الشخبوطه يقول...

السلام..

انا يبطون جبدي اللي يبعون كل الكويتين صاروا تجار بس باجي انا :\

وتوني ادري الام ماتصير تسجل عيالها بالمدرسه انزين لو منفصلين والابو تلعين !!

وقليلات ادب ماعليهم شره قمت اشك ان القانون تاليفهم خخخ..

لا استغفرالله ماحطها بذمتي ..

ومرسي ..

BookMark يقول...

غريب قانون ولي الأمر .. والمشكلة الأم اهي اللي تسوي كل شي وتروح وتودي واتييب واتحط وتشيل .. ووقت الأوراق الرسمية لازم حضور الأب !
وكأن الأب دوره التوقيع لإكمال سير العمليات وحسب ..

الوقاحة للأسف انتشرت بكل مكان .. حتى في صرح يفترض أن يكون مبجل مثل "المدرسة" ..
أشكر اهتمامج و"حرقتج" على الأوضاع بهالديرة .. ليت أحد يسمع

وأشكر تنوريج مدونتي :)
تقبليني أنا أيضا

شاي الضحى يقول...

@@

وين قاعدين؟!!!

من صجهم؟!!!

يبيعون؟!!!

لوووووول والله مادري شقول

وعلى سالفة زوغه

في وحده تشتغل بالجامعه انا من قبل ما ابلعها ولما صارت هالسالفه كرهتها اكثر .. مره كنت رايحه عندهم ابي شغله جان ايي طالب توه مستجد واهيا مره شكبرها وعندها عيال بالجامعه وكانت السالفه برمضان تخيلي اول مادش اهيا شوي وتطيح غشيانه هدت كل شي وراحت له تخلص شغله ولما طلع جان تقول امبييييييييه لا لا لا بس فطرت فطرت !!!!!!!!!!!!!!!!

لا تشوفين ويهي تنحت هذي من صجها؟! والله حدها اصدمتني وكرهتها اكثر

Engineer A يقول...

رورو الشخبوطه


اي شفتي شلون؟ احنا شعب كلنا تجاااااار :)

شوفي سالفة "موافقة ولي الأمر" للأسف صحيحة وأنا استفسرت من وحدة أعرفها تشتغل بالتربية و تقول "لأنهم ما يبون مشاكل مع الأهل" !!

أحيانا يكون الأب منفصل عن الأم و يتعاندون بالعيال و بعض الآباء ما يرضى يسجل عياله "عناد" في الأم !!

من جذي يبون يتأكدون من موافقته.. بتقوليلي التعليم إلزامي في الكويت بأقولج نعم بس من الإبتدائي وليس من مرحلة رياض الأطفال!!

خليها على الله

مشكوره :)

Engineer A يقول...

BookMark

مرورج نور مدونتي المتواضعة .. وفعلاً شي "يحر" وليت تلقى من يسمع!

أسعدني مرورج :)

Engineer A يقول...

شاي الضحى


الله يهديهم يارب .. ويصبرنا على اللي نشوفه .. ويصلح حال البلد اللهم آمين!

حياج الله :)

Angel of silence يقول...

اي والله أصلن عيب !!
بينهم وبين بعض كيفهم بس بمثل ما قلتي صج مايستحون
مسكينه والله رفيجتج بس توني ادري ان لازم التسجيل بحضور ولي الامر
 

jonoon 3aqel يقول...

بعلّق على موضوع ولي الأمر..

ايش هالقوانين اللي مالها لزمة..

ليش ما احد يشتكي و يتكلم ف الاذاعة و لاّ التلفزيون !!!

احنا بعد عندنا لخبطة في التعليم..خاصة لما تم نقل مسؤوليةالمدارس من وزارة التعليم ..إلى هيئة التعليم العالي..
الله لا يرويكم سوء..

تحياتي

chandal/danchal!! يقول...

LOL

يحليلهم وايد شعبيين وماخذين راحتهم

الكويت كلها صايرة جذي... عندنا واحد حتى المباخر يبيعها حمدلله والشكر


بخصوص اولياء الامور, وايد تصير مشاكل اذا الام والاب منفصلين فمن جذي لازم الاب اللي يسجل عياله

السالفة صج تحر لأني اعرف بنت طليقها يحرها بتسجيل عيالها بمنطقة ما تبيها... الحمدلله والشكر ما جنهم عياله


متابعة من بوست ولاد العم... مدونة ممتازة

:)

dr.tota يقول...

والله هالحركات هذي قاعد نشوفها في كل مؤسسه.. وسوالف الحريم ما تخلص..الي تبيع .. والي أم ولدها طولها.. تتصرف مثل المراهقات.. الله يستر ع الجيل الي يربونه.. والا سايقنا"الجيكر" .. تقول عنه وحده تشتغل مع اختي بالدوام.. مزيووون..
حمد الله والشكر..

المحامي يقول...

هذولي أتصور الحل لهم هو "جبريت + بانزين"
وعلى هالطاري كان عندي معاملة بوزارة ، دخلت ولا كل الموجودين موظفات ، وهادين كراسيهم ، وحاطين بسطه على الأرض داخل وقاعد ياكلون خبز إيراني و"آش" ونخي وهالسوالف الطيبة ، وفي ناس ناطرين معاملاتهم فتجرأت وقلت: لو سمحتي عندي معاملة وآنا مستعجل ، ردت بكل وقاحة وكانت قاعده تعلف خبز بشراسة الأسد ، وقالت"اصبر اصبر يعني ما آكل"، قلت لها "كلاج الشري إن شاء الله" :) وقدمت شكوى عليهم

ففعلا صار عندي مناعة بعدها.. تحياتي

Engineer A يقول...

Angel of silence


من ناحية ما يستحون فهم صج ما يستحون! :)

حياج الله

Engineer A يقول...

chandal/danchal!!

ههههه اعجبتني "شعبيين" :)

بالنسبة لقانون ولي الأمر، أنا سألت عن صحته ومع الأسف فهو موجود.. الأم والأب يتعاندون ومحد ضايع غير هالعيال!

تسلمين عزيزتي ونورتي المدونة :)

Engineer A يقول...

jonoon 3aqel

عيزنا و إحنا انتحجى وانادي ..

ولكن لا حياة لمن تنادي! :)

حياك الله

Engineer A يقول...

dr. tota

امممممم


يمكن صج سايقكم "مزيون" بس انتي مو مثبته؟! لوول

شكراً على التعليق :)

Engineer A يقول...

المحامي


لا حرام "تحرقهم" بعدين يصيرون شهداء! :)

الا صج، شنو يعني "الشري" ؟ :)

نورت المدونة

Made n Q8 يقول...

وي بدعوا شنو الي لازم ولي الامر بالله كان ريلها مسافر ذاك اليوم معناتها البنت ما راح تتسجل الا السنه اليايه!

Engineer A يقول...

Made n Q8


بعد!! قانون!


الحين هدوا كل قوانين الديرة وما طبقوها ووقفت على هذي!


الله المستعان ..

نورتي المدونة :)

غير معرف يقول...

صج ما يستحون .. والله الفراغة و ما تسوي ، المفروض يبلعون لسانهم وما يتكلمون جدام احد !

المحامي يقول...

بخصوص الشري..

اي عيوز كويتية أصلية لو تستفسرين منها راح تجاوبج .. لما يعصبون العجايز دايما يقولون هالدعاء وهو"كلاج الشري" .. والشري -حسب ما أعرف- مرض جلدي يخلي الجسم ينتفخ وتحوش الواحد حكة قوية تخليه ما ينام :)
تحياتي

SHOOSH يقول...

عادي

شالمشكله ؟؟

:)

كاريكاتير يقول...

الموضوع وايد معقد مو مثل ما الواحد متخيل مجرد سوالف حريم بمكتب

الموضوع "فوضى منظمة واهمال مقصود"!!

Engineer A يقول...

Hanan


والله أنا أن المفروض ما يتكلمون كلش .. مو بس جدام أحد!


أسعدني مرورج ونورتي المدونة :)

Engineer A يقول...

المحامي


وصل المعنى .. شكراً :)

Engineer A يقول...

SHOOSH


عادي؟؟ شالمشكلة؟؟!!!



لا شوفي تعليقج هذا يدل على شيئين ..

يا إما إنج مالج خلق تعلقين علشان بتسافرين (وارد جداً)

أو


شكلها البضاعة اللي إعرضوها بالمدرسة بضاعتج! :)

Engineer A يقول...

كاريكتيير


فعلاً الموضوع مو هين ..


والتربية من عمر عايشة في "فوضة" و "إهمال" ..


أسعدني تعليقك ..

Unknown يقول...

الســــــــلام علـــــــيكم

كل مجتمع ما يخلى من هل ظواهر....، عيشه غاليه+بطاله مقنعه+مجتمع مفكك (تربية خدم)+الاستعجال في نيل الامنيات = بياعه في كل مكان الي ان وصل بيع الشرف عااااادي.....، هذا طبعا عند البعض و ليس الكل. اما بالنسبه لولي الامر هذا قانون وضع اصلا لعدم الخلط بين مسؤولية الرجل و المرأه و القانون وجد من اجل الحفاظ على العائله الكويتية و لمبدأ الحفاظ على الادوار. صحيح ان في هل الزمن الادوار اختلفت و لكن المرأه تبقى مرأه و هي أميره في بيتها و الرجل يبقى رجل و هو ولى امر كل من في البيت.....
وجهة نظر....

hurricane

Engineer A يقول...

Hamad

صحيح القانون وضع لاعطاء كل واحد مسؤوليته بس عاد منو يطبق القانون؟

المفروض من مسؤولية الأب يراكض بالأوراق و الاجراءات و يسوي إجراءات التسجيل كلها من فحص طبي و غيره .. مو الأم الفقيرة اهي اللي تراكض و اهو اللي له البرستيج .. وايي على الجاهز بس يحط توقيعه الكريم.. عدل؟ :)

ميرسي على المشاركة :)

juvebizkit يقول...

سلام عليكم
عاد أنا هالسالفه اللي باطه جبدي
الوالده في البيت و الوالد في الدوام و الوالد تطلب مني اييب اخوي الصغير من المدرسه

اهما يكلموني هناك على ولي امره جني خاطفه مع اني كنت طالب معروف عندهم و المشكله انهم يتغيشمون.

Engineer A يقول...

juvebizkit


شوف يمكن لأنهم يخافون إن اللي بياخذ الطالب مو أخوه أو مو من أهله أو من غير معرفة الأهل .. بس مادامهم عارفينك المفروض ما يتنحون ..

يلا شيسوون بعد عليهم مساءلة "ولاد الحرام ماخلوش لولاد الحلال حاجه" !!


نورت المدونة :)