تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







الاثنين، 7 ديسمبر 2009

بشرى للمواطنين ... "أراضي ابلاش" !!



الـــــــــــــخـــــبـــــــــــــــــــــــــــر
تقيم الحكومة "مــسابـــقة كــــــــبــــــــــرى" للمواطنين للحصول على أراضي سكنية مجانية في المناطق التالية:
- الشويخ الصناعية
- الري
- صبحان
- جنوب الفروانية (الضجيج)
- خيطان
- منطقة "نادي الصيد والفروسية"
وبالمساحات التي يحددها المواطنون أنفسهم !! كل ما على المواطنين إحضاره هو "بقي" * ممتاز سريع و عنده قابلية "للتقحيص" و " التشفيط" للتسابق!
المسابقة عبارة عن سباق كبير "بالبقيات" .. كل أسرة تستعد بالبقي الخاص فيها .. حاملة معها علماً - من الأعلام التي سوف يتم توزيعها من الحكومة- والإنطلاق نحوالأرض التي يرغبون بأن تكون "أرضهم" و مكان بيتهم بالمستقبل .. وأسرع أسرة تصل "بالبقي" إلى الأرض المختارة وتقوم بغرس "العلم الحكومي" بها .. ستكون هي الفائزة بهذه الأرض!!
انتهى الخبر !!!
المصدر " أحلام مواطنة كويتية"
ما رأيكم بالخبر؟؟ .. ليس إشاعة!! لقد أحضرته لكم من المصدر!! لماذا لا تصدقون أن هذه المسابقة حقيقية؟!
لأنها "حلم يا حسين حلم" **!!!
بالأمس كنت أشاهد فيلما DVD اسمه "البعيد و النائي" Far & Away من بطولة الثنائي السابق توم كروز و نيكول كيدمان .. الفيلم قديم نوعاً ما ولكنه من أحلامي المفضلة .. عذراً!! أقصد من أفلامي المفضلة!
تحكي قصة الفيلم عن رجل طاعن في السن يملك أرضاً في بلده اسكوتلاندا أو ايرلاندا (لايهم) ولكن كان هناك اقطاعياً .. متسلطاً .. يستحوذ على أراضي المزارعين .. ومن لم يسددوا دينهم .. ليأخذ أراضيهم .. ويضمها لأملاكه اللامنتهية.. وقبل أن يموت الرجل .. أوصى ابنه "كروز" بأهمية الأرض للرجل .. وبأن الرجل لا يساوي شيئاً من دون أرضه!
يذهب "كروز" برفقة ابنة الإقطاعي للهجرة إلى "أميركا الشمالية" و ذلك لأنهم هناك يمنحون أراضي "ابلاش" .. شرط الفوز بالمسابقة "كالتي ذكرتها ولكن الفرق أنهم كانوا يتسابقون بالأحصنة عوضاً عن البقيات"!!
وأثناء "اندماجي بالفيلم" .. حلمت (من أحلام يقظتي الكثيرة بالطبع) بحدوث مثل تلك المسابقة عندنا .. وتقوم الحكومة بتوزيع الأراضي ابلاش .. يا سلاااااااااااااام .. ودكم تصير صج؟؟ وإذا صارت، تهقون ماراح تدخل "واو" بالموضوع؟؟ وإلا هم راح نعاني من "إذنك .. خشمك.. صماخك.. whatever ؟!!
وترى على فكرة .. أنا حجزت أرضي من الحين لا تحطون عينكم عليها!! والعلم اللي رفعته لونه "أبيض" !!
------------------------------------------------------------------------------
* البقي: دراجة نارية بأربع عجلات!
** حلم ياحسين حلم: راجع مدونة I have a Dream

هناك 28 تعليقًا:

Hi kuwait يقول...

ههههه والله حلم الكل هذا

تسلمين عالموضوع الحلو

:)

7osen يقول...

خيالك واسع بمساعدة توم ونيكول هههه
عاد أنا احب نيكول وما اداني توم ..

لو تصير هذي المسابقة عندنا جان تلقين الناس طق اعصي .. الناس بشكل عام تحب البلاش تحب الشي إللي ايي بسهولة
...
عموما ترى خبرج هذا إنتي تتحملين مسؤوليته إذا احد جهز بقيه من الحين هههه ..

تصدقين للحين عالقة فبالي " لو شاكك أدي " والله المصرين عليهم سوالف تموت من الضحك :)

يعطيج العافية

Angel of silence يقول...

ايي والله حلم يا حسين حلم

ما قصرتي على هالموضوع :)

Engineer A يقول...

Hi kuwait


إن شاءالله يتحقق الحلم في يومٍ مــــا!

الله يسلمك .. نورت المدونة :)

Engineer A يقول...

7osen


مدام الخيال والحلم للحين "ابلاش" .. خلنا نحلم شورانا؟ :)

عاد الحين موسم البقيات ..

الله يعافيك وحياك الله :)

Engineer A يقول...

Angel of silence

مشكورة على التعليق الحلو ..

حياج الله :)

chandal/danchal!! يقول...

مجمع التلال بقهوته "حللي"


من وين مطلعة فار اند اوي؟... نسيت قصته بس افتكر انهم تزوجوا عقب هالفلم!

Engineer A يقول...

chandal/ danchal!!


اممم مجمع التلال هه؟ والله خوش موقع p:


أعتقد إن توم ونيكول كانوا متزوجين حزتها؟ والله مادري!

مشكوره على التعليق الجميل :)

BookMark يقول...

خوش خبر والله
بس الله يهداهم مافي مناطق أبعد من جذي؟ p;

انا زهبت العلم بس ناقصني البقي ;(

بوست حالم .. يعطيج العافية ^^

dr.tota يقول...

ههههه..أحلامج عجيييبه..
شوي شوي علينا لا يطيح السقف..هههه
يسلمو عالطرح الحلو :)

شاي الضحى يقول...

اشوه اني توني متعلمه اسوق بقي ههههه


شكرا

رورو الشخبوطه يقول...

السلام..

خخ عيل اسعار سوالف البنيان بتشب ضو :\

مو الخوف من الواسطه الخوف يصير مداحر وداحس والغبرا..

ومرسي ..

حَافِـيَةُ الَقَدمَيّـنْ ولِبَاسِي المَطـرْ يقول...

جااااااان زيين !
بس وين ياحظي p;
تسلمين خيتي عالموضوع

الاوركيده يقول...

خوش حلم

انا ابي ارض على البحر يصير :)

الواسطة بالكويت شر لابدمنه :)

Engineer A يقول...

BookMark


امبلا في أبعد "المطلاع - الخيران- الصبية"

شرايج؟


وإذا على البقي مو مشكلة نسلفج واحد .. مشكورة على التعليق العسل .. نورتيني :)

Engineer A يقول...

dr. tota

أنا قاعدة أحلم ما أقط صواريخ .. فيه فرق :)

بس شرايج بالحلم؟ فـــله مو؟ :)

Engineer A يقول...

شاي الضحى


زين تسوين أنا للحين "دقة قديمة" حدي قواري ما اعرف للبقيات للحين :)

حياج الله

Engineer A يقول...

حافية القدمين ولباسي المطر


الله يعافيج .. أسعدني تعليقج ومرورج :)

Unknown يقول...

يعطيييج العافيه ايت هالحالمه... أقول انا ادري انه حلم بس هم ادري انه ما راح اخلوووونج... فيه ناس راح يستثنونهم بالانطلاق قبل صوت طلقة الصفر.... و فيه ناس راح يلغمون البانشي مالهم علشان يحجزون احلى المواقع... و في ناس راح يستأجرون ناس بروفشنال علشان يسوقون البانشي....و فيه ناس تلقين بلوكاااااات كامله باسامي مستعاره من طقة الاخ "ساطور المريطي" الي ما تدرين من اللي وراااه... و بالنهايه المواطن العادي الي راكب البانشي العادي راح اخلص بانزينه و بقزرها مشي حافي لين تنقللل ريوله... و الباقي حوادث و قاعدين يتهاوشون مع بعض ليش انه كل واحد يقول الغلط مو علي و الطيور تالي تطير بارزاقها كالعاده....و هذا حاااال بلادناالمسكنه الحالمه....

مع تحيات
Hurricane

Engineer A يقول...

Hamad

تدري أحلى شي بالحلم شنو؟؟

إنك ما تحاتي التفاصيل .. وكل شي اوكي .. كل شي يصير :)

علشان جذي قلت اني حلمي من طقة "حلم يا حسين حلم" :)

لولا الأمل يقول...

ههههههه

لو نفترض " عبطا " انه هالحلم صار صج .. بيصير تكرمين طق نعل على هالاراضي وواسطات

وياليت المناطق اللي ذكرتيهم حلوة لووول

وعلى قولتج .. حلم يا حسين حلم

عجبني اسلوب الطرح ..

تقبلي شكري :)

Engineer A يقول...

لول الأمل

بالنسبة للمناطق .. قريبة من الديرة وأفضل بمليون مره من الخيران والمطلاع!!


وأشوه "إنه حلم" .. علشان ما تصير المعركة اللي قلت عنها و ما توصل للطق مطاقق :)

أسعدني مرورك .. نورت المدونة :)

نبضُ الأدب يقول...

لووول .. بالأحلام السعيدة pP؛

و فيتامين "واو" هذا داش بكل مكان .. آآخ لو نفتك من شرّه .. جان الدنيا بخير عندنا ..!

الأحلام بـ بلاش اختي .. اختاري الحلم اللي يعجبج .. و تمتعي D=

بالتوفيق إنجنيرة =>

jonoon 3aqel يقول...

مبروك ع الستايل الجديد

..

"أحلم..فقد يصبح ما يحلم به الإنسان واقعا"

لو صار كذا...جان في كل أرض بتلقين هوشة و مناجر..من وصل قبل من..و من حط علم من قبل!!

الله يرزكم كل خير..

تحياتي

dr.tota يقول...

ههههه أحلامج مثل الصواريخ..
قويه ومدمره..للحال الي احنا فيه مو؟؟!

Engineer A يقول...

نبض الأدب ..

مو مدام الأحلام ابلاش الحين "خل الواحد ياخذ راحته" :)


أسعدني مرورك :)

Engineer A يقول...

jonoon 3aqel


الله يبارك فيك .. كل شوي أكتشف شي يديد بعالم المدونات و كل شوي مغيره بالستايل :)


اي والله أشوه انه حلم لأنه لو صار صج .. جان شيفكنا من النجرة و الهواش !!


مشكور على التعليق :)

Engineer A يقول...

dr. tota

الفرق بين الأحلام "مو الكوابيس والصواريخ .. إن الأولى وردية .. مسالمة .. والثانية قاسية ومدمرة :)

أسعدني مرورج