تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







الجمعة، 25 ديسمبر 2009

لحظة! إنت وينك؟ أحبك يا دنيا من الوله.. رحلتي .. مع مغيب الشمس..!


عنوان مدونتي .. عبارة عن مجموعة عناوين لأغاني مطرب الكويت الأول ، الفنان الكبير عبدالله الرويشد..
اللي خلاني أختار بوخالد علشان يكون موضوع مدونتي اليوم هي صورة قديمة ترجع لأيام الثمانينات.. جمعتني مع هالفنان المحبوب مرتين في إحتفالات العيد الوطني المقام في مصر في عام 1989 و 1990 ..
كنت أتصفح بالأمس ألبوم الصور وأسترجع أيام طفولتي الحلوة وأيام الشطانة!! وشفت صوري مع عبدالله الرويشد وكنت حزتها صغيرة بالابتدائي !
بس كنت أموت على شي اسمه أغاني عبدالله رويشد، لدرجة إني كنت أزعل إذا الوالد شال شريطه وحط شريط ثاني وأبرطم وحالتي حاله وما أرضى إلا إذا رد شريط رويشد مرة ثانية وشغل أغانيي المفضلة!
الله على أيام الثمانينات والطفولة البريئة واللعب والوناسة ، بتقولون شلون طفلة ما يتجاوز عمرها ال7 سنوات تسمع لرويشد؟
فعلاً شغله غريبة ، بس أنا كنت أسمع له لسبب بسيط جداً .. كنت طول المدة أظن إنه "زوج خالتي" لأنه يشبهه وايد!!
وكان زوج خالتي يقص علي وايبلي العود ويقولي أنا اللي أغني بالتلفزيون، وصدقته!! :)
كنت أحب شريطة اللي فيه أغنية " قلبي معك يا مشغل البال ملتاع" لوول أدري حد الغبار بس كانت أغنيتي المفضلة بذيج الحزة
وبديت أسمع لعبدالله رويشد من يومها ، حتى بعد ما عرفت جذبة "ريل خالتي" وعرفت انه مو عبدالله الرويشد!!
الله على ذيج الأيام .. الواحد يسمع أغاني حب من غير مايعرف معناتها << نفس حالاتي ههه
ابتديت أسمع أغانيه الحلوة مثل "رحلتي" .. "يابو ناصر" .. " على ايش انتفاهم" .. " كلمتني" .. "وعدتيني" .. " مغيب الشمس" .. " انت فاهمني غلط" .. "دلال" .. "باتبع قلبي" .. "أكذب روحي" .. " يا سماره" .. "انت وينك" .. "هلا باللي" .. " نعم مشتاق" .. " الجمرة" .. " يخون الود" .. " أعرفك نفسي" .. " يا شايف نفسك علي قولي على ايش"
والكثير الكثير من أغاني هالفنان المبدع ..
كبرت وكبر معاي عشقي لأغاني عبدالله الرويشد .. القديم منها المفضل عندي لأنه مرتبط بطفولتي وأيام قبل ..
ولا زال أهو الفنان المفضل عندي .. وأغانيه الأجمل دائماً
"إنت وينك .. ضاع ثلثين العمر حزن ومأسي ..
مادريت من المحبة شاب راسي.."
و
" تصور .. لو خلت هالديرة من عينك ولا تعود .. ينبت عليها الحزن واصير انا كالعود ..
لا عدم صوتك .. ولا خلى منك مكان.. ياأحلى أيام العمر.. يا أغلى كلمة بالصدر..
شوفة عيونك منيتي.. لكنه مو بيدي"
و
"دلال ومدللك .. غلى ومغليك ..
كل هذا ياحبيبي .. ومنته قايل اشفيك؟
شبيدي أسوي أسوي وما سويت؟
شبيدي عمري .. عمري وشخليت؟
مقصر على نفسي .. والقصد أهنيك"
الله عليك يارويشد .. مبدع .. وأغانيك دائماً تاخذني ل"دنيا الوله" .. وتعيشني بدنيا " المحبة" .. لين " أكذب روحي" و "أعرفك نفسي" .. و "أشتري" "إحساس العالم" .. وأسبح في " العيون" اللي تطل منها " الشوق والدمعة" ..وتاخذني لأخر مدى في الكون!
عند " مغيب الشمس" .. "انتهينا" .. وحلفت اني ما "اتبع قلبي" .. و أرد ثاني " للجمرة" .. لين "تعتذرلي" .. وأرجع " أراضيك" .. " بعد اللي صار" .. ونرجع حبايب مثل أول وأعيش معك " أسعد أيامي" !!

هناك 22 تعليقًا:

الاوركيده يقول...

الله عليج لقيت وحدة معاي عشقي له ماله حدود ومن كثر ما أحبة سميت ولدي عليه كل ما يطري على بالج عنة ويخصة ميمعتة وكل حفلة بالقاهرة ولا بيروت اروح :)

لاتشوفين طبعا غيرة ريلي لما يطلع والا اتكلم عنه كانت بالنسبة لي معاناه لغاية لما فهمته الموضوع خفت الغيرة شوي

:)

رورو الشخبوطه يقول...

السلام..

هل عدتي يا اخيتي؟؟

وبخصوص الموضوع انا احب اغنيته قلبي معاك وايد حلوه ولانه قديمه احبها اكثر..

ومرسي..

Engineer A يقول...

دمعة المقهور

هههههه لا أنا ما وصلت لدرجة الغيرة والأمن مستتب ..

بس صج منو مايحب أغاني بوخالد؟؟


أسعدتني مشاركتج :)

Engineer A يقول...

رورو الشخبوطة



هلا حبيبتي اي عدت بالسلامة الحمدلله :)

قلبي معك وأغاني وايدة لهالعملاق تأثر فيني وأحبها وايد ..


أكثر وحدة أحبها من أغانيه " للعاشقين عيون" .. عجيبه !


مشكوره على مشاركتج يالغاليه :)

pure-silk يقول...

حمدلله على السلامه و وحشتينا....... عبدالله الرويشد الله على ايام الثمانيات و التسعينات كل الاغاني لها ذكريات ايام الثانويه والجامعه و اجمل اللحظات واحلى الذكريات
كان ومازال بوخالد مميز

pure-silk يقول...

a7la altherkrayat kanat m3 a'3any rwaished

7medellah 3la esalamah dear

شاي الضحى يقول...

صعبــــــــه تحب انسان
ويتجاهلك تـــــــــالي
ولو بيدي النسيـــــــان
ما كـــــان ذا حــــالي


احب اغانييييييه كل يوم وانا امشي لازم اسمعه

واحلى اغناني تذكرني .. طمني .. صمت الوداع .. صدقيني .. للعاشقين عيون .. احبك

بعد وايد نسيت ههههه

احسااااااس لما تسمعين اغانيه

وكل اغنيه لها ذكره حلوه

مشكوره :>

والحمدلله على سلامتج

Engineer A يقول...

pure-silk


الله يسلمج حبيبتي .. وصج ماكو على ذيج الأيام .. كل شي فيها حلو :)

أشوف على موضوع عبدالله رويشد حطيتي ردين وباجي المواضيع "على حسب" تقرين من غير تعليق هههه

أسعدني تواجدج :)

Engineer A يقول...

شاي الضحى


للعاشقين عيون .. نظرتها غير الناس

تقرى مابين الجفون.. معاني وإحساس

واللي يلوموني .. صعبه يغيروني ..

آه لو يشوفونك .. لو مره بعيوني!



هالأغنية عندي the best وايد أحبها .. وصج كل إغنيه من أغانيه لها ذكرى حلوة ..



الله يسلمج حبوبه مشكورة على تواجدج :)

Cesc يقول...

يستاهل بو خالد يستاهل ..
مطرب عملاق ,

Engineer A يقول...

Cesc

مشكور أخوي على التعليق و المشاركة الحلة وان شاءالله تستمر مشاركاتك دايماً بمدونتي ..

نور سلطان العيسى يقول...

عزيزتي المهندسة ..

عبدالله رويشد .. افضل مطرب خليجي على الإطلاق ..

يعجبني كثيرا .. وأغانية مهما نمر عليها السنين تظل عايشة ..

الغاني اللي ذكرتيها جميعها جميلة .. واحب اضيف عليها ..

أغنية "اللي نساك" .. لها معزة خاصة عندي ..

ضحكت على زوج خالتج .. عايش الدور ..

سعيدة جدا بهالبوست ..

تحياتي

بنت سيف

غير معرف يقول...

بصراحه..
أول مرّه أمر مدونتج...

عجبني التعريف اللي حاطته عن نفسج..
حسيته صادق ومن قلبج ..كلمات عفويه لكنها عظيمة بالمعني
لأنها من اعماق القلب...

وعجبني البوست وايد...
نفس التعريف..عفوي..وحلو...
جنّه وحده جدامي قاعده تسولف واتحازيني ذكرياتها...


اممممم
اعتقد اني راح اطول بمدونتج..بتصفح قديمج اذا ماعندج مانع:))

والأكيد إني من الرواد من يوم ورايح


مهندستنا...

تحايا ن اعماق القلب..
واعتذار بالبنط العريض
على تأخري لدخول هذي المدونه الحلوة


حبي

Engineer A يقول...

بنت سيف


أشكرج أول شي على كلامج الطيب و مرورج الحلو ..

وفعلاً بو خالد أثبت وجودة في الخليج والعالم العربي بأغانية المميزة ..


نورتي المدونة بتعليقج وان شاءالله ما يكون أول وآخر مرور لج :)

Engineer A يقول...

سلة ميوه


مافي كلام بعد اللي قلتيه ..


كلامج أسعدني و فرحني وايد ..ومرورج على مدونتي شرف لي..

أكيد أخذي راحتج مثل ما تبين بالمدونة المكان مكانج و يسعدني أتلق منج أي تعليق حتى لو على موضوع فات :)


يارب مايكون أول ولا آخر مرور لج .. وتنورين مدونتي المتواضعة بشكل دايم .. واعذريني هالفترة شوي مشغولة ومانزلت شي يديد بس ان شاءالله القادم يعجبكم :)

jonoon 3aqel يقول...

هههههههههههههههههه

احب الديو اللي مع نوال...

==

انا كنت اصيح و اموت من الصياح اذا خواتي غنوا لي " ما بلاش نتكلم ف الماضي...دا الماضي دا كان كله ((جراح)) "
و يقولونها...." قراح" باللهجة المصرية..
لأن كان فيني حساسية جلدية,,
و كانوا يعيبون علي :(

دمتي بخير

تحياتي

غير معرف يقول...

اللــــــــــــه..


ماكو على عبدالله رويشد وأغانيه،،


أحب كل أغانيه بس أكثر إغنية أثرت فيني اللي غناها بالأوبرا بمصر سنة الغزو "الليلة المحمدية" اللي يقول فيها

من حقي أبجي ،، من حقي أبجي

إن شاءالله أبجي دم!!


وااااااي شكثر بجانا باغنيته هذي :(

مشكوره مهندسة .. مدونة حلوة مثلج :)

فاطمة

Engineer A يقول...

jnoon 3aqel


حلوة أغانيه الديو بعد ..

بالنسبة لأغنية عمرو دياب هههه ضحكتني عليها .. ومن عذر ما تحبها :)


مشكور على التواجد والمشاركة :)

Engineer A يقول...

فاطمة


صج اغنيته اللي غناها بالغزو تعور القلب :( أيام الله لا يرجعها ..


مشكورة سويتي .. كلج ذوق :)

Made n Q8 يقول...

اذكر على أيام الابتدائي ابوي يشغل اغنيته الي مع بو بكر سالم والله ماادري شنو اسمها :s

وبالنسبه لاغانيه انا احب القديمه مثل لمني بشوق واحساس العالم وخسرتيني ولا تلومونه واللي نساك وهم آخر حبيب بعد حلوة وبس شبقى بعد خخ

Engineer A يقول...

Made n Q8

اممم يمكن الأغنية اللي تقصدينها "يا ناسين الحبايب" ؟؟

وصج أغانيه حلوة الواحد يحتار يختار الأحلى منها!

مشكورة على المرور الجميل :)

غير معرف يقول...

الرويشد .. أكثر فنان يأثر في المشاعر ويقلب الذكريات
حبينا على صوته ..
من رحلتي .. إلى اليوم .. إبدااااع