تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







الاثنين، 11 يناير 2010

صدمه !!!


كثيراً ما تعترضنا بعض المواقف التي تدهشنا بحق، وتجعلنا نفتح أعيننا و" نبققها" كما في الصورة ويتدلى فكنا إلى الأسفل بتعابير تنم عن الصدمة .. الدهشة الشديدة .. عدم التصديق!
وقد مررت شخصياً بالكثير من هذه المواقف التي جعلتني أبدو بهذا الشكل التعيس من هولها!
*********
بعد تخرجي من الولايات المتحدة الأمريكية وعودتي إلى أرض الوطن الغالي ..
لم أحصل على وظيفة في الحال .. ليس لعدم تقدمي إلى واحدة، ولكن كان باب التسجيل يفتح مرة أو مرتين في العام!
وعندما تم فتح باب التسجيل (بعد عام من جلوسي في البيت!!) ذهبت للقيام ببعض الاجراءات وتنقلت ما بين ديوان الخدمة المدنية والتعليم العالي وهكذا ..
ذهبت لاستخراج بعض الأوراق الخاصة بي من جامعة الكويت "كوني كنت طالبة سابقة فيها" (لا أدري ما الحكمة منها، ولكني فعلت كما طلبوا!!)
وقد نصحني "عيال الحلال" بالذهاب باكراً لأخذ رقم والانتهاء سريعاً من هناك
أخذت بنصيحتهم ولم أكذب خبر!
وصلت في الساعة السابعة صباحاً ، وكان رقمي 27 .. يا الله! هل كان الذين قبلي نائمون عند الباب؟! متى وصل جميع هؤلاء؟!
المهم قلت "سهالات" وان شاءالله يمشي الدور بسرعة!
من سوء حظي كان يوم لتسجيل الطلبة الغير مقيدين، انتظرت وانتظرت .. انظر إلى عقارب ساعة الحائط .. تمر ببطء شديد!
أنظر إلى ساعة يدي .. الانتظار ممل أحياناً!
يمضي الوقت والأرقام لا تتحرك!!
الساعة تقترب من الثانية عشر ظهراً ولازال الدور عند الرقم 7!!!
اتأفف .. أتملل في مقعدي .. أنظر إلى ساعة موبايلي ومن ثم ساعة يدي .. لألقي نظرة أخيرة على ساعة الحائط!
لن أستطيع القيام بأي عمل آخر اليوم.. فقد مضى الوقت ولازلت في هذا المكان ..أتشبث بورقة الرقم وكأنها طوق نجاة!
الدور وصل عند الرقم 8 .. والساعة تقترب من الثانية ظهراً!!
غير معقول ما يحدث!
وجائني صوت أحد الموظفين صائحاً لكي يسمعه الجميع
الموظف: يا أخوانا .. الكومبيوترات راح تسكر بعد شوي .. للأسف ماراح نقدر نخلص كل الأرقام اليوم .. تعالوا باجر!!"
أنا وعينايّ تكادان تخرجان من محجريهما.. والذهول يملأ ملامحي .. وجدت نفسي دون أن أشعر أصيح ب
أنا:" نـــــــــــــــعـــــــــــم؟؟!!"
: أنتوا من صجكم؟؟
يقترب المسؤول مني .. يحاول تهدئتي ومحايلتي
المسؤول: أختي ميخالف تحملونا شوي مافي الا موظفتين اللي قاعدين يشتغلون واشوي ضغط عليهم!
أنا و الصدمة قد تملكتني لا أستطيع تصديق ما يقوله هذا الرجل فعلاً
أنا: مع احترامي أخوي، مو مشكلتي ما عندكم موظفين! عشرين كومبيوتر بالقاعة ومافي الا موظفتين؟ واذا فعلاً ما عندكم الامكانية على أي أساس فاتحين الأرقام ووصلتوا العدد لي 80؟!
المسؤول: أختي احنا وقفنا الأرقام (لا شعقبه؟!!) و بلغنا الناس يمرون باجر وأنتي تعالي باجر وان شاءالله ما يصير إلا كل خير!
أنا: خير؟! أي خير؟!
في هذه الأثناء عمت الفوضى المكان! وأعني ذلك حرفياً!!
فقد تم طرد عدد كبير من الناس وتم اقفال الباب على البقية الموجودين..
تزاحم عدد من المتجمهرين عند الباب يحاولون فتحه أو ربما كسره! وقد قاومهم رجال الأمن بجسارة!
رأيت بعضاً ممن قد أتوا بعدي و أرقامهم بعد رقمي يقفون مقابل الموظفين لاتمام معاملاتهم!!
شلتني ملامح الصدمة مجدداً! ان الذي يحدث "مو صج"!!
استعدت نفسي بعد زوال الصدمة!
تملكني غضب شديد .. وقفت من مكاني وتوجهت إلى أحدى الكاونترات .. كان يقف أمامي شخص يكاد ينتهي من معاملته فوقفت خلفه مباشرة بتصميم على الانتهاء من "هذه اللوية" قبل أن أفقد عقلي!
جائتني مسؤولة أخرى تحدثني وكأنني من كوكب آخر .. ترمقني بنظرات متعالية لسان حالها يقول " شهالتخلف"!!
وقالت: لوسمحتي أختي ممكن تقعدين مكانج؟ راح نخلص كل المتواجدين بالقاعة اليوم لا تسببين زحمة وقعدي واحنا ان شاءالله بناديج!"
نظرت إليها والشرر يتطاير من عيني فتراجعت قليلاً ،
لوحت الرقم الذي بيدي بوجهها و رفعته عالياً وقلت بهدوء
:أختي مع احترامي لكم .. رقمكم هذا أنا مو معترفة فيه!! (وضعت الرقم على الطاولة أمامها وأكملت) وأنا ماراح اتحرك من مكاني تيبست وأنا قاعدة على الكرسي من الساعة 7! الحين الأخ اللي جدامي بيخلص وأنا وراه! احترمنا المكان واحترمناكم وقعدنا نطرنا بالدور .. بس السالفة صار فيها "من سبق لبق" وأنا بصراحة أكثر من الوقت اللي نطرته ماراح أنطر !
لم تستطع أن ترد عليّ فقد أدركت بأني على حق فأومأت برأسها لي و التفت ناحية المتجمهرين تحاول أن تقنعهم بالجلوس مع وعد منها بانهاء معاملاتهم جميعاً
ولله الحمد انتهى هذا اليوم على خير و رجعت إلى البيت أحمل معي آخر ذكرى مريرة من جامعة "الكويت" التي نلت منها ما يكفي لأتذكره لسنوات وسنوات قادمة!
**************
من الصدمات الأخرى التي مررت بها هي عندما تم قبولي وتعيني في إحدى الوزارات الحكومية
فقد تم قبولي بقسم ما ، وتم تحديد مقابلة لي ولله الحمد قد اجتزتها ..
ولم يتبقى سوى إمضاء المدير المسؤول على قرار التعيين..
لأفاجأ باتصال من سكرتيرة المدير !
السكرتيرة: ألو .. السلام عليكم، شلونج مهندسة؟
أنا: بخير الحمدلله.. منو معاي؟
السكرتيرة: معاج سكرتيرة مكتب "بو فلان" (وكأن الوزارة له و لأهله!) تقدرين أتيين الحين؟
نظرت إلى الساعة كانت تقترب من الحادية عشر صباحاً
أنا: الحين؟ ليش في شي؟
السكرتيرة: لا بس المدير حاب يقابلج و يكلمج قبل لا يوقع على قرار التعيين!
أنا: أوكي مو مشكلة نص ساعة وأكون عندكم بإذن الله
وبسرعة البرق انتهيت من لبسي وقدت سيارتي بسرعة حتى وصلت إلى مبنى الوزارة بزمن قياسي!
دخلت مسرعة وأثناء دخولي للقسم لمحت المدير (سبق لي رؤيته من قبل) خارجاً لتوه من المكتب فنظرت إليّ السكرتيرة مشيرة إليه بأنه المدير (يعني شأسوي؟)
قالت: كاهو لحقي عليه توه طلع!
أنا: وين ألحق عليه؟! (صدمة!!)
قالت: لحظة .. (قامت باتصال سريع على تلفوناه)
هي: ألو بو فلان المهندسة اللي طلبت مقابلتها موجودة اهني
هو: ......
هي: ها .. أوكي خلاص!
نظرت إليها متسائلة فقالت معتذرة : المدير طلع الحين .. اهو عند الاسانسير ما يقدر يرجع!
أنا وقد أصبحت أشبه القط "توم" عندما يرى شيئاً مهولاً !!
عينايّ مفتوحتان على وسعهما و"وشوي ويطلعون من قمة راسي"!!
أنا: أوكي شأسوي الحين؟ راح يرجع؟ أنطره؟
السكرتيرة: لا خلاص تعالي باجر!!
ابتلعت الغضب الذي كاد أن يخرج ناراً من جوفي وبدأت بالعد لأهدئ نفسي!
غادرت المكتب وأنا لا أصدق ما حدث!
لقد رآني داخله لمكتبه ولم يعبأ بي! اتصلت به السكرتيرة تخبره بمجيئي والأخ عند المصعد ماله خلق يرد!
لم أتأخر بالقدوم فقد استغرقت أقل من 35 دقيقة منذ كلمتني السكرتيرة!
عدت أدراجي إلى المنزل لأعود في اليوم التالي إلى الوزارة وأضطر لإنتظار "بو فلان" حتى يأتي و يتكرم ويسمح لي بمقابلته!
وما حدث في المقابلة كاد أن يسبب لي أزمة قلبية!!
دخلت وسلمت عليه بكل أدب وتهذيب.. أخبرني بأنه إطلع على ملفي و نتيجة المقابلة التي تشيد بي ..
سررت بسماع مديحة كثيراً و لكن البسمة ماتت على شفتيّ عندما نطق بهذا!
المدير: إنتي أكيد رحتي وشفتي المكاتب تحت (هززت رأسي دلاله على الموافقة) .. وشفتي طبعاً المهندسات شلون ماعندهم مكاتب!
أنا: ايي نعم
المدير: أنا ما عندي مكان لج ولا عندي مكتب أحطج فيه!
أنا: مو مشكلة .. أقعد مع البنات تحت لين اتيبون لنا مكاتب! ( وحدة قاعدة سنة في البيت تبي تشتغل بأي طريقة!!)
المدير: إيي بس أنا ما أقدر أقبلج اهني عندي!
أنا وكأنني قد تلقيت صفعة قوية: ليش؟ عيل ليش سويتولي مقابلة؟
المدير: ايي بس انا ما عندي شاغر لج اهني كل اللي أقدر أسويه اني أقبلج وأوقع على قرار تعينج في الخدمات.
أنا: وين في الخدمات؟ (مادري شالطبخة!)
بأي مكتب قريب يم منطقتج أسجلج فيه عادي
أنا ولا زلت أسبح في بحر من الحيرة والضياع التام!
أنا: ايي يعني شنو أشتغل؟؟
المدير: مسجلة بيانات!
لأ! مو معقول! قلبي بيوقف! من مهندسة لي مسجلة بيانات؟! ليـــــــش؟!
شهالطراق المحترم؟!!
رفضت طبعاً.. أخبرته بأني مهندسة (خفت لا يكون ما يدري بعد!) .. أخبرني بدوره بأنه يعلم وأنه يحاول أن يساعد و قال لي إقبلي بالوظيفة الآن وبعد التعيين قومي بالتحويل لأي إدارة أخرى!!
وكأنني سمعت مثل هذا الحديث من قبل؟ آه نعم في جامعة "النحس"!! كلا لن أكرر الغلطة بالطبع، فلا يلدغ المرء من الجحر مرتين إلا إذا كان عبيطاً!!
طلبت منه عدم التوقيع واقترح عليّ أن أقوم بجولة في القطاعات المختلفة أبحث عن إدارة لديها شاغر! (مادري وين قاعدين شغل اطراره!!) المهم بأنني فعلت كما طلب و بعد لف بين المكاتب واسترجاء المدراء و البحث عن شاغر "مهندسة" و لسان حالي يقول "لله يا محسنين" .. وبعد تدخل فيتامين "واو" مع الأسف ، استطعت ايجاد مكان مناسب لي وتم تعيني ولله الحمد..
الصدمة الأخرى عند اكتشافي بأن "بو فلان" اياه، المسؤول عن قطاع علمي ومسؤول عن مهندسين وفنيين كثر، هو من حملة الشهادات الغير مختصة بمنصبه! فتخصصة شريعة و هو مسؤول عن قطاع علمي ومهندسون ومهندسات!!
اليست صدمة؟؟
واتضح لي أخيراً بأننا دولة نؤمن كثيراً بمقولة "ضع الرجل المناسب في المكان المناسب" ونطبقها حرفياً!!
********************
كانت تلك ذكريات "مأساوية" بعض الشيء، أحببت أن أفصل فيها بين مذكراتي السابقة ومذكراتي القادمة!
بإنتظار آرائكم وصدماتكم "إن وجدت" :)


هناك 62 تعليقًا:

SHOOSH يقول...

لوووووول

و الله الصدمات كثيره

يبلها بووووست

:)

Sn3a يقول...

waaaay enta laish marraitay eb kel hal mawaqef
l 7emdelellah 3ala kel 7al

bs jad sheno hathaa@@@@

نون النساء يقول...

والله حرام هاللي يصير بالديره

شاي الضحى يقول...

ديرتنه علمتنه على الطراره

موقفج بجامعة الكويت صار فيني وايد

الكورس قبل الاخير كل ما اروح بسجل حق اخر كورس كله خالصه الارقام واروح من الصبح

مره يتلي رفيجتي وقالت انها سجلت @@ قلت لها شلون انا رايحه من الصبح جان تقولي انا توني رايحه ودخلوني وكانت الساعه 12 !!

على طول استأذنت من الدكتور قلت له بروح الحمام ههههههههه وانحشت رحت ام تي سي مشي او بالأصح ركض لما وصلت جان يقولون لي سكرنه !!! قلت له توها رفيجتي داشه وانا من الصبح يايه قالي تعالي باجر

رديت محاظرتي وانا انافخ من التعب لوووول جان يقولي الدكتور انتي كان عندج سباق بالحمام؟!! فشلني لوووووووووول

واول ما طلعت من المحاظره جان اسمع بنات يقولون انهم توهم سجلوا ولما سألتهم وقلت لهم سالفتي قالولي توووووهم يايين يعني عقب ما طلعت !!!!!!!!!!!

بعدها بدت معاناتي مع التسجيل من شهر 12 لي شهر 2 يالله سجلت مالت على هالجامعة الخايسه الي ما شفت منها شي زين

موقفج الثاني صار باختي انقبلت بوزاره وبعدها قالوا مانبيج ماعندنه مكان وبعدها فرت على كل الادارات تطر منهم يالله لقت لها اداره واشتغلت

انا باجر مقابلتي ادعيلي مادري شنو الصدمات الي راح اشوفها

الله يستر

مشكوره :)

NOIR يقول...

LOOL
و الله اني ضحكت من القهر

هذي الكــويــت صل على النبي

انشالله التغير ياي انشء الله فينيا احنا


و شكلج على قولتهم : قــلبــة مترووسه
هههههههه

متابعه
الله ايوفقك..

jonoon 3aqel يقول...

اكثر شي صدمني..هي النطرة من 7 الصبح لييييييييييييييين 2 الظهر!!

عاد أنا ما اعرف اعصب...شكلي لو مكانك بطلع بسكات و مب راجع لهم!! ههههههه

مسجلة بيانات!!! عيل ليش متعبة حالك و درستي هندسة..اصلا ليش دخلتي جامعه دام ان الطاف ف نهايته مسجلة بيانات
لكن عدل شغلك..و الواسطة للأسف هي الحل الأنسب..و البلسم الشافي اذا تعسرت الأمور


الله المستعان...

لسه بدري علي ع الصدمات :)

تحياتي

رورو الشخبوطه يقول...

السلام..

اني اتعنى ايام لجامعة الكويت صارت فيني وايد تقريبا 3 مرات هذول اللي اذكرهم اولهم وقت التقديم واخرهم حزت تخرجي ..

والدوام ابداع انتوا زين مديركم امعي خخ احنا طرق الثانويه :\

والله يعينج ويوفقج يارب..

صمت البوح يقول...

Oops

كل هذا صار لج

ياخي صدق اتم فالبيت ابركلي

ولا قدمت اوراقي ولا شكلي بقدم عقب اللي قلتيه

وصدق اللي ماعنده فيتامين واااو ..لا يفكر يقدم على وظيفه ..


اهم شي فالاخير حصلتي ع الوظيفه


كاان خاطري تكتبين عن مواقف صارتلج فالغربه ^ ^

دمتي بـخير,,

لولا الأمل يقول...

اختي العزيزة

كنت اطمح بأن اصبح مهندس فالفيزياء والرياضيات هم مادتين اتلذذ بهما .. واكره ماده البايولوجي مع اني ادرس الطب !!!!!!

اللي حدني على الطب هو معاناة اخوي التي تشبه معاناتج !!!

> بس تبين الصراحة .. طلعتي عصبيه وايد :P

بس هم معاج حق تعصبين .. !!


وبالنسبة لاختيار الرجل المناسب بالمكان المناسب .. حدث ولا حرج !!!


يالله ان شالله تكون اخر الصدمات :P

Engineer A يقول...

SHOOSH

وانتي الصاجة يبيله "موقع-WEB PAGE" كامل بس حق صدماتنا!

:)

Engineer A يقول...

Sn3a

والله مريت بمواقف ألعن بعد .. بس للحين ما "طلعت كل اللي بجبدي" :)

الله كريم :)

Engineer A يقول...

نون النساء


وايد أشياء قاعدة تصير غلط، المشكلة يقولون لنا "انتوا اللي عينكم ما تطيح الا على الغلط"!!

انزين خل نشوف شي واحد "صح" ويبرد القلب علشان ننفه!! مافي!


الله كريم البركة في الشباب :)


أسعدني تواجدج ..

Engineer A يقول...

شاي الضحى



هههههه سالفة "سباق في الحمام" بروحها تصلح عنوان لبوست :)


الله يوفقج بمقابلتج يارب و ان شاءالله ما تشوفين صدمات!

منوره دوم :)

Engineer A يقول...

NIOR


اي والله .. اي والله

قلبي مو بس متروسة على قولتج الا "امطفح" بعد :)

Engineer A يقول...

jonoon 3aqel


أكتر من كده صدمات؟؟ :)

الله المستعان

Engineer A يقول...

رورو الشخبوطة


والله في عندنا ادارات مع الأسف مدراءها شهاداتهم أقل بكثير من موظفينهم، والمفروض يظلون بمراكزهم "متقضبين" بكراسيهم لين يتحللون ومصلحة البلد "بالطقاق"!!


الشكوى لله :)

Engineer A يقول...

صمت البوح


اي والله كل هذا صارلي وأكثر بعد ههه الله كريم


إن شاءالله لي عودة مع مواقف مريت فيها في الغربة .. للحديث بقية :)

Engineer A يقول...

لولا الأمل


تصدق يا أخوي .. إني طول عمري أهدا من الهدوء نفسه .. وما اكتشفت فيني صفة العصبية إلا بعد ما تخرجت ورديت و خالطت المجتمع "المتفتح" و"المطلع" اهني عندنا ! :)


زين ما يابولي الضغط والسكر ههه الله كريم :)

ثلجيّة القلب والأقراط .، يقول...

أوبس والله مو مبين عليج عصبيه وايد :×
بس ما تنلامين صراحةً ، يعني انتي تعبتي لين وصلتي للي تبينه ، و الحمدلله وصلتي و تخرجتي من مكان و مجال له احترامه و مطلوب ، فالمفروض بديرتج يكون لج تعامل أفضل من جذي ، بس شتسوين بعض الله كريم p=
ملاحظه " لو انا منج ارد أمريكا و اقدم طلب على وظيفه و اشتغل بسرعه و معززه و مكرمه لوول .

سؤال : ليش ما قدمتي بالقطاع الخاص ؟

بإنتظار المزيد من الذكريات المشوقه الي فعلاً يبيلها كتاب يضمها D=

BookMark يقول...

صدمااات مو صدمة!

بس ماشالله عليج عرفتي تتصرفين معاهم!
أحس اني لو كنت مكانج راح أوقف بزاوية وأبجي D:

انا بعد حاشني طشار،رحت اسجل دراسات عليا،واستقبال الموظفات كان أقل من صفر :/
تعنيت رايحة رادة عشان أخطاء منهم ونسيان!
الله المستعان

chandal/danchal!! يقول...

باختصار شديد

هنا الكويت



وبتفصيل ممل

بخصوص الدوام

join the club
دام ان مديرج مو مهندس يعني وضعج تعيس وبتفلسين من التقدير وعقب جم سنة بتنسين انج مهندسة

واصلة حق مرحلة اللي مالي خلق اسولف عن الدوام حتى مع نفسي!


شفتي شلون الرياييل ما يستحون على ويهم بالدوام؟... والا يشوفج متعنية ويتكيسل يرد من الاصنصير!... ليش محني ريوله؟


وبخصوص جامعة الكويت... التسجيل تعيس وخاصة مرحلة الماستر كنت اوصل قبل اللي تسحب الارقام ويضيع علينا اليوم بس يحرقون باعصابنا... ما جنا طلبة ماجستير وكلنا ما نتعدى 50 طالب

غير مشكلتي بالتسجيل ما عمره حاشتني مشكلة بالكلية... بس ادري ان ادارة الجامعة من انحس ما خلق الله وياما شفت طلبة انظلموا وما طلعلهم حق

Cesc يقول...

لو بنكتب عن الصدمات ما نخلص ..
بس بقولج شي , لم تاخذ تخصص نادر وتتعين بمكانك المناسب , ولما تقدم اوراقك لـ مديرك بالعمل يسالك شنو يعني تخصصك ؟ تقوله كيت وكيت , يقولك اها بايحاء انه فاهم ثم يحولك لمكان ابعد ما يكون عن تخصصك ,
انا قصيت الحق من نفسي وغسلت ايدي منهم
وصرت اساحلهم , حتى صار دوامي وقّع وتوكل على الله ..
وصرت اوقع واقول " ياربي لك الحمد "

وحاليا صار عندي فراغ هائل , وطد علاقتي بالمدونات
وهذا الي استفدته من دوامي والله
صرت اشبك وايد

والله يعينا ويصلح حال البلد

SheLLoO يقول...

هذي الكويت صل على النبي ;q

كل يوم وبكل لحظة تصيرلنا مواقف تصدمنا بس أبشرج الحين صار عندي مناعة من سوالف التطرّش والتخلف وعلى طول يا واسطة يا راكضي على موضوعج واوقفي ببلعومهم..

صراحة شي يحر والناس كل يوم تتطوّر احنا كل دقيقة نرد ورا والله لو تشوفين مآسي كليتنا الجميلة كلية التربية الأساسية = College of Tkhaluf
شي رهيب وكل يوم وبكل موقف نشوف التخبّط الإداري والعفسة والجامعة نفس الشي فإذا هذي أمثلة صغيرة فأكيد الوزارات أكثر تخبط ولوية وكل واحد ياخذ فلوسه وينام بدون ذمة ولا ضمير واحنا ناكلها بعدين يقولون ليش عيال الكويت جذي !!!

كل يوم ننصدم لذلك ابتسم أنت في الكويت والحمدلله على كل حال وعسى الله يفرجها ونطمح لئن نكون مثل دبي عالأقل مو مثل اليابان
;q

وترى حرّني هذا إلي تخصصه شريعة يبيلي أمسك منصب نفسه بما إن تخصصي تكنولوجيا تعليم أبي أمسك منصب بالنفط ;q

أنا صج مابي أتخرج الحين من المآسي إلي قاعشوفها عشان جذي بعد ابتسم أنت في الكويت وانصدم أنت في الكويت أيضًا
;q

جنّه تعليقي أطوّل من البوست؟
;q

Engineer A يقول...

ثلجية القلب والأقراط

عزيزتي لو أنا او انتي او اهو او اهي او أي أحد هدينا هالديرة وماقعدنا فيها ولا حاولنا نغير ونعدل من هالأخطاء جان بعد خلااااص قولي على الكويت السلام!

للحين عندي أمل بوجود ناس فاهمين وعارفين وان شاءالله "اتمنى" انهم يرتقون بمستوى البلد في يوم ما ! قريباً كما أرجو

Engineer A يقول...

BookMark

تدرين عد قبل لا أطلع وأروح أدرس بره كنت إذا مريت بهالموقف قمت أبجي وأسكت عن حقي .. والنتيجة ماقدرت أكمل بالجامعة! مو لأني ما استوعبت المادة لأن الدراسة بره كانت أصعب .. بس لأن التعامل مع البشر كان مختلف والخجل والخوف والسكوت عن الحق اهو اللي خرب علي.. علشان جذي يمكن يوم صادفني الموقف بجامعة الكويت مره ثانية قدرت نوعاً ما اتمرد واوقفهم عند حدهم :)

Engineer A يقول...

chandal / danchal !!!

امم عاد مديري الحالي مو كويتي .. مهندس بس من جنسية عربية بس هم مطلع لي قرون لووول


الله كريم :)

Engineer A يقول...

Cesc

شوف نفس الوضع قاعدة أمر فيه .. "بطالة مقنعة" ما أسوي أي شي مو كسل مني لأن مديري مو كويتي وما يبينا نتعلم شي .. لأنهم يخافون لا نتعلم الشغل و ناخذ مكانهم وهالشي ما يبونه بالتأكيد!

الله كريم :)

Engineer A يقول...

SheLLOo

:)

بالعكس تعليقج حلو ومو طويل P:

وصدقيني طول ما الكويت للحين فيها ناس تحبها من قلب ، ان شاءالله الوضع يتحسن ويصير للأفضل بإذن الله

تحياتي :)

اقصوصه يقول...

جد والله شي يبط الجبد

انا من النوع اليل بمثل هالمواقف

ما اقدر امسك اعصابي

مادري ليش ما في احترام للناس

وللاوقاتهم عندنا للاسف!

Made n Q8 يقول...

جامعه الكويت وماادراك ماجامعه الكويت الحمدالله تخرجنا وافتكينا منهم

بس المصيبه بالعله الدوام اهي اهي ان شاء الله الله يفرجها علينا

Engineer A يقول...

اقصوصة


أنا هم أ{جع وأقول ان شاءالله الامور تتحسن بوجود شباب فاهم وواعي :)

حياج الله

Engineer A يقول...

Mad n Q8


الله كريم .. ومثل ما قدرتي تمشينها أيام الدراسة ان شاءالله بتمشي بالوظيفة :)

محمد يقول...

والله شي يضيق الخلق ,

وبسبت تعين بو فلان وتوابعة , في مراكز ماتوالمهم ..

صرنا نهتف بصوت واحد ..

هذي الكويت صل على نبي ..

تعقدت والله من كثر ما اسمع بالمشاكل اثناء طلب توظيف

أعتقد راح أخذ وطري الكافي بدراسة ..
قبل لا أقبر طموحي بوظيفة حكومية ..

Engineer A يقول...

محمد


أحسن شي تسويه :) طول بدراستك كثر ما تقدر واذا انت تحب الشغل وما تبي تدبس بوظيفة "مقبورة" اتجه للقطاع الخاص وايد أفضل

تحياتي

أحمد الحيدر يقول...

بالنسبة للجامعة - كما بعض المرافق الأخرى في الدولة - فهم بكل أسف لا ينجزون أحيانا سوى لمن يكشر عن أنيابه .. أما من يكون محترما وليس لديه لسان أو واسطة فعليه الحضور غدا .. أو بعده!

لذا فإن تصرفك رغم قسوته فقد جاء في محله ..

أما الأخ المدير فللأسف هذه النوعية منتشرة بكثرة في بلادنا العزيزة .. ولا أذيع سرا حين أقول أن طبيعة عملي جبرتني على التعامل مع العديد منهم .. و"خذي وخلي" مما يفعلونه أو يظنونه بأنفسهم !

على العموم أتمنى أن تكون هذه مجرد ذكريات .. وأن يكون الحاضر والمستقبل أفضل ..

تحياتي ..

روميـه فهد يقول...

الصدامت التي كتبتها عزيزتي ، لم تنتهي بعد ، لا تزال تتكرر إلى يومنا هذا مع اختلاف الشخوص.

عجبني موقفك تجاه الموظفة "السخيفة" أمام الكاونتر.. الشدّة مطلوبة أحيانا.

أما الصدمات في حياتي حدّث ولا حرج .. لا أتذكر منها شيئا .. وهذا رحمة الله
بي..

واصلي عطائك ولـ تكن صدماتنا تجارب نصفق لنفسنا حينما تجتازها بسلام..

مهندستنا.. لي طلب بسيط..
أرجو إزالة التأكيد بالأحرف الإنجليزية
أرهقتني فعلا ..


دمتِ لمن تحبي

روميه

Engineer A يقول...

أحمد الحيدر

عاد تبي الصج؟ أنا ما حبيت تصرفي حزتها بس حسيت أن الموقف غصب خلاني أعصب !! يعني نطرة من ال7 ل2 الظهر وآخر شي على "ماميش"؟؟ صعبة أتقبلها :)


عموما هذي كلها ذكريات صج تضيق الخلق شوي بس الأمل يبقى بحصول تغيير إلى الأفضل بإذن الله ..


متور إعلامينا :)

Engineer A يقول...

رومية فهد


الحمدلله على كل حال والحين هذي صارت ذكريات راحت وانتهت "صج الصدمات" لا زالت تتكرر مثل ما قلتي بس شنو بيدينا ؟ الله المستعان


تم حذف طلب التأكيد على الكلمات .. يسلمو على التنبيه :)

سلة ميوّه يقول...

فاصل مخيف
...


حلست ساعه ( مبققه عيوني)
من صجّه!!!!!!


تدرين ياحبيبتي الشرهه مو عليه...
كلنا ندري الشرهه على منو...


بس شتقولين الا حسبي الله ونعم الوكيل


ترى بوستاتج


عوار قلب ( in agood way )


يعطيج العافيه

وعسى الله يفتحها عليج..
ميخالف..هالطريج مشيناه..
وتدربحنا لما قلنا بس
وارد اقول يامهندستنا ياعسل..
بالنهاية وصلنا:)

ناطره البوست الياي...

ناطرة من صج على اعصابي...

حبي:*

Angel of silence يقول...

والله من ناحية واسطة ما كو شي يمشي بالكويت الا بالواسطة ..

ومن ناحية تخصص المدير اييي خليها على الله اصلن وااايد مناصب كبيرة بشركات و بنوك و غيرها و غيرها ماسكينها ناس يمكن شهادتهم ثانوية او حتى التخصص بصوب ومجال عملهم بغير تخصصهم

و للأسف ياما بتشوفين صدمات

الزين يقول...

:$

اضحك لو ابجي على اللي كتبتيه

بس تدرين

ديرتنا مو لنا
حق هالغرب
وياحبهم حق العماله الرخيصه

تعالي عندي سؤال
ليش الا وزاره
شفيه القطاع الخاص
او المؤسسات الحكوميه

مو ابرك لج من خمال الوزارات

:)

صباح الخير

Hashimoto يقول...

@@

شالنكد ؟!

انشالله مو واحد تخصصه شريعة يصير مدير
لوووول
الحمدلله والشكر .. ويقولون ليش الدولة "متقدمة" !

============

صارتلي سالفة بتسجيل الجامعة :

رحت ويا ولد خالتي .. كنا اول ناس بالتسجيل
واحنا كنا متفوقين .. فيعني .. كنا سابقين الكل
رحت عند موظف .. مو عارف يسوي شغله ..
سنة على ما يدخل البيانات .. ولما بيخلص .. قالوله ترى مسوي شغلك غلط
وتعال عيده مرة ثانية !
وبعدين الجهاز اخترب .. وراحوا بيبدلونه
اهني الي صج انفجرت عليهم وقعدت ازف الموظف
والموظف الي يمه الي مامنه فايدة
الناس قامت تطالعني لووووول
لان صج شغل بو 10 دقايق قعدت عليه اكثر من 45 دقيقة
والناس الي يت بعدي سجلت موادها وخلصت !
فلما انفجرنا عليهم ودوني عند موظف ثاني خلص شغلي !
ما تنفع معاهم طولت البال ..
بالزف يالله يمشون !
=============

Engineer A يقول...

سلة ميوه


ايي صج احنا شفنا وايد ..بس وصلنا.. لكن هم أحس للحين ما وصلنا للي نبيه!

حبيبتي ردودج تخجلني دايماً ..

مشكورة والله على ردودج الرائعة :)

دمتي بخير

Engineer A يقول...

Angel of silence

للأسف وصلنا لمرحلة ما يمشي شي بالديرة إلا بفيتامين "واو" !!

دمتي بخير عزيزتي :)

Engineer A يقول...

الزين


ودي والله .. ودي بس الهوى ضدي! :)

ودي بالقطاع الخاص بصراحة بس "حكومتي" ما يرضون !!

بس في مشاريع في بالي الحين قاعدة أسويها و ان شاءالله تلهيني عن هموم الوزارة :)

دمتي بخير عزيزتي :)

Engineer A يقول...

Hashimoto

:(


والله صج وصلنا لمرحلة الواحد فيها يضطر يتخلى عن مبادئه و "نفسه" بس علشان يخلص شغله!

يعني أ،ا عمري العصبية ما كانت بطبعي ولا باسلوبي بس "اهم غصب" بتصرفاتهم حدوني على جذي!

يعني ليش ما يتعدلون إلا "بالعين الحمرا" ؟؟!!

الله كريم


ميرسي على التواجد :)

Mohammed يقول...

السلام عليكم ,,

مو مستغرب من اللي قلتيه لاني مريت بنفسه وللحين اعاني من التخبط اللي صاير ,, بطيخ والله والله يعينج المشكله
لما يكون هناك شخص غير مختص وماعنده شهاده سنعه تلقينه شايف نفسه ومدير بعد ويتشرط ,, شي ثاني جامعة الكويت بطيييييخ وربي انا درست فيها وشفتهم
خاصة بالتوجيه والارشاد والتسجيل والعماده ناس دايخه بس مشي حالك ,,
انا قبل نفسج سالفتج بس كنت بسجل قراءات كنت انطر وانطر اخر شي ضبطت الامن المصري ودشيت لأن ماينفع الا جذيه والوضع سايب وكثري من فيتامين واو لان هالوقت يبيله فيتامين واو وعلاقات ولا ماتمشين ,,

سلام والله يعينج ويوفقج يامهندستناااااا ,, وانصحج روحي البترول او إكويت او قطاع خاص لانج شهاده انتي فحرام تقعدين عند هالناس ..

وشكرا

Engineer A يقول...

Mohammed

الحمدلله على كل حال .. وعلى القطاع النفطي او الخاص .. اممم جاري التفكير بالأمر :)

الله المستعان

مشكور على التواجد

نبض الأدب يقول...

باختصار >> مأســـــاة !

الله يكون بعونج مهندستنا ..
صبرٌ جميل .. و اللهُ المستعان =)

قواج الله ^^

Engineer A يقول...

نبض الأدب


الحمدلله على كل حال ..أيام عدت على خير .. وياما حنشوف :)

مشكورة على التواجد أختي الكريمة

رؤى يقول...

يالله .. والله حسيت فيييك ياقلبوو ..
انا خريجة أدب انجليزي وعندي ماستر وأدور على وظيفة مالقيت ..

الله يكون بعونك .. بشرينا اذا توظفتي ..

اللهم يااارب ياكريم ارزقها وظيفة لم تحلم بها والكل يحسدها عليها يااارب ..
وتمم عليها بكل خيير ..

ودي وعبير ردي ..

Sharm يقول...

والله اسنمتعت بقراءة التعليقات
اللهجة الكويتية جميلة بجد

شارم
sharmlifeblog.com

Engineer A يقول...

رؤى


عزيزتي مشكورة لتواجدج .. بس أحب أوضح ان ما أدونه مجرد ذكريات وبأني ولله الحمد توظفت وخلصت صارلي سنوات قليلة :)

دمتي بود

Engineer A يقول...

Sharm

شكراً لتواجدك أخي الكريم

الوتيــــــــــن يقول...

صباح الورد

شوفي ياخيتي آنا كل شي كان تمام ومذهولة .. ليمن يت كلمة ( فيتامين واو) .. خنقتني العبرة .. شفتي شلون صار حتن صاحب الحق يضطر لاستخدام واو لأخذ حقه؟ لهذا لا تحترم الإدارات ولا الوظائف لهذا ديرتنا في تراجع .. لهذا الكل يتحلطم

وعلى جامعة الجوكر .. اف معاناة معاناة .. بروحه رايحه آخذ روب التخرج .. يعني خلاص ماعدت فيها بعد وهم بهذلوني من مكان لي مكان والله فكرت اروح اصمم لي واحد وافصله ولا هالمذله .. زين يامعوده افتكيتي الحمد لله

أمي تقول لي .. ليش تحبين الغرب؟ المؤمن يحشر مع من يحب .. واقول لها يمه الاجانب اخلاقهم في التعامل مع الآخرين اخلاق اسلام .. واحنا ماخذينا منهم الا الشين .. ما تبيني احبهم واحترمهم؟
لمن الانسان ما يتعزز ابديرته الا بالواسطه شنسميه؟ لمن يحترمونج بره لشهادتج لإنجازات.. مو لأنج معرفه ببوفلان وابو علنتان .. شنسميه؟

اخ بس .. اخذي وخلي من المهازل اللي تصير يوميا .. ينفع نسويه مسلسل نفس سكربز ونسمية كويتز

قلبتي المواجع ياخيتي

صباح الفل

سمو الأميرهـ ..ツ يقول...

الله يعينج ..
والله هاي حال الدنيا
كل شي بالواسطات :|


مشكووره حبيبتي ع البوست


:)


*************


دعوة :
http://somow92.blogspot.com/2010/01/blog-post_15.html

سمو الأميرهـ ..ツ يقول...

الله يعينج ..
والله هاي حال الدنيا
كل شي بالواسطات :|


مشكووره حبيبتي ع البوست


:)


*************


دعوة :
http://somow92.blogspot.com/2010/01/blog-post_15.html

Engineer A يقول...

الوتين


من ناحية قلبت المواجع فأنا قلبتها :(

ان شاءالله .. في القريب العاجل (كما أرجو دائماً) .. تتحسن أوضاع البلد .. ويختفي فيتامين واو عن الوجود .. وياخذ كل حق حقه!

ربما هو مجرد "حلم" من أحلام يقظتي العديدة!


مشكورة للتواجد عزيزتي

Engineer A يقول...

سمو الأميرهـ

للأسف هذا حال الدنيا "فقط لدينا" !!

الله المستعان ..

مشكورة على التواجد :)

Hamad يقول...

السلام عليكم...

انا ما اقول الا حسبنا الله و نعم الوكيل....

انا واحد من الي مرت عليه هالسوالف و متاكد انه راح اتمر علي اكثر و اكثر... بس شنو بيدي اسوي... لا الواحد يقدر يطق بعمره و يشلع الي المكان الي يحبه بسبب الدين و الاهل و الاعراف و العلاقات الاجتماعيه... و لاني من هذيل الي يقولوووون يا معود انت شوووف جيرانك دول الخلييييج و الدول العربيه و تحمد ربك... شنقوووووول اش نحجي عن احوال البشر في هالبلد... ما انكر انه في هالبلد خير بس احنا من حبنا لها ودنا انشوفها احلى البلادين... شوية همه على شوية تفائل انشالله نووووصل للقمه.


ناطرين مفاجاّتج و مواضيعج الحلوه..

Hurricane

Engineer A يقول...

ان شاءالله نوصل :)

غير معرف يقول...

:(:(
الله يعينا ما ادري شلون راح انتوظف
احنا ؟!!!!