تحذير: هذه المدونة تخضع لقانون حماية حقوق الملكية الفكرية، ونحذر من نشر أو نقل أي نص أو مقال دون نسبه للمؤلفة بأي وسيلة.







الاثنين، 25 يناير 2010

مواقف وطرائف من الغربة ... (4)


في بداية إنشاء مدونتي قمت بذكر موقف من المواقف التي مررت بها في الغربة مع مطعم ماكدونالدز
ولقراءة الموقف
سأكمل معكم "مسلسل" المواقف التي مررت بها مع والدي الحبيب ،،
بعد أن أضعت كاميرتي إلى الأبد، كان لابد لي من شراء أخرى! فأنا أحب التصوير كثيراً بالإضافة إلى عدم تمكني من رؤية الثلج دون تصويره!
وبما أننا لازلنا "لاجئين" في ذاك الفندق، ولم نستطع الحصول على شقة مناسبة .. فلم يكن مسموحاً لي بالتصرف وشراء كاميرا محترمة (الأوامر كده)
فاكتفيت بشراء كاميرا "تقزيرة" من النوع التي تستخدم لمرة واحدة فقط! وذلك بصورة مؤقته حتى نستقر ..
أقمنا في الفندق ما يقارب ال 25 يوماً .. كنت خلالها أذهب إلى الجامعة صباحاً برفقة والدي ..
ويعود في المساء لإصطحابي ، وكنا نتناول طعامنا أحياناً في الفندق وأحيان أخرى في المطاعم المختلفة التي حولنا
وأحيان كثيرة أكتفي ب "توست وجبن" !!
خلال تلك الفترة توطدت علاقة والدي بصاحب الفندق والعاملين العرب هناك .. وكانوا يصطحبونه للبحث عن شقة مناسبة ..
إلى أن فاجأني يوماً بأنه وجد المكان المناسب أخيراً!!
طرت من السعادة .. لقد كنت فرحة جداً بحصولي على سكن خاص بي ..
مكان أستطيع المشي به بحرية .. فقد سأمت ضيق الغرفة بالفندق ..
التي زادت من كآبتي ووحدتي !
وخلال أيام قليلة كان قد اشترى والدي أثاثاً مناسباً وقمنا بفرش "منزلنا الجديد" وتنظيفه ..
وأخيراً الاستقرار به!
لم أنسى تشغيل القرآن الكريم خلال الأيام الأولى من وجودنا في الشقة ..
وتطورنا أكثر فقد قام والدي بشراء سيارة "مستعملة" من رجل عربي "الله يسامحه" فقد غشنا بها
وجعلنا نعاني كثيراً من ورائها!
وحصلت أنا أيضاً على لاب توب خاص بي قمت بشراءه من BestBuy
كل الأمور أصبحت رائعة .. ما أجمل الاستقرار!
لم يسمح لي والدي بالقيادة فقد كان يخاف عليّ من القيادة بالثلج ..
فاستمر بتوصيلي من وإلى الجامعة التي لم تكن بعيدة عن سكننا الجديد بل قريبة منه ومن السوق المركزي وبعض المطاعم والمحلات ..
وفي صباح أحد الأيام قبل الذهاب إلى الجامعة .. شدني منظر الثلج المكوم في الباحة الخلفية للسكن ..
قام والدي بتشغيل السيارة .. ثم طلب مني النزول منها والذهاب معه لإلتقاط بعض الصور "كذكرى"
خصوصاً بأن منظر الثلج جميل ويبعث الراحة للنفس من روعة بياضه ..
تراشقنا أنا والدي بالثلوج .. وضحكنا كثيراً وقمنا بالتصوير .. إلى أن اكتفينا ..
وعدنا إلى السيارة للذهاب إلى الجامعة ..
وكانت هناك مفاجأة غير سارة بانتظارنا!!
لقد كانت السيارة "القديمة" التي اشتراها والدي من نوع "ميركري"
وهذه السيارة الأمريكية تقوم بإقفال نفسها بعد أن تشتغل !
وقد كانت مقفلة والمفاتيح بالداخل .. وكانت تعمل!!
لم يكن لدى والدي مفتاح آخر "سبير" .. ولم نعرف كيف نتصرف
فتح باب المجمع السكني لتخرج منه سيدة لطيفة .. قامت بتحيتنا ..
ورأت على ملامحنا علامات الارتباك و الوجوم ..
وبعد أن أطلعها والدي على ما حدث .. قالت بأنها مرت بموقف مشابه من قبل
ونصحتنا بالاتصال على الطواريء 911 !!!
شعرت بأن السبب سخيف للاتصال على 911 !
" من أولها 911 ؟ "!!
لاحظت ترددنا فأخبرتنا بأنها ستعرج على محطة الوقود القريبة و ستخبرهم لكي يأتوا لمساعدتنا ..
شكرناها و جلسنا ننتظر ..
"طبعاً كنت أنا الملامة << شكو مادري؟"
وقام والدي بصب جام غضبه عليّ !!
سكت و"اخنقتني العبرة! اطلعت الوناسة واللعب بالثلج من جبدي" !!
كان والدي على وشك الاتصال بالطوارئ حين دخل ونش إلى المجمع السكني وتوقف بقربنا ..
قام والدي بالتحدث مع الرجل وتم الاتفاق على أن يدفع والدي مبلغ 50$ دولاراً لفتح الباب ..
وافق ابي من دون تردد وما هي إلا ثانيتين حتى فتح الباب !
وغادر الرجل مسروراً بالمبلغ الذي لم يكلفه شيئاً سوى عناء المجيء من الشارع المقابل!
وعدى اليوم على خير ..
كلما نظرت إلى تلك الصور تذكرت هذا الموقف و" الزفة" التي تلقيتها من والدي يومها
وبعد أن حلت المشكلة .. ربما أحس والدي بأنه "انفعل اوفر" عليّ .. وقام بتلطيف الأجواء والتحدث بأمور كثيرة ختمها بعزيمة في مطعم محترم إرضاءً لي !
:)
أتمنى أن تكونوا قد استمتعتم بهذه المواقف .. أكتفي بها لليوم على أن أكمل معكم البقية لاحقاً
دمتم بخير :)

هناك 44 تعليقًا:

ثلجيّة القلب والأقراط .، يقول...

لوووووووول حرام ما تسوى عليج استانستي بالثلج :× لا و المشكله ان اهوا نزل معاج يعني ماله داعي يزفج لوول :×

و حسيت فيج لمن قلتي إستقرار من بعد ما لقيتو المكان المناسب ! لان فعلاً غرفة الفندق إتيب الكآبه ":/

و الحين من بعد ما عطلنا ، صرت بإنتظار المزيد و المزيد من هذي الذكريات p=

عزيزة نفس يقول...

مراحب انجينيرا

الصراحة موقف السيارة مقفولة في الثلج

نفس الموقف مر علي ..

ثاني يوم متنقلة من بافلو/نيويورك لواشنطن دي سي .. غيرت الجامعة والسبب الثلج .. ولا واشنطن نزل فيها ثلج في فترة انتقالي ..

المهم .. كنت اسخن السيارة وسكرت الباب .. على أساس بنظفها من الثلج على ما تسخن .. وانقفلت ..

بس على أيامي .. القفل بارز في الباب .. بشماعة حديدية فتحته ..

بس صج تخرعت وتوهقت ..

**

سوالفج حلوة ..

متابعة معاج

تحياتي

بنت سيف

NOIR يقول...

كل منج .. كل منج!
هههههههههههههههههه

حسيت فيها من قبل
بعد عمري و الله صــج كسرتي خاطري و الله

احس اني قاعده اعيش معاج كل لحظه و مشتغله قص و لزق اهني .. اقص صورتج و احط صورتي
ههههه

وااايــد انطر التفاصيــل احس اني راح اعيشها يوم من الايام ان شالله
لا اتطوليــن علينا :*

سمو الأميرهـ ..ツ يقول...

حليلج والله
...

هيه الأهل يزفون
عقب يطيبون خاطرنا ..بس عقب شو !!


المهم يهونون ..:)

******

امممم قريت بوست موقف ماكدونالز ...

كنت أعتقد إني انا الوحيدة اللي أنسى أشيا بسيطة
مع إني أعرف أرمس إنجليزي عدل
بس أحيانا المخ يشفر ..:\

*****


ذكريات طريفة وممتعه

:)

فانتظار يديدج


تحيااااااتي

روميـه فهد يقول...

إي ليش يزف ! واعليه امر وصار ..

لالالالا مو قبول ..
انزلت شعبية الوالد اهني : )

يا حلوج ويا حلو مواقفج ..

دمتِ لمن تحبي

روميه

aL-NooR . يقول...

يا حلوج و يا حلو سوالفج
رسمتي البسمة و الضحكة ..مشكور
صج احتاجها :**

يا حلوه ابوج ..
احس صرتي صديقته واااااايد
بسفرة ..و تعلمتي منه وايد ..و هم اثرتي عليه :)

ترى ناطرة ..
و شكلج تعرفين تسوقين بالثلج ..صح ؟

**************************

شاي الضحى يقول...

وانا اقره لما وصلت عند الشقه قلت مو معقوله لازم تصير مصيبه ههههههههههه

وطلع توقعي في محله

يالله الحمدلله عدت على خير :q

يعطيج العافيه :>

BookMark يقول...

لووووول دايما جذي بهالمواقف اتطيح السالفة براسنا D:
ماعليه اهم شي يراضيج عقب ;)

استمتعت بهالبوست :)
وبوست ماكدونالدز بعد ضحكني D;

يعطيج العافية :)

رورو الشخبوطه يقول...

السلام..

اهم شي انهعوضج عقب الزفه ع اقل طيب خاطرج:)

ومشكوره..

Cesc يقول...

LOL سالفه القفل ع السيارة مشكله والله
وتحطك بمواقف بايخه ههه
بس انتي ع الاقل قفل وانتي الجو حواليك بديع ثلج وبرد , لكن لو كان حر ورطوبه وانت متبهدل بالجو هذا والسيارة جدامك مقفوله ومكيفها شغال
نذاله صح ؟ LOL

عجيبه وفي انتظار المزيد

Engineer A يقول...

ثلجية القلب والأقراط

الله يسلمج عزيزتي وتمنياتي لج بعطلة ممتعة ..

وان شاءالله تعجبج باقي المواقف من غربتي ..

س: عندج مدونة؟


دمتي بخير :)

Engineer A يقول...

عزيزة نفس

هههه على الأقل انتي تصرفتي ..أنا عقب الموقف هذا قمت أفتح الدرايش قبل لا أسكر الباب "احتياط" :)

وتوني أدري انج دارسة بأمريكا بعد .. "شي حلو"

دمتي بخير :)

Engineer A يقول...

NIOR

لوول حلوه سالفة "قص ولصق" .. الله يهداهم ابهاتنا كله حاطين الصكة براسنا :)

خلج متابعة وان شاءالله ما أطول عليكم

دمتي بخير

Engineer A يقول...

سمو الأميرهـ

اي بوست ماكدونالدز وهقه :))

بس كل هذا صار ذكريات حلوة يسعدنا تذكرها ..

دمتي بود :)

Engineer A يقول...

رومية فهد

لوووول لا يسمعج الوالد بعدين يعصب عليّ ويسكر المدونة بكبرها :))

حياج الله دوم عزيزتي

Engineer A يقول...

aL- NooR

يسعدني رسم ابسمة والضحكة بقلوبكم .. وصاجة في هالسفرة صرت أقرب للوالد "صديقته" وطاحت الميانه شوي :))

امممم اي أعرف أسوق بالثلج :)

أسعدني تواجدج

Engineer A يقول...

شاي الضحى


الله يعافيج حبيبتي ..

ودمتي متابعة :)

Engineer A يقول...

BookMark

لو مو مراضيني جان مديت له البوز شبرين :))

ومشكورة حبيبتي على التواجد الدائم ..

Engineer A يقول...

رورو الشخبوطة

مشكورة على التواصل والتواجد المستمر

دمتي بخير :)

Engineer A يقول...

Cesc


لوول لا عيل أشوه اطلعت سالفتي هينه والجو كان بارد :)

ومشكور على التواصل الدائم


دمت بود :)

ba6alah يقول...

3ala hal mawaqef elmafrom etsawoon mosalsal o ta3rothona ehnak with english subtitle o etsamona "elmazfofa" cause maskena entay oboch kela zafech

Antonio يقول...

يا سلام يا بش مهندسا

لا المواقف عجيبة ما شاء الله

كويتيين لازم اذا صارت مشكلة واحد ياكلها وعندنا وعندج خير ما شاء الله

الله ثلج ، قاعد اطالع الجو الحين مريخ على غبار على برد والحساسية والعطاس شتغلوا وقال يا حلو الثلج والله والحمدلله على جونا كله خير :)

وموقف ماكدونالدز عجيب مشكلة الواحد اذا ما لقه الكلمة المناسبة :)

عزيزتي

رسمتي البسمة على وجهي منذ الصباح الباكر شكرا لك

ودمتي بالف خير

ومو ناسي الوعد

:)

pure-silk يقول...

خوش موقف لاتحسدون عليه ...والوالد الله بحفظه سوالج جو و اكشن :)

دمتي بصحه وعافيه

lilly يقول...

لووووووول وعليه ماينلام شلون بتردون بعدين p:

ويت ابويهج مسكينه p:

يحليله الوالد .. الله يخليه لج انشالله :)

اقصوصه يقول...

موقف ممتع :)

صح انج اتنزفيتي

بس الحلو انج ما زلتي تذكرينه

يقولون ان احنا لنا قابليه

بتخزين وتذكر المواقف المحزنه

اكثر من غيرها من المواقف السعيده:)

لولا الأمل يقول...

لوووول .. عادي كل ابو جذي .. اي شي يصير غلط احنا المسؤولين عنه

بس بالنهاية راضاج .. ربي يخليه لج

سالفت السيارة .. نفس رفيجي .. شرى سيارة عليها ديون وقضايا وهو ما يدري شالسالفة .. خذاها وتوهق مسكين :S

بعدين باعها ببلاش :P

ناطرين باجي الاحداث

Engineer A يقول...

ba6alah


على الزفة عادي ياما انزفينا وياما راح ننزف :)

مشكور على التواجد

Engineer A يقول...

Antonio


يسعدني مرورك أخوي .. ومشكور على التواصل وان شاءالله يدوم :)

راح أمر واشوف شصار على الوعد :)


دمت بخير

Engineer A يقول...

pure-silk


الله يعافيج حبيبتي ومشكورة على التواصل الدايم :)

Engineer A يقول...

lilly

الله يعافيج عزيزتي

ومشكورة على التعليق والتواجد اللي اتمناه على طول :)

حياج الله

Engineer A يقول...

اقصوصه

بالعكس والله الموقف كان مضحك بالنسبة لي ومو محزن علشان جذي تذكرته :)

اعدني تواجدج :)

Engineer A يقول...

لولا الأمل

مشكور على تواصلك الدائم أخوي على الرغم دراستك وانشغالك فيها ..

والله يوفقك يارب .. وان شاءالله يديم هالتواصل على طول ..

دمت بخير :)

اسمي أحمد .. لو مخانتنيش الذاكره !! يقول...

السلام عليكم

ما شاء الله .. ايه الأسلوب الراقي ده؟ .. استمتعت فعلا و أنا بقرأ كلامك ..

أول مره ازور مدونتك بس مش الأخيره ان شاء الله

يا ريت تشرفني على مدونتي و تضع تعليقك

ra7alaat.blogspot.com

شكرا لوقتك

Sharm يقول...

هههههههههههه

موتيني من الضحك

صمت البوح يقول...

هههههه سالفة ماكدونز جتلتني من الضحك..صدق مرات الذاكرة تخون صاحبها..>>دوم تصير وياي
اخاف يوم من الايام انسى اسمي لووول
ولا سالفة الثلج ... كسرتي خاطري
شحقه يشاتمج "يزفج"
نسينا ماكلينا ...عقب مالعب بالثلج وضحك يشاتمج شو يخصج انتي؟!
بس اهم شي اخرتها طيب خاطرج بكلمة

بوست بدايته ضحك ونهايته اكشن
‏^‏^ نتريا يديدج يالغلا
والله يعطيج العافية

jonoon 3aqel يقول...

يعني لازم كل واحد يدرس برا..تنقفل سيارته و المفاتيج داخلها!!!
=======
الذكريات كثيره..
منها لحظات ألم..و سعاده..لكن ف النهاية..هذا من عمرنا..
و بنرجع ان شاء الله..و ندخل ف عجلة الدنيا..و لحظتها..

بننسى كل "هوم سيك" و كل وحشه و كآبه..و بنتذكر ذاك المكان..تلك المدينة..
الشقة..الغرفة..و الصحبة..

تسلمين اختي

و عسى ايامك كلها فرح ف فرح

تحياتي

Engineer A يقول...

اسمي أحمد لو ماخنتنيش الذاكر


شكراً على الكلام الجميل والمدح الحلو .. واسمك طويل اوي ليه كده؟ :)


ان شاءالله امر على مدونتك بأقرب فرصة .

أسعدني تواجدك

Engineer A يقول...

Sharm


ان شاءالله دوم فرحان ومبسوط وبتضحك يارب ..

نورتني :)

Engineer A يقول...

صمت البوح



الضحك والأكشن عندي انتوا بس صبروا علي شوي .. يايتكم بالسوالف :)

منورة عزيزتي لاخلا ولا عدم :)

Engineer A يقول...

jnoon 3aqel


صحيح كلامك اخوي راشد واحلى مافي عمرنا بعد المواقف اللي نمر فيها "الذكريات" ..

وان شاءالله دوم ذكرياتنا حلوة وسعيدة يارب ..

وتسلم على المرور والتواصل

دمت بخير

اجتماعي يقول...

مواقفج عجيبة ..
وأسلوبج بالسرد يجذب ..

بس إذا ممكن ..

بنهاية المواقف .. ياليت تكتبين عن معاملة الأمريكيين لكم كونكم عرب

أقصد الأمريكيين الأمريكيين ..
مو الأمريكيين العرب أو الآسيويين ..

بـــــقــشة يقول...

احب لما يطيبون خاطرج الاهل اذا حاسيين بتأنيب ضمير !!

ناطرين سوالفج ماتنمل :))

Engineer A يقول...

اجتماعي


ان شاءالله الموضوع الياي علشانك وهم لأن يأتني أسئلة كثيرة عن تعامل الأمريكيين معانا :)

حياك الله

Engineer A يقول...

بقشة


الله يسلمج مشكورة على التواجد ..

حيل أسعدني :)