سأتوقف عن سرد ذكرياتي والمواقف الطريفة التي مررت بها أثناء غربتي على أن أعاود الحديث عنها لاحقاً.
جائتني الكثير من الأسئلة والاستفسارات عن الأمريكان وكيفية تعاملهم مع العرب والمغتربين وفي الحقيقة لقد سمعت أموراً لا تصدق وإشاعات غريبة عن الأمريكيين !
لذا أحببت أن أخصص موضوع اليوم للحديث عن المواطن الأمريكي من واقع تجربتي الشخصية واحتكاكي معهم أثناء سنوات الغربة الماضية.
هناك في الولايات المتحدة الأمريكية يوجد نوعان من المواطنين ..( حسب تصنيفي)
1. الأمريكي
2. الأمريكي بوطقة!
قد يستغرب الكثير منكم النوع الثاني وما المقصود به..
الأمريكي بو طقة هو مواطن أمريكي يحمل الجنسية الأمريكية ولكنه ليس بأمريكي!
"ضعتوا عدل؟" :)
يعني في أمريكا وايد مهاجرين سواء عرب، هنود، أفغان، آسيويين، ...الخ
وبصراحة أنا أحس ان الأمريكي بو طقة اهو اللي لازم الواحد يحذر منه ومن التعامل معه..
شلون؟؟
أنا أقولكم!
كوني كنت طالبة في الجامعة كان أكثر ناس أحتك بهم هم أساتذتي في الجامعة ..
واستطعت خلال السنوات التي قضيتها هناك أن أصنف دكاترتي كل وطريقة تعامله معي او مع أي عربي أو "غير أمريكي"
فوجدت بأن الأمريكي ممتاز بالتعامل!! راقي ومتفهم .. وسهل التعامل معه ولم أعاني أي عقد نفسية في مواده!!
وعلى العكس، كان الأمريكي بو طقة متعب جداً ، نحيس، يغث، واييب المرض !!
سأدعم أقوالي ببعض الأمثلة التي واجهتني هناك ..
في قسم الهندسة الكهربائية في جامعتي في متشغن كان مجموع الأساتذة خمسة فقط!
اثنان منهم أمريكيون والثلاثة الآخرين أمريكيون بو طقة!!
وخمنوا ماذا حدث؟؟
لم اواجه أي مشكلة مع المواد التي يقوم "الأمريكي" بتدريسها لي ومعدلي رائع!
وموادي مع الأمريكي بو طقة في الحضيض! ومعاملتهم لنا "قشرة"!!
أذكر موقف حدث لي مع أحد الأساتذة "البو طقة" قمت بتقديم المدتيرم وكانت إجاباتي "شبه كاملة" يعني في أسوأ الأحوال يكون تقديري جيد جداً
لأفاجأ بالاستاذ يسلمني ورقتي ومكتوب عليها D !! يه ليش؟؟!!
لم أستطع إيجاد الغلط "لأنه لا يوجد غلط أصلاً"!!
ذهبت للتحدث إليه فقال لي
you deserve this?
يا الطيب ليش؟ وين الغلط؟ غير بدل؟!
"عمك أصمخ" !!
أقنعته بوجهة نظري .. أريته إجاباتي الصحيحة
ولكنه أصر على أنني لا أستحق أن أأخذ درجة جيدة!
بحجة أنني "غير أمريكية" فكيف يساويني بالأمريكان؟!
وقال لي بصريح العبارة
You will have a B on my dead body!!
ماهذا يا إلهى؟! هل يعقل هذا الكلام؟!
هل تناسى ذلك الشمحوط بأنه أمريكي بوطقة؟! أم صدق نفسه؟!
ثم ما هذا السبب السخيف الذي أحرم من حقي بالدرجة بسببه؟
ولن أخفي عليكم بأن أكثر الأساتذة الذين نالوا نصيب الأسد من "الدعاوي الثقيلة" هم الأمريكان بوطقة!
وحتى لا يظن البعض بأني متحاملة عليهم وأدافع بشراسة عن الأمريكي الفقير ..
فقد صادفني بعض الأمريكان العنصريين الذين يتحاملون على الغير أمريكي .. ومنهم من أعطاني وأعطى جميع المسلمين الذين في الصف معي درجة F في حين أن بقية الطلبة الأمريكان على شاكلته قد اجتازوا جميعهم!!
ولكن هؤلاء قلة ولا تتعدى نسبتهم ال20%
يعني بالمختصر أغلب الأمريكان معاملتهم حلوة وطيبة وراقية مع الكل .. ومحترمين جداً وفي البعض منهم تعميه العنصرية والتعصب لديانة معينة أو لعرق معين..(وموجود هذا التعصب في مجتمعاتنا أيضاً)
وهناك فئة أطلقت عليهم لقب "أمريكي بوطقة" أغلبهم شايف حاله شوي .. ومغرور ونحيس !!
وقلة منهم "الزينين"
في النهاية أنصحكم بعدم مشاهدة الكثير من أفلام الأكشن الأمريكية لأن الحياة في أمريكا مستقرة وآمنة نوعاً ما بعكس ما نشاهده على شاشات هوليوود !
دمتم بخير
هناك 47 تعليقًا:
صدقتي وانا اشهد على كلامج :)
احب معاملتهم وكل شي عندهم سهالات
معلومات مفيدة ^^
عيل الأمريكي بوطقة نسى انه "بوطقة" وقام يشوف حاله !!
والله حالة D:
صباح الخير ....تخيلي ان احنا اليوم كنا نتكلم عن نفس الموضوع بس عن الامريكي الاصلي وشلون هو حقاني و ماعتده نحاسه والي معانا بحكم عمله مع الامريكان فعنده امثله مالها عدد عن هالموضوع و يقارن لنا بالكويتي الي نفس وظيفه الامريكي ...طبعا لاتعليق
دمتي بصحه وعافيه
طلع حتى هناك عندهم بو طقه ..مساكين مو مصدقين ان عندهم الجنسيه العمريكيه!
السلام..
المفروض يكون الشخص غير متحيز لا الجنسه ولا الجنسيته واهو بهالمجال :\
ومشكوره..
عموما الامريكان بوجهه عام ودوديين وياخذون عليج بسرعة بس بنفس الوقت في عندهم قواعد اجتماعيه تستغربينها :)
انزين يعني في امريكي مزدوج وامريكي ولد بطنها LOL
خوش معلومات , ورقي الامريكان نابع من اصلهم الانجليزي
aha y3ny ham ohma 3endehom amreky dakhel el soor o amreky bara el soor? hehehe J/K
شكرا على تلبية الطلب السريعة : )
حلوة أمريكي بو طقة ..
درستني دكتورة أمريكية "بالكويت طبعا" ..
شفت عندها رقي بالتعامل ..
ما شفته عند غيرها من العرب ..
فيها أخلاق الاسلام .. وإهي مسيحية
طلعت أمريكية أصلية .. مو بو طقة : )
LOL
ذكرتيني بفؤاد الهاشم لما يتكلم عن الامريكي الاصيل والبيسري!
اتفق معك الفرق واضح حتى لما اختم جوازي بالمطار او بالحدود البرية اذا طحت عند امريكي اصلي سهالات واذا مهجن ابو المغثة
والواحد بامريكا يشوف شعب ما يشوف ديرة... اطباعهم وايد حلوة والديرة الوحيدة اللي ما اسمع فيها كلمة "نو" وايد مريحين بالتعامل
.
.
.
بعيد عن السالفة... بس الديرة اللي ضيعتو فيها "ديترويت" فيها out/let
يرد الروح اسمه
somerset
يا زينها من ايام
:)
شاي الضحى
اي والله الغالبية كل شي عندهم سهالات .. وقلة ما تلاقين منهم "النحيس" :)
BookMark
شفتي شلون؟؟ المصيبة مو بس قام يشوف نفسه الا قام يبطر بالنعمة بعد!! :)
مرورج رائع كالعادة
pure-silk
تدرين عاد ان اهم عندهم أخلاق الإسلام على الرغم من انهم مسيح؟؟
وشوفي اغلب الأريكان حليوين وحبوبين بس مايمنع انه يطلع منهم بعض "المنحس" والعنصريين ..
دمتي بخير عزيزتي :)
Made n Q8
الظاهر نسى انه قبل الجنسية "العمريكية" شنو كان!
منورة حبيبتي :)
رورو الشخبوطة
صحيح كلامج بس هذا الشخص الفاهم والعاقل .. بس شتقولين بناس عقلهم محدود في مجال التدريس وبس وجان زين تدريس سنع بعد!
مشكورة على التواجد :)
بقشة
ياهلا عزيزتي ..
ما فهمت المقصود بقواعد اجتماعية غريبة؟ هل تقصدين معيشتهم؟ يعني علاقاتهم الاجتماعية؟ اذا هذا اللي تقصدينه فصحيح اللي ذكرتيه اهم شوي علاقاتهم الأسرية متباعدة ومفككة بس اهم متعودين على هالنمط من الحياة ..
مشكورة على مرورج الرائع .. منورة :)
Cesc
شكلك منحاز للانجليز :) انا عن نفسي صادفوني قلة من الأمريكان ترجع أصولهم لبريطانية وايرلاندا شوي "جافين" بالتعامل .. بس الحق يقال انهم جديين وhigh class مثل ما يقولون :)
وازدواج الجنسية موجود وبكثرة بأمريكا :)
ba6alah
hehehehe eee 3ndhom amrekan mn bara elsooor bs 3ad ay soor ? :) thanks 3la eltawajed
اجتماعي
العفو ولو ما سويت شي :) وحلاته حار بحار علشان ما أنسى الموضوع :)
وعلى تعامل الأمريكان فعلا الامريكان ممتازين وتعاملهم حلو وحيل متفهمين بس ما يمنع وجود فئة "شاذة" منهم و انا شخصياً صادني موقف مع دكتور امريكي أصلي للأسف بس "عنصري" وراني الويل! ومع هذا ما حكمت على الامريكان بصورة خاطئة لأن هالعنصري كان 1 من 100000 وما شوه صورة الكل بعكس الامريكي بو طقة يمكن تلاقي منهم 1 من 1000000 اللي زين والباجي اللهم يا كافي!!
حياك الله أخوي ومنور :)
chandal / danchal !!!
انتي طلعتي من ربع متشغن؟؟ :)
somerset mall هذا سوقمو اوت لت .. وهذا الله يسلمج ما طحت عليه مع الوالد طحت عليه مع my husband لووول وكنا نسميه المول الكشخة مقارنة بالمول اللي في منطقتنا الكئيبة! :)
الله يا حلاتها من أيام .. تبيني أذكرج؟
سومرست مول موجود في شارع الwest big bever تدخلين له من الهاي واي على exit 69 :)
أبي ارووووووووووووح! :)
طبعا الي قلتيه صح بس قصدي مثلا لو قربتي منهم بطريقة معينه ممكن يطعنونج بالميول p:!
الحدود الاجتماعيه اهيا الي اقصدها مافيهم ذيج الحبابه نفسنا مهما كانوا حليووين !
و انا ايضاً اتفق معاج ، الأمريكان أكثر ناس سلسين بالتعامل بالغرب و أكثر من البريطانين ، و دايماً ماخذين عنهم فكره غلط ، بس الي يروح عندهم و يتأقلم معاهم راح يشوف ان جداً محترمين بالتعامل و يمكن أكثر من العرب !
بالنسبه حق سؤالج : لا ما عندي مدونه بس إنشالله يكون عندي قريباً :×
شكراً إنجنيرتنا
موضوع عجيب بس في شغلة
لو انا منج واشوف هالنعصريه اقوم ادق على اي عضو بالكونغرس واقول استجوب وزير التربية وخله يأدب هالدكاترة ولا ترى والله ما نعطيك ولا صوت بولايتنا وبشوفك شلون بتنج .
ولا ادز عليه الي خبري خبرج ويقوله انت يا "اللفو" هع هع هع هع هع .
اي والله صح الناس اجناس والكل يتعامل بأصلة وتربيته .. ولا الملعون يقول عشانج مو امريكيه شدعوة الحبيب من الهنود الحمر الحين .
يالله عدت :)
وابنتظار المزيد والممتع دائما :)
مرحبا إنجنير
اممم تصدقين مب بس بأمريكا حتى عندنا
في السمستر الأولاني درسني دكتور أمريكي
وكان يعاملنا أحسن معامله
وجداً متفهم و أسلوبه راقي مع الكل ..
وفي نفس الوقت كان عندنا دكتور عربي
اتخيلي
مع إني و 2 من زميلاتي كنا حالين الواجب بنفس الطريقة
بس هو نقصني وما نقص البنيتن ليش انهن من جنسية عربي ولانهن مب مواطنات
يعني موضوع التفرقة هذا موجود فكل مكان ..
ولا بعض الدكاتره من بعض البلدان العربية يسوون تفرقه بين الجنسيات الخليجية والعربية ..!!
شي غريب
****
اممم تصدقين صدق صورة امريكا متشووهة عندنا واايد
مع انه أحس أمريكا أهون من أوروبا ..
***
وعن قوم بو طقة ما أعرف ع شو يتخققون ..
خلاص انا سايره أمريكا وبأدبهم
وبعلمهم أصوول التعامل
مشكووره حبيبتي أنجنيير ع البووست
فانتظار القاادم :)
امريكي بو طقه ههههههاي
صج صج صج ضحكت سبحان الله معظم اللي بوطقه لان فيهم نقص يطلعونه بغيرهم عشان يغطون على نقصهم ..
طبع النقص اهم حطوا نفسهم فيها ...
احب الامريكان قضيت معاهم عمر وعاشرنا امريكان بو طقه كان منهم خوش ناس وعاشرنا امريكان امريكان هم كانوا خوش نس (:
وتبقى ذكريات
حتى هناااك ؟؟
ويييه الله يعين بهون عن الماستر شكلي ..
لا مو من ربع متشغن
احنا جيرانكم, ربع لندن اونتاريو (كندا) وسومرسيت تبعد ساعتين بالسيارة... خري مري
:)
بجد فعلا أخلاقهم وتصرفاتهم منتهى الرقى والأمانة وعندهم حب للتعاون وخيرين جدااا بصرف النظر طبعا عن اى شئ تانى بس الحق يقال
http://awraktanbod.blogspot.com/
صـــــديـــقــــتــــي :)))
ما ادري انتي شمسويه فيني الي استاااانــــس على سوالـــفج و الله :**
ما كو علــى الاصــيــل اب كل شي و الله:)
اسم علــى مسمى
الله يكافيني شر البو طــقه ! ورانا دراسه عندهم! على قولت دكتورنا الله يذكره بالخير "عند العمام"
نتــ{قب المزيـــد..
الله يوفقك.. يا صديقتي :p
طلع عندنا وعندهم الخير
الا نفس الشي عندنا
شكلهم مب مصدقين انهم خذوا الجنسيه لووول
صدق حاله !!
نفس الشي في كل مكان
احيد دكتور مصري يدرسنا ..المصريات بيعطيهم درجات ويحطهم فوق الراس ونحن ياغافلين لكم الله
خليها على الله
ويسلموا على البوست الغاوي
نتريا يديدج
بقشة
معاج حق .. شوفي أنا صارت لي فرصة أحتك مع الامريكيات "العياييز" بالذات واكتشفت انهم يموتون على النميمة والحش مهما كانوا حليةين ..
يعني عادي يبتسمون بويهج بس ما يواطنونج :) بس الحلو فيهم "واقصد الامريكان "مو البو طقة انهم حتى لو ما يحبونج ما ياكلون حقج ويعطونج اياه!
حياج الله
ثلجية القلب والأقراط
ان شاءالله تصير عندج مدونة عن قريب و تعزمينا عليها :)
ومشكوره على تواجدج الحلو ..
منورة دايماً :)
Antonio
الكونغرس مره وحده؟ لا يحوشك! .. أخاف يحطوني بعدين في الغونتنامو :)
حياك الله دوم أخوي :)
سمو الأميرهـ
على الرغم من هجرج لمدونتج ولوعة جبدج منها إلى انج حرصتي على التواجد في مدونتي وهالشي وايد اسعدني :)
وخليها على الله .. احنا دايماً مأكولحقنا من هالفرب و دايماً لابد من وجود العنصرية والحزازات بحياتنا!
الله المستعان
دمتي بود :)
ms.sms
والله صحيح كلامج ان في امريكان بوطقة زينين بس نادر وجودهم :)
وهم مو كل الامريكان عسل في منهم عسل اسود بعيد عنج :))
مشكورة على التواجد عزيزتي وسعيدة ان سوالفي رفهت عنج وارسمت الضحكة على وجهج :)
دمتي بود
أحمد الحيدر
شكلك مالك خلق تكمل الماستر وبتشمعها بموضوعي :)))
لا أخوي كمل وتوكل على الله بس احرص انك تنقبل بجامعة مافيها أمريكان بوطقة ولا عنصريين :/
chandal/ danchal!!!
عاد كندا كانت حيل قريبة منا بس للأسف مالله كتب نروح لها ..
احنا سومرست يبعد عن منطقتنا تقرباً ساعة ونص :)
أم..بوبه
اي فعلاً تعاملهم راقي ما نعمم بس الأغلبية كويسين :)
شكراً على التواجد عزيزتي
NIOR
مشكورة "صديقتي"
على الكلام الطيب والتواجد الحلو والتعليقات الرائعة ..
ومشكورة أكثر على اعتباري "صديقة" لج لأن هالشي يسعدني ويشرفني وايد ..
كل الحب :)
صما البوح
منورة دوم بتواجدج الحلو وتعليقاتج الرائعة ..
حيل يسعدني حضورج :)
دمتي بألف خير عزيزتي
لووول أهم شي إنه بو طقة pP:
حلوة الكـُنية .. لايقه عليه صج بو طقه شاف نفسه pP;
تبقى كل ديرة .. فيها الزين و فيها الشين =)
يعطيج العافية إنجنيرتنا :)
هههه "بو طقه"
==
من تجربتي ف الكل يعامل الناس و العرب باحترام..
سواء بوطقه و لا غيره..و القليل جدا هم العنصريين...
انا ف 4 سنين..شفت مممم عنصري واحد او اثنين....طالب..و مدرس بو طقه من اصل ايراني
بالتوفيق اختي
تحياتي
نبض الأدب
اي والله في كل ديرة الزين والشين..
وانا من ال3 دكاترة اللي "المغشوشين" واحد بس زين فيهم :/
حياج الله
jnoon 3aqel
اي انا ذكرت اني مو معممه بس نقلت تجربة شخصية واستنتاج شخصي باللي صار معاي :)
أسعدني تواجدك
المذكره زاخرة وصيد الشبكة وافر ..
لقطات .. ذكريات قد أجدها في بعض الأحيان خصوصيتها تسلي كاتبتها ..
لكن في احيان اخرى تلامسنا بسمتها ..
اختي الغالية ..
لي تعليق أوسع وأدق لكن ربما في مكان آخر ..
دمتي بكل الحب والود
Bo SteVe
يسعدني رسم الابتسامة على الوجوه ..
وبانتظار تعليقك الدقيق في القريب
دمت بخير
لو ذكرتِ لنا معنى " بوطقة" .. فهمنا انها ترمز للامريكي الآخر .. لكن لماذا اسميتهِ بوطقة ...
مذكراتك جميلة جدا جدا احببت التواجد هنا
تحياتي
إرسال تعليق